Amose
8 Naku iNkhosi Lephakeme Jehova leyangikhombisa kona: Bekunabhasikidi wetitselo tasehlobo. 2 Yabese itsi: “Ubonani ye-Amose?” Ngaphendvula ngatsi: “Ngibona bhasikidi lonetitselo tasehlobo.” Jehova wabese utsi kimi: “Kuphela sekufikile kubantfu bami ema-Israyeli. Angeke ngisabacolela.+ 3 ‘Tingoma tasethempelini titawugucuka tibe sililo ngalelolanga,’+ kusho iNkhosi Lephakeme Jehova. ‘Tidvumbu letinyenti tiyawube tisakateke yonkhe indzawo,+ Kuyawuthula kutsi nya!’
4 Lalelani naku, nine lenigcobagcoba labaphuyile
Nalenicedza bantfu balelive labamnene,+
5 Nine lenitsi: ‘Utawuphela nini umkhosi wekwetfwasa kwenyanga,+ kuze sitewutsengisa lokutinhlavu kwetfu,
NeliSabatha+ litawuphela nini khona sitawutsengisa lokutinhlavu?
Kuze sitonciphisa sikali seli-efa*
Sikhulise sisindvo selishekeli,*
Sitowenta netikali tetfu letikhohlisako tingakali lokuliciniso;+
6 Kuze sitotsenga labeswele ngelisiliva
Nalabaphuyile ngetincabule,+
Futsi sitsengise incenye lengenamsebenti yalokutinhlavu.’
7 Jehova ufungile ngeKutikhukhumeta kwaJakobe+ watsi:
‘Angeke ngikukhohlwe konkhe labakwentile.+
Angeke yini lelive liphakame lonkhe njengeNayili,
Futsi ligelete liphindze libohle njengeNayili yaseGibhithe?’+
9 INkhosi Lephakeme Jehova itsi: ‘Ngalelolanga,
Ngitawukwenta lilanga lishone emini,
Futsi ngitawubangela live kutsi libe mnyama emini libalele.+
10 Imikhosi yenu ngiyawuyigucula ibe kulila+
Netingoma tenu tonkhe ngitawutigucula tibe tingoma tekulila.
Tonkhe tingculu tenu ngiyawutembatsisa tindvwangu temasaka futsi nginente nibe netimphandla;
Ngitawenta kulila kwenu kufane nekulilela indvodzana letelwe yodvwa,
Futsi kuphela kwalo kutawufana nekwelilanga lelibuhlungu.’
11 INkhosi Lephakeme Jehova itsi: ‘Emalanga ayeta,
Lapho ngiyotfumela khona indlala eveni,
Hhayi indlala yekufuna kudla nobe komela emanti,
Kodvwa indlala yekufuna kuva emavi aJehova.+
12 Bayawuyendza basuke kulolunye lwandle baye kulolunye
Futsi bayawusuka enyakatfo baye emphumalanga.
Bayawuzulazula bafuna livi laJehova, kodvwa angeke balitfole.
13 Ngalelolanga, tintfombi letinhle tiyawuculeka,
Nemajaha ayawuculeka ngenca yekoma;
14 Labo labafunga ngelicala leSamariya+ labatsi,
“Sifunga nkulunkulu wenu lophilako, nine bakaDani!”+
Futsi, “Sifunga ngendlela yaseBherisheba!”+
Batakuwa, futsi angeke baphindze bavuke.’”+