Yekucala KubaseKhorinte
12 Bazalwane, angifuni kutsi nibe bete lwati mayelana netiphiwo temoya.+ 2 Niyati kutsi ngesikhatsi nisebantfu betive,* benidukiswa kuze nikhonte tithico letingakhulumi,+ nenta nobe yini lebetifuna kutsi niyente. 3 Ngifuna nati kutsi kute umuntfu lotsi nakakhuluma anemoya waNkulunkulu atsi: “Jesu ucalekisiwe!” futsi kute longatsi: “Jesu uyiNkhosi!” ngaphandle nangabe anemoya longcwele.+
4 Kunetinhlobo letehlukahlukene tetiphiwo, kodvwa umoya munye;+ 5 kunemisebenti leyehlukahlukene yekusita labanye,+ kodvwa iNkhosi yinye; 6 futsi kunemisebenti leyehlukahlukene yemandla, kodvwa nguNkulunkulu munye loyenta yonkhe kubo bonkhe bantfu.+ 7 Kepha umoya ubonakala kumuntfu ngamunye kuze kuzuze labanye.+ 8 Ngobe ngemoya, lomunye unikwa likhono lekukhuluma ngekuhlakanipha, futsi ngawo lowo moya, lomunye unikwa likhono lekukhuluma emavi lanelwati, 9 lomunye unikwa kukholwa+ ngemoya lofanako, lomunye naye unikwa tipho tekwelapha+ ngalowo moya, 10 lomunye unikwa likhono lekwenta imisebenti yemandla,+ lomunye unikwa likhono lekuphrofetha, lomunye unikwa likhono lekucondza emavi laphefumulelwe,+ lomunye unikwa likhono lekukhuluma ngetilwimi letehlukahlukene,+ kantsi lomunye unikwa likhono lekuhumusha tilwimi.+ 11 Kepha yonkhe lemisebenti yentiwa ngumoya munye, futsi wabela umuntfu ngamunye ngendlela lotsandza ngayo.
12 Njengobe umtimba umunye kodvwa unetitfo letinyenti, futsi tonkhe titfo tawo nobe titinyenti, tingumtimba munye,+ unjalo-ke naKhristu. 13 Ngobe sonkhe sabhajatiselwa emtimbeni munye ngemoya munye, ngisho nobe singemaJuda nobe singemaGriki, ngisho sitigcili nobe singulabakhululekile, futsi sonkhe sanatsiswa umoya munye.
14 Ecinisweni, umtimba ute sitfo sinye, kodvwa unaletinyenti.+ 15 Nangabe lunyawo lungatsi: “Njengobe ngingasiso sandla, angisiyo incenye yemtimba,” loko akulwenti kutsi lungabi yincenye yemtimba. 16 Nangabe indlebe ingatsi: “Njengobe ngingesilo liso, angisiyo incenye yemtimba,” loko akuyenti kutsi ingabi yincenye yemtimba. 17 Kube wonkhe umtimba bewuliso, bewutawuva ngani? Kube wonkhe bewuyindlebe, bewutawuhogela ngani? 18 Kodvwa Nkulunkulu uhlele sitfo semtimba ngasinye ngendlela latsandza ngayo.
19 Kube tonkhe titfo betisitfo sinye, umtimba bewutawuba kuphi? 20 Letitfo tinyenti, kodvwa tingumtimba munye. 21 Liso ngeke litsi esandleni: “Angikudzingi,” nenhloko ngeke itsi etinyaweni: “Anginidzingi.” 22 Esikhundleni saloko, titfo temtimba letibonakala tibutsakatsaka kunaletinye tiyadzingeka, 23 futsi titfo temtimba lesicabanga kutsi atikabaluleki sitihlonipha kakhulu,+ netitfo letingatsandzeki sitiphatsa ngenhlonipho lenkhulu, 24 kantsi-ke titfo tetfu letitsandzekako atidzingi lutfo. Kepha Nkulunkulu uwente kanjalo umtimba, wenta titfo lebetite ludvumo taba neludvumo lolukhulu, 25 kuze umtimba ungehlukani, kodvwa titfo tawo tikhatsalelane.+ 26 Nangabe sitfo sinye sihlupheka, tonkhe leletinye tihlupheka naso;+ futsi nangabe sitfo lesitsite sidvunyiswa, tonkhe leletinye tijabula naso.+
27 Nine ningumtimba waKhristu,+ futsi ngamunye wenu usitfo sawo.+ 28 Nkulunkulu ubeke labatsite ebandleni: Bekucala baphostoli;+ besibili baphrofethi;+ besitsatfu bafundzisi;+ bese kuba ngulabenta imisebenti yemandla,+ labanetiphiwo tekwelapha,+ labenta imisebenti lelusito, labanemakhono ekucondzisa,+ nalabakhuluma ngetilwimi letehlukahlukene.+ 29 Babaphostoli bonkhe yini? Babaphrofethi bonkhe yini? Babafundzisi bonkhe yini? Bonkhe benta imisebenti yemandla yini? 30 Bonkhe banetiphiwo tekwelapha yini? Bonkhe bakhuluma ngetilwimi yini?+ Bonkhe babahumushi yini?+ 31 Kodvwa chubekani nilwela* kutfola tiphiwo letinkhulu kunaleti.+ Kepha mine ngitanikhombisa indlela letendlula tonkhe.+