Imisebenti Yebaphostoli
13 Ebandleni lebelise-Antiyokhi, bekunebaphrofethi nebafundzisi:+ BekuboBhanabasi, Simeyoni lobekutsiwa nguNigeri, Lusiyusi waseSirene, Manayeni lowafundza neNkhosi Herodi, kanye naSawula. 2 Ngesikhatsi bakhonta Jehova* futsi bazila kudla, umoya longcwele watsi: “Ngitsatseleni boBhanabasi naSawula+ kuze bente umsebenti lengibabitele wona.”+ 3 Ngako batsi nabacedza kuzila kudla nekuthantaza, bababeka tandla base bayabakhulula.
4 Njengobe boBhanabasi naSawula bebatfunywe ngumoya longcwele, baya eSeloyisiya, futsi nabesuka lapho bahamba ngemkhumbi baya eSiphrosi. 5 Batsi nabefika eSalamisi, bashumayela livi laNkulunkulu emasinagogeni emaJuda, naJohane bekakhona abalekelela.*+
6 Nasebahambe kuso sonkhe lesichingi* baze befika ePhafosi, bahlangana nendvodza lengumJuda lokutsiwa nguBhajesu, beyisangoma futsi ingumphrofethi wemanga. 7 Lendvodza beyinaSegiyusi Pawulusi, lobekangumbusi wesifundza* futsi ahlakaniphile. Lombusi wabita boBhanabasi naSawula ngobe bekanesifiso lesikhulu sekuva livi laNkulunkulu. 8 Kodvwa lesangoma lokutsiwa ngu-Elimasi, (nguloko lobekushiwo libito lakhe) sacala kubaphikisa, sifuna kuvimbela lombusi kuze angakholwa. 9 Sawula, lobekaphindze abitwe ngekutsi nguPawula, wagcwala umoya longcwele futsi wasibukisisa lesangoma, 10 watsi kuso: “Wena logcwele yonkhe inhlobo yekukhohlisa, nabo bonkhe bubi, ndvodzana yaDeveli+ nesitsa sako konkhe lokulungile, yekela kukhuluma kabi ngetindlela taJehova* letilungile. 11 Ngako Jehova* utakujezisa, futsi utawuba yimphumphutse, kuphele sikhatsi ungakuboni kukhanya.” Ngekushesha inkhungu nebumnyama kwehlela kuso, futsi sahambahamba setama kutfola umuntfu lobekangasibamba ngesandla. 12 Lombusi watsi nakabona loko lobekwentekile waba likholwa, ngobe bekamangaliswe nguloko lebekakufundza ngaJehova.*
13 Pawula kanye nalabo lebekahamba nabo besuka ngemkhumbi ePhafosi bahamba baze befika ePhega lesePhamfiliya. Kodvwa Johane+ wabashiya, wabuyela eJerusalema.+ 14 Nanobe kunjalo, bahamba besuka ePhega baze befika e-Antiyokhi lesePhisidiya. Kwatsi ngelilanga leliSabatha, bangena esinagogeni+ bahlala phansi. 15 Nasekufundvwe uMtsetfo+ netincwadzi tebaPhrofethi, tikhulu telisinagoge tatfumela umlayeto kubo tatsi: “Banaketfu, nangabe kukhona leningabakhutsata ngako bantfu, sicela nikusho.” 16 Ngako Pawula wasukuma, waphakamisa sandla abindzisa bantfu, wase utsi:
“Nine ma-Israyeli nani nine labanye lenesaba Nkulunkulu, ngilaleleni. 17 Nkulunkulu webantfu baka-Israyeli wakhetsa bokhokho betfu, wabenta baba sive lesinemandla ngesikhatsi batihambi eveni laseGibhithe, futsi wabakhipha kulo ngesandla sakhe lesinemandla.+ 18 Wababeketelela ehlane iminyaka lengaba ngu-40.+ 19 Ngemuva kwekubhubhisa tive letingu-7 eKhenani, wabehlukanisela lelo live laba lifa labo.+ 20 Konkhe loko kwenteka eminyakeni lengaba ngu-450.
“Ngemuva kwaloko wabanika tikhulu, kwaze kwefika sikhatsi saSamuweli umphrofethi.+ 21 Kodvwa ngemuva kwaloko batifunela inkhosi.+ Ngako Nkulunkulu wabanika Sawula indvodzana yaKhishi, wesive sakaBhenjamini,+ lowabusa iminyaka lengu-40. 22 Nasekamsusile Sawula, wakhetsa Davide kutsi abe yinkhosi,+ futsi wakhuluma ngaye watsi: ‘Ngitfole Davide indvodzana yaJese,+ umuntfu lotsandzekako enhlitiyweni yami+ nalotawenta tonkhe tintfo lengitifunako.’ 23 Njengobe nje Nkulunkulu etsembisa, uvetele Israyeli umsindzisi longuJesu, lovela entalelwaneni* yaDavide.+ 24 Ngesikhatsi loyo asengakefiki, Johane washumayela kubo bonkhe bantfu baka-Israyeli kutsi kufanele babhajatiswe, kuze bakhombise kuphendvuka kwabo.+ 25 Kodvwa nasekatawucedza umsebenti wakhe, Johane bekatsi: ‘Nicabanga kutsi ngingubani? Angisuye. Kodvwa kunalota emvakwami, futsi angikufaneli ngisho nekumkhumula tincabule takhe.’+
26 “Banaketfu, nine leniyintalelwane ya-Abrahama nani nine labanye lenesaba Nkulunkulu, Nkulunkulu usitfumelele lelivi lelimayelana nendlela latasisindzisa ngayo.+ 27 Ngobe bantfu baseJerusalema nebaholi babo behluleka kumbona lomsindzisi, kodvwa ngesikhatsi bamehlulela, bagcwalisa loko lokwashiwo baPhrofethi,+ nalokufundvwa njalo ngelisabatha. 28 Ngisho nobe bangazange basitfole sizatfu sekutsi afe,+ bebafuna kutsi Pilatu ambulale.+ 29 Kwatsi nasebatente tonkhe tintfo lebetibhaliwe mayelana naye, bamehlisa elugodvweni,* bamngcwaba ethuneni.+ 30 Kodvwa Nkulunkulu wamvusa ekufeni,+ 31 futsi wabonakala emalanga lamanyenti kulabo lebebasuke naye eGalile baya eJerusalema. Laba-ke sengibo labafakaza ngaye kubantfu.+
32 “Ngako simemetela kini tindzaba letimnandzi letimayelana nesetsembiso lesentiwa kubokhokho betfu. 33 Nkulunkulu usigcwalise ngalokuphelele kitsi, tsine lesibantfwana babo, ngekutsi avuse Jesu+ njengobe nje kwabhalwa esihlabelelweni sesibili kwatsiwa: ‘Wena uyindvodzana yami, lamuhla ngikutele.’+ 34 Nkulunkulu bekavele akhulumile ngalokumvusa kwakhe ekufeni kuze angaboli, nakatsi: ‘Ngitawetsembeka, nginikhombise lutsandvo lolucotfo lengalwetsembisa Davide.’+ 35 Kulesinye sihlabelelo kutsiwa: ‘Angeke uvumele kutsi lowetsembekile wakho abole.’+ 36 Davide yena wakhonta Nkulunkulu* esikhatsini sakhe, futsi wafa,* wase ungcwatjwa nabokhokho bakhe, nenyama yakhe yabola.+ 37 Kodvwa loyo lowavuswa nguNkulunkulu akazange abole.+
38 “Ngako-ke banaketfu, yatini kutsi tono titawutsetselelwa ngaloyo muntfu futsi nguloko lesikumemetela kini,+ 39 nekutsi ngaloyo muntfu, bonkhe labakholwako kutsiwa bete licala.+ Nanobe kunjalo, uMtsetfo waMosi+ wehluleka kususa sono senu. 40 Caphelani kutsi kunganehleli loko lokushiwo baPhrofethi, nabatsi: 41 ‘Nine tedzeleli, bukani nimangale, bese niyanyamalala, ngobe ngenta umsebenti emalangeni enu, lokungumsebenti leningeke nize niwukholwe ngisho nobe umuntfu anganichazela ngawo.’”+
42 Batsi nasebaphuma, bantfu babancenga kutsi bakhulume nabo ngaletintfo ngeliSabatha lelilandzelako. 43 Nasewuphelile umhlangano lobewusesinagogeni, emaJuda lamanyenti kanye nalabo lebebagucukele enkholweni yebuJuda futsi bakhonta Nkulunkulu, balandzela boPawula naBhanabasi, bona bakhutsata labantfu kutsi bachubeke bafanelwa ngumusa lomkhulu lovela kuNkulunkulu.+
44 NgeliSabatha lelalandzela, cishe bonkhe bantfu edolobheni babutsana kuze balalele livi laJehova.* 45 Ngesikhatsi lamanye emaJuda abona leticumbi tebantfu, aba nemona kakhulu futsi acala kuhlambalata, aphikisa loko lobekukhulunywa nguPawula.+ 46 Ngesibindzi, boPawula naBhanabasi batsi kuwo: “Bekufanele kutsi livi laNkulunkulu likhulunywe kini kucala.+ Kodvwa njengobe ningalemukeli futsi nitiveta ningulabangakufaneli kutfola kuphila lokuphakadze, sesiya kubantfu betive.+ 47 Ngobe Jehova* usiyale watsi: ‘Ngikubeke kutsi ube kukhanya kwetive, kuze uletse insindziso kuto tonkhe tincenye temhlaba.’”+
48 Ngesikhatsi bantfu betive beva loku, bajabula kakhulu, bakhatimulisa livi laJehova* futsi bonkhe lebebatimisele kutfola kuphila lokuphakadze baba ngemakholwa. 49 Ngetulu kwaloko, livi laJehova* lasakatwa kuyo yonkhe lendzawo. 50 Kodvwa emaJuda afaka umoya lomubi kubafati labakhulunyelwa kahle lebebakhonta Nkulunkulu kanye nakumadvodza lebekahola kulelidolobha, abenta baba neludlame, futsi bacala kubaphatsa kabi+ boPawula naBhanabasi, babakhiphela ngephandle kwalendzawo yabo. 51 Ngako boPawula naBhanabasi batsintsitsa lutfuli etinyaweni tabo, base baya e-Ikhoniyumi.+ 52 Bafundzi bachubeka bajabula kakhulu+ futsi bagcwala umoya longcwele.