Incwadzi Yesibili YaSamuweli
15 Ngemuva kwato tonkhe letintfo, Absalomu watitfolela inkalishi, emahhashi kanye nemadvodza langu-50 kutsi agijime embikwakhe.+ 2 Absalomu abevuka ekuseni eme eceleni kwemgcwaco loya egedeni lelidolobha.+ Noma nini lapho umuntfu lotsite anendzaba lobekufanele ayoyetfula enkhosini iyoyehlulela,+ Absalomu abembita atsi kuye: “Uwakuliphi lidolobha?” Lomuntfu abephendvula atsi: “Inceku yakho ivela kulesinye setive taka-Israyeli.” 3 Absalomu bekabese utsi kuye: “Kona indzaba yakho iyevakala futsi kukahle kuyibika, kodvwa kute losebentisana nenkhosi longakhuluma naye.” 4 Absalomu bekabese utsi: “Kube mane ngimi lobekwe waba lijaji kulelive, bekungatsi noma ngabe ngubani lonendzaba nobe licala lelidzinga kwehlulelwa ete kimi, futsi indzaba yakhe ngiyisebente kahle.”
5 Nangabe kusondzela umuntfu afike aguce embikwakhe, Absalomu abelula sandla sakhe ambambe, bese uyamcabuza.+ 6 Loku bekakwenta kuwo onkhe ema-Israyeli lebeketa enkhosini kute ikhulume tindzaba tawo; ngaleyo ndlela bekachubeka eba tinhlitiyo tebantfu baka-Israyeli.+
7 Ekupheleni kweminyaka lemine,* Absalomu watsi enkhosini: “Ngicela kuhamba ngiye eHebroni+ ngiyokwenta loko lengafunga kuJehova kutsi ngitakwenta. 8 Ngobe ngesikhatsi inceku yakho ihlala eGeshuri+ leseSiriya yenta sifungo lesikhetsekile+ lesitsi: ‘Nangabe Jehova angangibuyisela eJerusalema, Jehova ngitamentela umnikelo.’”* 9 Inkhosi yatsi kuye: “Hamba ngekuthula.” Nakeva loko, wasukuma waya eHebroni.
10 Absalomu wabese utfumela tinhloli kuto tonkhe tive taka-Israyeli, watsi: “Ngekushesha nje naniva umsindvo weluphondvo, nibomemeta nitsi, ‘Absalomu sewuyinkhosi eHebroni!’”+ 11 Bekunemadvodza langu-200 lavela eJerusalema labekahambe na-Absalomu; bekamenyiwe futsi bekangasoli lutfo, angati nekutsi kwentekani. 12 Ngetulu kwaloko, ngesikhatsi Absalomu enta umhlatjelo watsi akuyobitwa Ahithofeli+ umeluleki waDavide,+ wasedolobheni laseGilo.+ Lelicebo lekuvukela lachubeka likhula futsi bantfu lebebangaku-Absalomu, nabo bebandza.+
13 Ngekuhamba kwesikhatsi kwefika lomunye umuntfu kuDavide watsi: “Bantfu baka-Israyeli sebasekela Absalomu.” 14 Davide wavele watjela tonkhe tinceku takhe lebekanato eJerusalema watsi: “Sukumani sibaleke+ ngobe kute kitsi lotawukhona kuphunyuka ku-Absalomu! Sheshisani ngobe kungenteka asikhandze bese uletsa inhlekelele kitsi entiwa kwesaba futsi ahlasele lonkhe lelidolobha ngenkemba!”+ 15 Tinceku tenkhosi tayiphendvula tatsi: “Nome yini inkhosi yetfu lekuncumile, tinceku tayo tikulungele kuyenta.”+ 16 Ngako inkhosi yaphuma ilandzelwa ngumndeni wayo wonkhe, kodvwa yashiya emaphovela+ ayo langu-10 kuze anakekele indlu.* 17 Inkhosi yachubeka neluhambo lwayo ilandzelwa ngibo bonkhe bantfu, bafike bema eBhethi-merihakhi.
18 Tonkhe tinceku tayo lebetihamba nayo* kanye nawo onkhe emaKherethi nemaPhelethi*+ nemaGathi,+ lokungemadvodza aseGathi+ langu-600 labesolo ayilandzela, endlula embikwenkhosi kuze iwabone.* 19 Inkhosi yabese itsi ku-Ithayi+ umGathi: “Uhambelani natsi? Buyela emuva uyohlala nenkhosi lensha, ngoba usihambi futsi watfunjwa endzaweni yakini. 20 Ufike itolo loku, lamuhla kufanele ngikwente uzulazule natsi yini ngibe kwanami ngingati kutsi ngiyaphi? Jika utsatse bomnakenu futsi shengatsi Jehova angakwentela umusa, etsembeke kuwe!”+ 21 Kodvwa Ithayi waphendvula inkhosi watsi: “Ngifunga kuphila kwaJehova nekuphila kwenkhosi yami ngitsi nobe ngabe ngukuphi lapho inkhosi iya khona, nobe kusho kufa nobe kuphila, ngulapho nenceku yakho iya khona!”+ 22 Davide wase utsi ku-Ithayi:+ “Hamba wewelele ngesheya.” Ngako Ithayi umGathi wewela kanye nabo bonkhe bantfu labehamba nabo nebantfwana.
23 Bonkhe bantfu eveni bebakhala kakhulu njengoba labantfu bewela, inkhosi yona beyime eceleni kweSihosha saseKhidroni;+ bonkhe labantfu bebawelela ngesheya emgwacweni loya ehlane. 24 Sadoki+ naye bekakhona akanye nawo onkhe emaLevi+ labekatfwele libhokisi+ lesivumelwane saNkulunkulu weliciniso+ futsi alibeka phansi leLibhokisi laNkulunkulu weliciniso; Abiyatha+ naye wakhuphuka ngesikhatsi bonkhe bantfu sebewelele ngesheya besuka kulelidolobha. 25 Kodvwa inkhosi yatsi kuSadoki: “Buyisela Libhokisi laNkulunkulu weliciniso edolobheni.+ Nangingatfola umusa emehlweni aJehova, utangibuyisela emuva kuze ngiphindze ngilibone lelibhokisi kanye nendzawo yalo.+ 26 Kodvwa nangabe atawutsi, ‘Angijabuli ngawe,’ akente noma ngabe yini kimi layibona iyinhle emehlweni akhe.” 27 Inkhosi yatsi kuSadoki umphristi: “Wena awusiye yini umboni wemibono?+ Buyelani edolobheni ngekuthula futsi nitsatse emadvodzana enu lamabili nihambe nawo, indvodzana yakho Ahimasi naJonathani+ indvodzana ya-Abiyatha. 28 Ngitawulindza eceleni kwematibuko asehlane ngize ngitfole livi lelivela kuwe.”+ 29 Ngako Sadoki na-Abiyatha batsatsa leLibhokisi laNkulunkulu weliciniso balibuyisela eJerusalema bafike bahlala khona lapho.
30 Davide abekhala njengobe akhuphuka iNtsaba* Yemincumo;+ abembonye inhloko futsi abengakafaki lutfo etinyaweni. Bonkhe bantfu lebekahamba nabo, bebatimbonyile futsi nabo bebakhala njengobe bakhuphuka. 31 Davide wase utjelwa umlayeto lotsi: “Ahithofeli usekhatsi kulabo labana-Absalomu+ labakha licebo+ lekuvukela.” Nakeva loko, Davide watsi: “Awu Jehova,+ ngicela wente leseluleko sa-Ahithofeli sibe bulima!”+
32 Ngesikhatsi Davide efika esicongweni salentsaba, lapho bantfu bebavamise kukhotsama khona kuNkulunkulu, Hushayi+ um-Akhi+ bekalapho kute atohlangana naDavide. Sembatfo saHushayi besidzabukile futsi inhloko yakhe beyingcolile. 33 Kodvwa Davide watsi kuye: “Nawewela nami utawuba ngumtfwalo kimi. 34 Kantsi nawutawubuyela edolobheni ufike utsi ku-Absalomu, ‘Ngiyinceku yakho Nkhosi. Ngacale ngaba yinceku yababe wakho kodvwa nyalo sengiyinceku yakho,’+ ungangisita ngekutsi usente singaphumeleli leseluleko sa-Ahithofeli.+ 35 BoSadoki na-Abiyatha babaphristi labakanye nawe futsi kufanele ubatjele konkhe lotakuva endlini yenkhosi.+ 36 Ngicela ulalele-la, bona kanye nemadvodzana abo, bo-Ahimasi+ indvodzana yaSadoki naJonathani+ indvodzana ya-Abiyatha, nabo balapho futsi ngicela ubaphatsise umlayeto ngako konkhe lotakuva.” 37 Ngako Hushayi, umngani*+ waDavide, waya edolobheni ngesikhatsi Absalomu angena eJerusalema.