Amose
9 Ngabona Jehova+ eme etikweli-al’thare, wase utsi: “Shaya inhloko yalensika, futsi iminyango itawunyakata. Yijube enhloko futsi mine ngitawubulala labasele bakhona ngenkemba. Kute namunye kulabo lababalekako lotawuphunyula, futsi kute ngisho namunye lowetama kubaleka lotawuphumelela.+
2 Nakwenteka bagubha phansi kuze behlela phansi eThuneni,*
Sandla sami sitawubakhipha khona lapho;
Futsi nakwenteka bakhuphukela emazulwini,
Ngitawubehlisela phansi khona lapho.
3 Nakwenteka babhaca esicongweni seKhameli,
Ngitawubatfungatsa ngize ngibatfole bese ngiyabatsatsa.+
Nakwenteka batifihla ebusweni bami ngekwehlela ekujuleni kwelwandle,
Ngitawutfumela inyoka kutsi ibalume khona lapho.
4 Nakwenteka baya ekutfunjweni babonwa titsa tabo,
Ngitawuyala inkemba khona lapho, futsi itawubabulala;+
Ngitawubaletsela inhlekelele kunekutsi ngibaletsele tibusiso.+
5 Ngobe iNkhosi Lephakeme, Jehova wemabutfo, ngiyo letsintsa lelive,*
Lize lincibilike+ futsi bonkhe labahlala kulo batawulila;+
Lonkhe litawuphakama njengeNayili,
Liphindze libohle njengeNayili yaseGibhithe.+
6 ‘Loyo lowakha titebhisi takhe emazulwini
Futsi amise takhiwo takhe etikwemhlaba;
Loyo lobita emanti aselwandle,
Kute awatsele emhlabeni,+
Libito lakhe nguJehova.’+
7 Jehova utsi: ‘Anifani yini nemadvodzana emaKushe kimi, nine bantfu baka-Israyeli?
Mine angizange yini ngikhiphe ema-Israyeli eveni laseGibhithe,+
Ngikhiphe emaFilisti eveni lemaKhrethe+ kanye nemaSiriya eveni laseKhiri?’+
8 ‘Emehlo eNkhosi Lephakeme Jehova abuke umbuso lowonako,
Futsi yena utawucotfula lowo mbuso ebusweni bemhlaba.+
Kodvwa angeke ngiyicotfule ngalokuphelele indlu yaJakobe,’+ kusho Jehova.
9 ‘Ngobe mine nginiketa umyalo,
Futsi ngitawunyakatisa indlu yaka-Israyeli emkhatsini wato tonkhe tive,+
Njengemuntfu nakanyakatisa sisefo,
Futsi kute litje lelitawuwela emhlabatsini.
10 Tonkhe toni letisemkhatsini webantfu bami, titawubulawa ngenkemba,
Leto letitsi: “Inhlekelele angeke isondzele kitsi nobe isifikele.”’
11 ‘Ngalelolanga, ngitawuvusa indlu* yaDavide+ lewile,
Ngivale tikhala telubondza,
Ngiphindze ngivusetele kabusha tindzala;
Ngitawuyakha kabusha njengasemalangeni akadzeni,+
12 Kuze batitsatsele loko lokusele kwaka-Edomu,+
Nekwato tonkhe tive lapho libito lami libitwa khona,’ kusho Jehova loyo lowenta loko.
13 Jehova utsi: ‘Emalanga ayeta,
Lapho umlimi atawengcelela lovunako,
Nemhluti wemagilebisi engcelele loyo lophetse inhlanyelo;+
Futsi tintsaba titawumfimfa liwayini lelimnandzi,+
14 Ngitawubutsisa ndzawonye labo labatfunjiwe bebantfu bami ema-Israyeli,+
Futsi batawakha kabusha emadolobha langasahlali muntfu bese bahlala kuwo;+
Batawuhlanyela emasimu emagilebisi, banatse liwayini lawo,+
Bahlanyele netingadze, futsi badle titselo tato.’+
15 ‘Ngitabahlanyela eveni labo,
Angeke baphindze basishulwe
Eveni labo lengabanika lona,’+ kusho Jehova Nkulunkulu wenu.”