Incwadzi Yekucala YeTikhronike
23 Ngesikhatsi Davide sekakhulile futsi sekatawufa,* wabeka indvodzana yakhe Solomoni yaba yinkhosi yaka-Israyeli.+ 2 Ngemuva kwaloko, wabita tonkhe tindvuna taka-Israyeli, baphristi+ kanye nemaLevi.+ 3 EmaLevi lebekaneminyaka lengu-30 kuya etulu abalwa+ futsi nasekaphelele, nakubalwa umuntfu nemuntfu, bekangu-38 000. 4 KulamaLevi, langu-24 000 awo bekaphetse labasebenta endlini yaJehova, bekunetindvuna nebehluleli labangu-6 000,+ 5 bekuna-4 000 wabogadzi bemagede+ futsi emaLevi langu-4 000 bekadvumisa+ Jehova ngetinsimbi temculo, Davide latsi ngato, “ngatentela kutsi kudvunyiswe ngato.”
6 Davide wabese uyawahlela* aba ngemacembu+ kuye ngekutsi avela kubani kulamadvodzana aLevi boGeshoni, Khohati naMerari.+ 7 Kulabavela kuGeshoni bekunguLadani naShimeyi. 8 Emadvodzana aLadani bekamatsatfu, bekunguJehiyeli inhloko, naZethami kanye naJoweli.+ 9 Emadvodzana aShimeyi bekamatsatfu, kuboShelomothi, Haziyeli naHarani. Laba bebatinhloko temindeni yaLadani. 10 Emadvodzana aShimeyi bekuboJahathi, Zina, Jewushe naBheriya. Laba bobane bebangemadvodzana aShimeyi. 11 Jahathi bekayinhloko bese kutsi Ziza uba wesibili. Njengobe boJewushe naBheriya bebete emadvodzana lamanyenti, babalwa baba ngumndeni munye futsi benta umsebenti munye.
12 Emadvodzana aKhohati bekamane, kubo-Amramu, Jisihari,+ Hebroni na-Uziyeli.+ 13 Emadvodzana a-Amramu bekubo-Aroni+ naMosi.+ Kodvwa Aroni wahlukaniselwa+ umsebenti wekungcwelisa iNgcwelengcwele. Yena kanye nemadvodzana akhe bebanikela imihlatjelo kuJehova, bente imisebenti yaNkulunkulu baphindze bamemetele tibusiso njalo, egameni lakhe.+ 14 Emadvodzana aMosi, inceku yaNkulunkulu weliciniso, abalelwa esiveni semaLevi. 15 Emadvodzana aMosi bekuboGeshomu+ na-Eliyezeri.+ 16 Emadvodzaneni aGeshomu, Shubayeli+ bekayinhloko. 17 Entalelwaneni* ya-Eliyezeri, Rehabiya+ bekayinhloko; Eliyezeri bekete lamanye emadvodzana kodvwa emadvodzana aRehabiya bekamanyenti. 18 Emadvodzaneni aJisihari,+ Shelomithi+ bekayinhloko. 19 Emadvodzana aHebroni, bekunguJeriya inhloko, Amariya awesibili, Jahaziyeli awesitsatfu, kantsi Jekameyamu+ abewesine. 20 Emadvodzana a-Uziyeli+ bekunguMikha inhloko, Jishiya awesibili.
21 Emadvodzana aMerari bekuboMahali naMushi.+ Emadvodzana aMahali bekubo-Eliyezeri naKhishi. 22 Eliyezeri wafa ete emadvodzana kodvwa bekanemadvodzakati kuphela. Emadvodzana aKhishi labekatihlobo* tawo, awatsatsa awenta bafati. 23 Emadvodzana aMushi bekamatsatfu, kuboMahali, Ederi naJeremothi.
24 Lawa bekungemadvodzana aLevi ngemindeni yawo, bekatinhloko temindeni, alawo labhaliswa ase ayabalwa aphindze abhalwa ngemagama awo, futsi bekenta umsebenti endlini yaJehova, kusukela kulaneminyaka lengu-20 budzala kuya etulu. 25 Davide bekatsite: “Jehova Nkulunkulu wema-Israyeli ubangele bantfu bakhe kutsi batfole kuphumula,+ futsi utawuhlala eJerusalema kuze kube phakadze.+ 26 Ngetulu kwaloko, emaLevi angeke kudzingeke etfwale lithende lekukhontela nobe tintfo letisetjentiswa kulo.”+ 27 Emiyalweni yekugcina leyakhishwa nguDavide, lomunye bewukutsi akubalwe emaLevi laneminyaka lengu-20 budzala kuya etulu. 28 Umsebenti wawo bekukusita emadvodzana a-Aroni+ emsebentini wendlu yaJehova, kunaka emabala,+ tindlu tekudlela, kuhlanta tonkhe tintfo letingcwele kanye nekwenta nome ngabe ngumiphi imisebenti lebeyidzinga kwentiwa endlini yaNkulunkulu weliciniso. 29 Bekasita ekulungisweni kwetinkhwa letititaki,*+ fulaha locolisakele wemnikelo walokutinhlavu, emacebelengwane esinkhwa lesite imvubelo,+ emacebelengwane, inhlama,+ aphindze asite nasekukaleni bunyenti nebukhulu betintfo. 30 Bekaba lapho njalo ekuseni+ kuze abonge aphindze advumise Jehova futsi bekenta njalo nakusihlwa.+ 31 Bekasita nome nini nakwentelwa Jehova imihlatjelo yekushiswa ngemaSabatha,+ ngekwetfwasa kwenyanga,+ nangetikhatsi temikhosi,+ ngekuvumelana nenombolo yawo lebeyisemtsetfweni, enta loko njalo emehlweni aJehova. 32 Bekaphindze ente imisebenti lebekanikwe yona ethendeni lekuhlangana, endzaweni lengcwele, entele nabomnakabo lokungemadvodzana a-Aroni kuze kwentiwe imisebenti yendlu yaJehova.