Imisebenti Yebaphostoli
10 EKhesariya, bekunendvodza lebekutsiwa nguKhoneliyuse, futsi beyiyindvuna* yelibutfo laseTaliyane.* 2 Lendvodza beyikholwa, yona kanye nayo yonkhe indlu yayo, imesaba Nkulunkulu, ipha labanye bantfu tipho letinyenti, futsi incusa njalo kuNkulunkulu. 3 Kwatsi nasekusondzela insimbi yesitsatfu ntsambama,*+ yabona kuta ingilosi yaNkulunkulu embonweni, yafike yatsi: “Khoneliyuse!” 4 Khoneliyuse wayibuka amangele, watsi: “Utsini Nkhosi?” Yona yatsi: “Nkulunkulu uyivile imithantazo yakho, watibona netipho lebewutipha labanye.+ 5 Ngako tfuma emadvodza kutsi aye eJopha ayolandza Simoni lokutsiwa nguPhetro, 6 lovakashe endlini yaSimoni umshuki wetikhumba, lohlala ngaselwandle.” 7 Yatsi nje nayihamba lengilosi, Khoneliyuse wabita tinceku takhe letimbili kanye nelisotja lelesaba Nkulunkulu lebelisisebenti sakhe, 8 wabachazela konkhe wase ubatfuma eJopha.
9 Ngakusasa basachubeka neluhambo lwabo, sebatawufika edolobheni, futsi sekusondzela insimbi yelishumi nakubili emini,* Phetro wakhuphukela etikwendlu kuze ayothantaza. 10 Kodvwa besekalambe kakhulu asafuna kudla. Njengobe basakulungisa, wabona umbono,+ 11 lizulu belivulekile futsi bekwehla lokutsite* kunjengendvwangu lenkhulu yelineni, kwehliselwa emhlabeni ngemakona ako lamane; 12 bekunato tonkhe tinhlobo tetilwane letinetinyawo letine, netilwane letihumako kanye netinyoni. 13 Kwase kuvakala livi litsi: “Phetro, sukuma uhlabe futsi udle!” 14 Kodvwa Phetro watsi: “Cha Nkhosi, angizange sengiyidle intfo lengcolile nobe lengakahlanteki.”+ 15 Lelivi lakhuluma naye kwesibili latsi: “Loko Nkulunkulu lakuhlantile ungakubiti ngekutsi kungcolile.” 16 Laphindze levakala kwesitsatfu, futsi masinyane loko* Phetro lakubona kwenyuselwa ezulwini.
17 Ngesikhatsi Phetro asedidekile kutsi lombono lebekawubonile usho kutsini, lamadvodza lebekatfunywe nguKhoneliyuse abuta bantfu kutsi ikuphi indlu yaSimoni, futsi ema esangweni.+ 18 Amemeta, abuta kutsi ngukhona yini lakuvakashe khona Simoni lokutsiwa nguPhetro. 19 Ngesikhatsi Phetro asacabanga ngalombono, umoya waNkulunkulu+ watsi: “Kunemadvodza lamatsatfu lakufunako. 20 Ngako sukuma, futsi wehle uhambe nawo. Ungangabati ngobe atfunywe ngimi.” 21 Phetro wehla waya kulamadvodza, wafike watsi: “Ngimi lona lenimfunako. Nibekwa yini lapha?” 22 Wona atsi: “Khoneliyuse+ indvuna yelibutfo, loyindvodza lelungile, leyesaba Nkulunkulu, futsi lekhulunyelwa kahle ngiso sonkhe sive semaJuda, utfole umlayeto lovela kuNkulunkulu ngengilosi lengcwele kutsi akulandze ute endlini yakhe kuze eve loko lotakusho.” 23 Ngako wawemukela, wawangenisa endlini.
Ngakusasa wavuka wahamba nawo, nalabanye bazalwane baseJopha bahamba naye. 24 Ngelilanga lelilandzelako, wefika eKhesariya. Khoneliyuse bekabalindzile, futsi bekabite tihlobo takhe nebangani bakhe labakhulu. 25 Ngesikhatsi Phetro angena, Khoneliyuse wamhlangabeta waguca embikwakhe, wamkhotsamela. 26 Kodvwa Phetro wamphakamisa, watsi kuye: “Sukuma, ngobe nami ngingumuntfu nje.”+ 27 Njengobe bekakhuluma naye, wangena ngekhatsi wakhandza bantfu labanyenti bahlangene. 28 Watsi kubo: “Nati kahle kutsi umJuda akakavumeleki kutsi atihlanganise nemuntfu wakulesinye sive nobe aye kuye,+ kodvwa Nkulunkulu ungikhombisile kutsi akukafaneli ngitsi umuntfu ungcolile nobe akakahlanteki.+ 29 Ngako ngitsite nangibitwa ngavele ngeta, ngangabe ngisangabata. Ngicela ningitjele kutsi ningibiteleni.”
30 Khoneliyuse watsi: “Emalangeni lamane lendlulile, ngesikhatsi ngithantaza endlini yami ngato letikhatsi, sekusondzela insimbi yesitsatfu ntsambama,* kufike indvodza lebeyigcoke tingubo letimhlophe yema embikwami, 31 yatsi: ‘Khoneliyuse, Nkulunkulu uwuvile umthantazo wakho, watikhumbula netipho lebewutipha labanye. 32 Ngako tfuma bantfu kutsi baye eJopha bayolandza Simoni lokutsiwa nguPhetro, lovakashe endlini yaSimoni umshuki wetikhumba, lohlala ngaselwandle.’+ 33 Ngivele ngatfumela bantfu kutsi bakulandze, futsi wena uvumile kuta. Nyalo sonkhe silapha embikwaNkulunkulu, kuze silalele tonkhe tintfo Jehova* latsite usitjele tona.”
34 Nakeva loku, Phetro wakhuluma watsi: “Nyalo sengiyacondza kutsi Nkulunkulu akakhetsi,+ 35 kodvwa wonkhe umuntfu lomesabako nalowenta lokulungile uyemukeleka kuye ngisho nobe asive sini.+ 36 Watfumela umlayeto emadvodzaneni aka-Israyeli kuze amemetele kuwo tindzaba letimnandzi tekuthula+ ngaJesu Khristu loyiNkhosi yabo bonkhe.+ 37 Nani niyayati lendzaba lokwakhulunywa ngayo kulo lonkhe laseJudiya, kusukela eGalile+ ngemuva kwekutsi Johane ashumayele ngelubhabhatiso. 38 Lendzaba beyimayelana naJesu waseNazaretha, kutsi Nkulunkulu wamgcoba ngemoya longcwele,+ wamnika nemandla, futsi wahamba kuto tonkhe tindzawo enta lokulungile, aphilisa bonkhe lebebacindzetelwe nguDeveli,+ ngenca yekutsi Nkulunkulu bekanaye.+ 39 Tsine sibofakazi bato tonkhe tintfo latenta eveni lemaJuda naseJerusalema; kodvwa bantfu bambulala ngekumlengisa elugodvweni.* 40 Nkulunkulu wamvusa ngelilanga lesitsatfu+ futsi wamenta wabonakala, 41 hhayi kubo bonkhe bantfu, kodvwa kubofakazi labakhetfwa nguNkulunkulu ekucaleni, lokungitsi tsine lesadla saphindze sanatsa naye ngemuva kwekuvuswa kwakhe ekufeni.+ 42 Wasitfuma nekutsi sishumayele kubantfu, siphindze sifakaze ngalokuphelele+ ngekutsi yena unguloyo lobekwe nguNkulunkulu kutsi ehlulele labaphilako nalabafile.+ 43 Bonkhe baphrofethi bafakaza ngaye,+ batsi wonkhe umuntfu lokholwa nguye utawutsetselelwa tono ngelibito lakhe.”+
44 Ngesikhatsi Phetro akhuluma, umoya longcwele wehlela kubo bonkhe lebebalalele livi laNkulunkulu.+ 45 Emakholwa* lasokile lebekahamba naPhetro amangala ngenca yekutsi sipho lesingumoya longcwele besesitfululelwa nakubantfu betive. 46 Babeva bakhuluma letinye tilwimi* futsi badvumisa Nkulunkulu.+ Ngako Phetro watsi: 47 “Njengobe labantfu sebemukele umoya longcwele njengatsi, ngubani longabavimba kutsi babhajatiswe+ ngemanti?” 48 Ngako wabatjela kutsi ababhajatiswe egameni laJesu Khristu.+ Labantfu babese bamcela kutsi ahlale nabo emalangana.