Incwadzi Yesibili YaSamuweli
11 Kwatsi nakucala umnyaka,* ngesikhatsi emakhosi ayokulwa timphi, Davide watfumela Jowabe netinceku takhe kanye nalo lonkhe libutfo laka-Israyeli kutsi bayohlasela ema-Amoni, futsi bavimbetela iRabha.+ Ngaleso sikhatsi Davide bekasele eJerusalema.+
2 Ngalelinye lilanga sekuhwalele* Davide wavuka embhedzeni wakhe futsi wahambahamba etulu eluphahleni lwendlu yenkhosi.* Nakaselapho, wabona umfati ageza futsi lomfati bekamuhle kakhulu. 3 Davide watfumela umuntfu kutsi ayobuta mayelana nalomfati, lomuntfu wabuya watsi: “Akusiye yini Bhatisheba+ lona, indvodzakati ya-Eliyamu+ umfati wa-Uriya+ umHethi?”+ 4 Davide wabese utfumela titfunywa kutsi tiyomlandza.+ Ngako weta kuye futsi Davide walala naye.+ (Loku kwenteka ngesikhatsi lomfati atihlambulula ekungcoleni kwakhe.*)+ Ngemuva kwaloko, lomfati wabuyela emuva endlini yakhe.
5 Lomfati wakhulelwa futsi watfumela livi kuDavide watsi: “Sengitetfwele.” 6 Nakeva loko Davide watfumela livi kuJowabe watsi: “Tjela Uriya umHethi kutsi ete lakimi.” Ngako Jowabe watjela Uriya kutsi aye kuDavide. 7 Ngesikhatsi Uriya efika, Davide wambuta kutsi uchuba njani Jowabe nemasotja, nekutsi kuhamba njani emphini. 8 Davide wase utsi ku-Uriya: “Hamba uye endlini yakho uyophumula.”* Uriya watsi nakesuka enkhosini, inkhosi yamtfumelela sipho. 9 Kodvwa Uriya walala esangweni lendlu yenkhosi kanye nato tonkhe tinceku tenkhosi yakhe futsi akazange aye endlini yakhe. 10 Ngako bamtjela Davide kutsi Uriya akakayi endlini yakhe. Davide wabese utsi ku-Uriya: “Angitsi bewuhambile? Awukayi ngani-ke endlini yakho?” 11 Uriya waphendvula Davide watsi: “Ema-Israyeli nemaJuda ahleti emathendeni kanye neLibhokisi+ LaNkulunkulu futsi inkhosi yami Jowabe kanye netinceku tenkhosi yami bamise emathende esigangeni. Manje kufanele yini mine ngiye endlini yami ngiyodla nginatse bese ngilala nemfati wami?+ Ngifunga kuphila kwakho* kutsi ngeke ngikwente loko!”
12 Davide wabese utsi ku-Uriya: “Ungahambi nalamuhla, ngitakukhulula kusasa.” Ngako Uriya wahlala eJerusalema ngalelolanga nangelilanga lelilandzelako. 13 Davide wambita kutsi ete atokudla aphindze anatse naye, futsi wamnatsisa waze wadzakwa. Kodvwa nasekuhwalele Uriya wahamba wayolala kanye netinceku tenkhosi yakhe, akazange aye endlini yakhe. 14 Ekuseni Davide wabhalela Jowabe incwadzi wayiphatsisa Uriya. 15 Kulencwadzi, Davide wabhala watsi: “Uriya ubombeka phambili lapho imphi ishisa khona bese wena uyadeda kute bamgwaze afe.”+
16 Jowabe abebuke lelidolobha ngekucophelela, futsi wabeka Uriya lapho bekati khona kutsi kunemasotja langemachawe. 17 Kwatsi lapho emadvodza alelidolobha aphuma alwa naJowabe, letinye tinceku taDavide tabulawa, na-Uriya umHethi wafa kanye nato.+ 18 Jowabe wabese ubikela Davide ngako konkhe lokwentekile emphini. 19 Watjela sitfunywa watsi: “Nawucedza kukhuluma nenkhosi mayelana naletindzaba temphi, 20 inkhosi kungenteka itfukutsele futsi itsi kuwe: ‘Yini lenente nasondzela kangaka kulelidolobha nanilwa? Beningati yini kutsi batanidubula basetulu elubondzeni? 21 Ngubani lowabulala Abimeleki+ indvodzana yaJerubheshethi?+ Bekungasuye yini umuntfu lomsikati lowamjikijela ngelitje lekusila eme etulu elubondzeni futsi wambulala eThebesi? Nisondzeleleni kakhulu elubondzeni?’ Ubobese utsi: ‘Inceku yakho Uriya umHethi nayo ifile.’”
22 Ngako lesitfunywa sahamba safike satjela Davide konkhe loko Jowabe bekasitfume kona. 23 Lesitfunywa satsi kuDavide: “Emadvodza akhona asehlulile futsi aphumile salwa endzaweni yekulwa kodvwa siwacoshile abalekela esangweni lelidolobha. 24 Emasotja lebekadubula ngebutjoki, adubule tinceku takho eme etikwelubondza, futsi letinye tato tifile. Inceku yakho Uriya umHethi, nayo ifile.”+ 25 Nakeva loko Davide watsi kulesitfunywa: “Ubotsi kuJowabe, ‘Ingakukhatsati lentfo leyentekile, ngobe inkemba idla noma ngabe ngubani. Nine lwanini kakhulu nalelidolobha futsi nilincobe.’+ Ubobese uyamkhutsata.”
26 Ngesikhatsi umfati wa-Uriya eva kutsi Uriya ufile, wase uyamlilela. 27 Kwatsi nje nakuphela sikhatsi sekulila, Davide watfumela kutsi bamlandze futsi bamletsa endlini yaDavide waba ngumfati wakhe,+ wamtalela indvodzana. Loku Davide lakwenta kwamtfukutselisa kakhulu* Jehova.+