Yesibili Leya KubaseThesalonika
3 Kwekugcina bazalwane, hlalani nisithantazela+ kuze livi laJehova* litochubeka landza ngekushesha+ futsi lingcweliswa, njengobe nje kunjalo nakini; 2 nekutsi Nkulunkulu asivikele kubantfu labayingoti nakulababi,+ ngobe akusibo bonkhe bantfu labanekukholwa.+ 3 INkhosi yetsembekile futsi itanicinisa, iphindze inivikele kulomubi. 4 Ngetulu kwaloko, njengobe silandzela iNkhosi, siyanetsemba kutsi niyakwenta loko lesinitjele kona nekutsi nitawuchubeka nikwenta. 5 Shengatsi iNkhosi ingachubeka icondzisa tinhlitiyo tenu kuze nitsandze Nkulunkulu,+ futsi inisite kutsi nicinisele+ nitokhona kuchubeka nilandzela Khristu.
6 Sininika leticondziso bazalwane egameni leNkhosi Jesu Khristu, kutsi nikhweshe kunobe ngumuphi umzalwane lophila ngendlela lengakafaneli,+ longaphili ngaloko* lenakutfola kitsi.+ 7 Nani nati kahle kutsi kufanele nisilingise+ njani, ngobe asizange siphile ngendlela lengakafaneli emkhatsini wenu, 8 futsi asizange sidle kudla kwemuntfu mahhala.*+ Kodvwa ngekushikashikeka nangekukhandleka busuku nemini, besisebenta kuze singabi ngumtfwalo kunobe ngubani kini.+ 9 Hhayi kutsi site lilungelo+ lekucela lusito kini, kodvwa loko sakwenta kuze sinibekele sibonelo leningasilingisa.+ 10 Nangesikhatsi sinani, besininika lomyalo lotsi: “Nangabe umuntfu angafuni kusebenta, akangadli.”+ 11 Ngobe siyeva kutsi labanye kini baphila ngendlela lengakafaneli,+ abasebenti kwasanhlobo kodvwa batigaca etindzabeni letingabatsintsi.+ 12 Bantfu labanjalo siyabayala futsi siyabakhutsata eNkhosini Jesu Khristu kutsi basebente ngekuthula, badle nekudla labakusebentele.+
13 Kodvwa nine bazalwane, ningadzinwa kwenta lokuhle. 14 Kepha nangabe kukhona longakulaleli loko lesikusho kulencwadzi, mcapheleni loyo muntfu futsi niyekele kutihlanganisa naye,+ kuze abe nemahloni. 15 Kodvwa-ke ningamtsatsi njengesitsa, esikhundleni saloko chubekani nimyala+ njengemzalwane.
16 Shengatsi iNkhosi yekuthula ingahlala ininika kuthula ngato tonkhe tindlela.+ INkhosi ayibe nani nonkhe.
17 Mine Pawula ngiyanivusela futsi loku ngikubhale ngesandla sami.+ Tonkhe tincwadzi tami ngitibhala kanjena kuze nati kutsi tibhalwe ngimi.
18 Shengatsi umusa lomkhulu weNkhosi yetfu Jesu Khristu ungaba nani nonkhe.