Imisebenti Yebaphostoli
15 Lamanye emadvodza esuka eJudiya futsi acala kufundzisa bazalwane atsi: “Ngeke nisindziswe nangabe ningasokwa ngekuvumelana neMtsetfo waMosi.”+ 2 Ngesikhatsi sekube nekungevani nekuphikisana lokukhulu emkhatsini wawo naPawula naBhanabasi, kwahlelwa kutsi boPawula naBhanabasi kanye nalabanye baye kubaphostoli nasemadvodzeni lamadzala laseJerusalema+ kuze bayobuta ngalendzaba.*
3 Ngemuva kwekutsi libandla selibaphekeletele sigatjana, bachubeka neluhambo lwabo badzabula eFenisiya naseSamariya, bahamba balandzisa ngekugucuka kwebantfu betive, futsi loku bekubajabulisa bonkhe bazalwane. 4 Nabefika eJerusalema, emalunga elibandla, baphostoli kanye nalabadzala, babemukela ngemusa, bona-ke babese babachazela tonkhe tintfo Nkulunkulu lebekatentile asebentisa bona. 5 Lamanye emakholwa lebekake aba ngemalunga elicembu lebaFarisi asukuma etihlalweni tawo atsi: “Kufanele basoke futsi bayalwe kutsi bagcine uMtsetfo waMosi.”+
6 Ngako baphostoli nalabadzala bahlangana ndzawonye kuze bayihlolisise lendzaba. 7 Ngemuva kwekukhuluma kabanti ngayo,* Phetro wasukuma watsi kubo: “Bazalwane, nati kahle kutsi kusukela ekucaleni Nkulunkulu wangikhetsa emkhatsini wenu kuze bantfu betive beve tindzaba letimnandzi futsi bakholwe.+ 8 Nkulunkulu lowati loko lokusetinhlitiyweni+ wakufakazela ngekubanika umoya longcwele,+ njengobe enta nakitsi. 9 Wente kutsi kube bete umehluko kitsi nakubo,+ kodvwa uhlante tinhlitiyo tabo ngenca yekukholwa.+ 10 Pho nimvivinyelani Nkulunkulu ngekutsi netfwalise labafundzi lijoka+ tsine nabokhokho betfu lebesehluleka kuletfwala?+ 11 Kodvwa siyakholwa kutsi natsi sisindziswa njengabo ngemusa lomkhulu weNkhosi Jesu.”+
12 Nabeva loku bonkhe babindza, futsi balalela njengobe boBhanabasi naPawula balandzisa ngetibonakaliso netimangaliso letinyenti Nkulunkulu lebekatente kubantfu betive asebentisa bona. 13 Batsi nabacedza kukhuluma, Jakobe watsi: “Bazalwane, ngilaleleni. 14 Simeyoni+ sewusichazele kahle kutsi nyalo Nkulunkulu sewuyabemukela bantfu betive kuze emkhatsini wabo akhetse bantfu labatawubitwa ngelibito lakhe.+ 15 Loku kuvumelana nemavi labhalwa baPhrofethi, latsi: 16 ‘Ngemuva kwaletintfo ngitawubuya ngivuse indlu* yaDavide lewile; ngitativusetela kabusha tindzala tayo ngiphindze ngiyakhe, 17 kuze labo labasele bafunisise Jehova* bakanye nebantfu bato tonkhe tive, lokubantfu lababitwa ngelibito lami. Nguloku lokushiwo nguJehova* lowente tonkhe letintfo,+ 18 lebetatiwa kusukela kadzeni.’+ 19 Ngako ngikubona kuncono* kutsi singabahluphi bantfu betive labagucukele kuNkulunkulu,+ 20 kodvwa sibabhalele kutsi babalekele tintfo letingcoliswe titfombe,+ babalekele bugwadla,*+ netilwane leticumbelene,* kanye nengati.+ 21 Kusukela kadzeni, bantfu bebashumayela ngemavi aMosi kuwo onkhe emadolobha, futsi lamavi afundvwa njalo emasinagogeni ngeliSabatha.”+
22 Ngako baphostoli, nalabadzala kanye nalo lonkhe libandla bancuma kukhetsa emadvodza, bese bawatfuma e-Antiyokhi kanye naPawula naBhanabasi. Bakhetsa Judasi lokutsiwa nguBhasabasi kanye naSilasi,+ lobekungemadvodza laphatsiswe imisebenti leminyenti emkhatsini webazalwane. 23 Babhala incwadzi batsi:
“Baphostoli nalabadzala, lababazalwane benu, bayanibingelela nine bazalwane baletinye tive lenihlala e-Antiyokhi,+ eSiriya, naseSilisiya. 24 Njengobe sivile kutsi labanye betfu banihlupha ngetinkhulumo,+ betama nekunidukisa ngisho nobe singazange sibayale kutsi bente njalo, 25 sonkhe sivumelene ngekutsi sikhetse emadvodza, bese siwatfumela kini akanye nebazalwane betfu labatsandzekako, boBhanabasi naPawula, 26 labanikele ngekuphila kwabo ngenca yelibito leNkhosi yetfu lenguJesu Khristu.+ 27 Ngako sinitfumela Judasi naSilasi kuze banichazele tonkhe letintfo lesitibhalile.+ 28 Ngobe umoya longcwele+ usisite kutsi sifike esiphetfweni sekutsi singanengeteli lomunye umtfwalo ngaphandle kwaletintfo letibalulekile, 29 kutsi nichubeke nibalekela tintfo letinikelwe etithicweni,+ nibalekele ingati,+ netilwane leticumbelene,*+ kanye nebugwadla.*+ Nanichubeka nitibalekela letintfo nitawuphumelela. Salani kahle!”
30 Ngako batsi nasebawakhululile lamadvodza, esuka aya e-Antiyokhi futsi afike ahlanganisa ndzawonye bonkhe bafundzi, abanika lencwadzi. 31 Ngemuva kwekuyifundza, bajabula ngenca yalesikhutsato. 32 Njengobe boJudasi naSilasi bebabaphrofethi, bakhutsata bazalwane ngetinkhulumo letinyenti futsi babacinisa.+ 33 Ngemuva kwekuhlala emalangana, bazalwane babafisela luhambo loluhle nasebabuyela kulabo lebebabatfumile. 34 *—— 35 Kodvwa boPawula naBhanabasi basala e-Antiyokhi, bafundzisa futsi bamemetela tindzaba letimnandzi letimayelana nelivi laJehova* banalabanye labanyenti.
36 Ngemuva kwemalanga lambalwa, Pawula watsi kuBhanabasi: “Asiphindze* sivakashele bazalwane kuwo onkhe emadolobha lesamemetela kuwo livi laJehova,* kuze sibone kutsi banjani.”+ 37 Bhanabasi bekatimisele kuhamba naJohane, lobekutsiwa nguMakho.+ 38 Kodvwa Pawula akazange akubone kukuhle kutsi bahambe naye, ngobe bekabashiyile ePhamfiliya futsi wangachubeki nabo kulomsebenti.+ 39 Ngako bacabana kabi baze behlukana; Bhanabasi+ watsatsa Makho bahamba ngemkhumbi baya eSiphrosi. 40 Pawula wakhetsa Silasi wase uyahamba ngemuva kwekutsi bazalwane bamfisele umusa lomkhulu lovela kuJehova.*+ 41 Wahamba wadzabula iSiriya neSilisiya, acinisa emabandla.