Incwadzi Yekucala YaSamuweli

15 Ngako Samuweli watsi kuSawula: “Jehova wangitfuma kutsi ngikugcobe ube yinkhosi yebantfu bakhe ema-Israyeli.+ Asewulalele loko Jehova lakushoko.+ 2 Nguloku lokushiwo nguJehova wemabutfo: ‘Ngitakwenta sive sema-Amaleki siphendvule ngaloko lesakwenta kuma-Israyeli ngesikhatsi simelana nawo nakasendleleni lesuka eGibhithe.+ 3 Nyalo hamba uyobulala ema-Amaleki+ futsi uwabhubhise+ kanye nako konkhe lanako. Kufanele ungawayekeli* kodvwa uwabulale,+ ubulale emadvodza nebafati, bantfwana netinswane, tinkhomo netimvu, emakamela kanye netimbongolo.’”+ 4 Sawula wabita bantfu wase uyababala eThelayimu: Bekunemasotja lahamba ngetinyawo langu-200 000 kanye nemadvodza akaJuda langu-10 000.+

5 Sawula wahamba waze wayofika edolobheni lema-Amaleki wafike wabhaca nelibutfo lakhe ngasesihosheni. 6 Wabese utsi kumaKheni:+ “Hambani, nisuke kuma-Amaleki kuze nginganibhubhisi kanye nawo,+ ngobe nine nakhombisa lutsandvo lolucotfo kubo bonkhe bantfu baka-Israyeli+ ngesikhatsi baphuma eGibhithe.” Ngako emaKheni esuka kuma-Amaleki. 7 Ngemuva kwaloko Sawula wabulala ema-Amaleki+ kusukela eHavila+ kuze kuyofika eShuri+ leseceleni kweGibhithe. 8 Wabamba Agagi+ inkhosi yema-Amaleki asaphila, kodvwa bonkhe lalabanye bantfu wababhubhisa ngenkemba.+ 9 Nanobe kunjalo, Sawula nalabantfu abambulalanga* Agagi, netimvu netimbuti kanye netinkhomo letiphilile, netilwane letinonile, netimvu letindvuna, nako konkhe lokuhle.+ Bebangafuni kukubhubhisa. Kodvwa tonkhe tintfo letingenamsebenti naletingakadzingeki batibhubhisa.

10 Ngemuva kwaloko Jehova watsi kuSamuweli: 11 “Ngiyatisola* ngekubeka Sawula kutsi abe yinkhosi ngobe sewuyekele kungilandzela, wangawalaleli nemavi ami.”+ Samuweli weva buhlungu kakhulu, futsi wakhala kuJehova busuku bonkhe.+ 12 Ngesikhatsi Samuweli avuka ekuseni ngeluvivi kuze ahlangane naSawula, bambikela batsi: “Sawula uhambile waya eKhameli+ wafike lapho watimisela litje lesikhumbuto.+ Ngemuva kwaloko ubese uyajika wewukela eGilgali.” 13 Samuweli watsi nasekafikile kuye, Sawula watsi: “Shengatsi Jehova angakubusisa. Ngikwentile loko Jehova lakushito.” 14 Kodvwa Samuweli watsi: “Wani-ke lomsindvo wemhlambi wetimvu netimbuti lengiwuva ngetindlebe tami nalomsindvo wetinkhomo lengiwuvako?”+ 15 Sawula wamphendvula watsi: “Titsetfwe kuma-Amaleki ngobe labantfu abakatibulali* timvu netimbuti kanye netinkhomo letiphilile kuze kwentiwe umhlatjelo kuJehova Nkulunkulu wakho; kodvwa lokusele lapho sikubhubhisile.” 16 Samuweli wabese utsi kuSawula: “Bindza! Asengikutjele loko Jehova langitjele kona itolo ebusuku.”+ Yena wamphendvula watsi: “Khuluma!”

17 Samuweli wachubeka watsi: “Akusuwe yini lobewutibona ungakabaluleki+ ngesikhatsi wentiwa inhloko yetive taka-Israyeli nangesikhatsi Jehova akubeka kutsi ube yinkhosi yesive saka-Israyeli?+ 18 Ngekuhamba kwesikhatsi Jehova wakutfuma, watsi: ‘Hamba, ubhubhise onkhe ema-Amaleki latoni.+ Ubokulwa nawo uze uwacotfule onkhe.’+ 19 Ngako yini lekwente wangalilaleli livi laJehova? Kunekutsi wente njalo, uphutfume watitsatsela tintfo ngebugovu+ futsi wenta intfo lembi emehlweni aJehova!”

20 Nobe kunjalo, Sawula waphendvula Samuweli watsi: “Kepha ngililalele livi laJehova. Ngiyile lapho Jehova abengitfume khona futsi ngibuye na-Agagi inkhosi yema-Amaleki, ngaphindze ngabhubhisa nema-Amaleki.+ 21 Kodvwa labantfu batitsatsele timvu netinkhomo, lokungulokuncono kakhulu kuloko lebekunikelwe ekubhujisweni kuze bentele Jehova Nkulunkulu wakho umnikelo eGilgali.”+

22 Samuweli wase utsi: “Jehova ujatjuliswa yiminikelo yekushiswa kanye nemihlatjelo+ yini kunekutsi kulalelwe livi laJehova? Lalela! Kulalela kuncono kunemhlatjelo+ futsi kunakisisa kuncono kunemanoni+ etimvu letindvuna; 23 ngobe kuvukela+ kuyafana nesono sekuphengula,+ nekugabadzela kuyafanana nekwenta imilingo nekukhonta tithico.* Ngesizatfu sekutsi awukalilaleli livi laJehova,+ naye ukwalile kutsi ube yinkhosi.”+

24 Sawula wase utsi kuSamuweli: “Ngonile, ngeca umtsetfo waJehova nemavi akho ngobe ngesabe labantfu futsi ngalalela loko labakushito. 25 Ngicela ungicolele esonweni lengisentile, ubuyele nami emuva kuze ngikhotsame kuJehova.”+ 26 Kodvwa Samuweli watsi kuSawula: “Angeke ngijike nawe ngobe awukalilaleli livi laJehova, naJehova ukwalile kutsi uchubeke uyinkhosi yaka-Israyeli.”+ 27 Ngesikhatsi Samuweli agucuka kute ahambe, Sawula wabamba umphetfo welijazi laSamuweli lelite imikhono futsi ladzabuka. 28 Ngenca yaloku, Samuweli watsi kuSawula: “Njengobe lelijazi lidzabukile, naJehova ubutsetse bukhosi baka-Israyeli kuwe lamuhla futsi sewutabunika umuntfu wakini loncono kunawe.+ 29 Ngetulu kwaloko, Nkulunkulu Lohloniphekile waka-Israyeli+ angeke acambe emanga+ nobe ashintje ingcondvo yakhe* ngobe akafanani nemuntfu kutsi angashintja ingcondvo.”*+

30 Kuloko, Sawula watsi: “Ngonile. Kodvwa ngicela ungihloniphe embikwemadvodza lamadzala ebantfu bakitsi nakuwo onkhe ema-Israyeli. Jika nami futsi ngitawukhotsama kuJehova Nkulunkulu wakho.”+ 31 Ngako Samuweli wahamba naSawula, futsi Sawula wakhotsamela Jehova. 32 Samuweli wabese utsi: “Letsa Agagi inkhosi yema-Amaleki lapha kimi.” Ngako Agagi wahamba waya kuSamuweli ahudvula tinyawo* ngobe bekasolo atsi: ‘Noma kanjani angeke ngisafa.’ 33 Nobe kunjalo, Samuweli watsi: “Njengobe inkemba yakho ibulele bantfwana bebafati, ngako namake wakho utawufelwa bantfwana njengalabanye bafati.” Ngaleso sikhatsi Samuweli wabulala Agagi wamcoba waba ticucu embikwaJehova eGilgali.+

34 Samuweli wahamba waya eRama kantsi Sawula wahamba waya endlini yakhe leseGibeya, lokulidolobha lakubo. 35 Samuweli akazange aphindze ambone Sawula kwaze kwafika lilanga lafa ngalo, ngobe Samuweli weva buhlungu kakhulu ngaSawula.+ Jehova watisola ngekubeka Sawula kutsi abe yinkhosi yaka-Israyeli.+