Yekucala KubaseKhorinte
16 Macondzana nekubutfwa kweminikelo yalabangcwele,+ nibolandzela ticondziso lengatinika emabandla aseGalathiya. 2 Ngelilanga lekucala kulelo nalelo viki, ngamunye wenu kufanele abekele eceleni lokutsite kuye ngekwaloko lanako, kuze iminikelo ingabutfwa nasengifikile. 3 Kodvwa nasengifikile, ngitawutfuma lamadvodza leniwakhetsile etincwadzini tenu+ kutsi amikise leminikelo yenu eJerusalema. 4 Nangabe nami kufanele ngihambe, ngitawuhamba nawo.
5 Ngitawukuta kini nasengendlule eMasedoniya, ngobe ngitawendlula khona;+ 6 futsi kungenteka ngihlale nani nobe kuphele busika nginani, kuze ningiphekeletele sigatjana lapho ngitawube ngiya khona. 7 Angifuni kunibona nyalo njengobe ngitawube ngendlula, ngobe ngetsemba kutsi ngitawuba nesikhashana nginani,+ nangabe Jehova* atsandza. 8 Kodvwa ngitawuchubeka ngise-Efesu+ kuze kube nguMkhosi weliPhentekhoste; 9 ngobe ngivulekelwe ngumnyango lomkhulu wekwenta umsebenti weNkhosi,+ kepha banyenti baphikisi.
10 Kodvwa-ke nakefika Thimothi,+ cinisekani kutsi nibambisana naye kuze angesabi lutfo nakasenani, ngobe wenta umsebenti waJehova*+ njengami. 11 Akube bete lombukela phansi. Nibomphekeletela khona atohamba aphephile aze afike kimi, ngobe mine nebazalwane simlindzile.
12 Mayelana nemzalwane wetfu Apholosi,+ ngimncengile kutsi ete kini kanye nebazalwane. Bekangakatitjeli ngekuta nyalo, kodvwa utawukuta nakatfola litfuba.
13 Hlalani niphapheme,+ nicine ekukholweni,+ nibe nesibindzi*+ futsi nibe nemandla.+ 14 Konkhe lenikwentako kwenteni ngelutsandvo.+
15 Ngiyanincenga bazalwane, ngobe niyati kutsi Stefanasi nemndeni wakhe baba bekucala* kuba bafundzi e-Akhaya, nekutsi batinikela ekusiteni labangcwele. 16 Shengatsi nani ningachubeka nititfoba kubantfu labanjalo nakubo bonkhe lababambisana natsi nalabasebenta kamatima.+ 17 Kodvwa ngiyajabula ngekuba khona kwaStefanasi,+ naFothunatusi kanye na-Akhayikhusi, ngobe bavale sikhala senu njengobe ningekho lapha. 18 Bawuvuselele umoya wami kanye newenu. Ngako nibobabonga bantfu labanjalo.
19 Emabandla ase-Asiya ayanivusela. Akhwila naPhrisila kanye nelibandla lelisendlini yabo,+ banivusela ngenhlitiyo yonkhe eNkhosini. 20 Bonkhe bazalwane nabo bayanivusela. Nani nibovuselana ngekwanga kwebuzalwane.
21 Mine Pawula ngiyanivusela futsi loku ngikubhale ngesandla sami.
22 Nangabe kukhona longayitsandzi iNkhosi, akacalekiswe. Awu, wota Nkhosi yetfu! 23 Shengatsi umusa lomkhulu weNkhosi Jesu ungaba nani. 24 Nelutsandvo lwami shengatsi lungaba nani nonkhe, nine lenimunye naKhristu Jesu.