Genesisi
48 Ngemuva kwaloko, Josefa wabikelwa kwatsiwa: “Babe wakho uyagula.” Ngako watsatsa emadvodzana akhe lamabili, boManase na-Efrayimu wahamba nawo.+ 2 Jakobe wase utjelwa kutsi indvodzana yakhe Josefa seyifikile. Ngako Israyeli wetama kuvuka, wahlala embhedzeni wakhe. 3 Wase utsi kuJosefa:
“Nkulunkulu Somandla wabonakala kimi eLuzi, eveni laseKhenani, wangibusisa.+ 4 Watsi kimi: ‘Wena ngitawukwenta ube nebantfwana labanyenti, futsi wandze kakhulu, ngikwente ube sive lesikhulu.+ Lelive ngitalinika intalelwane* yakho letawuvela ngemuva kwakho, libe lifa layo phakadze.’+ 5 Ngako-ke lamadvodzana lamabili lotalelwe wona lapha eGibhithe ngisengakefiki mine, ami.+ Bo-Efrayimu naManase batawuba bami+ njengobe boRubeni naSimeyoni nabo babami. 6 Kodvwa bantfwana lotawubatala ngemuva kwalaba batawuba bakho. Batawutfola incenye yemhlaba kuleyo letawube ilifa labomnakabo.+ 7 Ngesikhatsi ngisuka ePhadani, make wakho Rakheli wafela+ eceleni kwami eveni laseKhenani kantsi bekusadzingeka sitsatse luhambo loludze loluya e-Efratha.+ Ngako ngamngcwaba ngasendleleni leya e-Efratha, lokuyiBhetlehema.”+
8 Nakabona emadvodzana aJosefa, Israyeli watsi: “Bobani laba?” 9 Josefa watsi kubabe wakhe: “Lawa ngemadvodzana ami Nkulunkulu langiphe wona kulelive.”+ Israyeli watsi kuye: “Ngicela uwasondzete kimi kuze ngiwabusise.”+ 10 Israyeli besekanenkinga yemehlo njengobe besekakhulile, futsi bekangasaboni. Ngako Josefa wawasondzeta lamadvodzana akhe, Israyeli wase uyawacabuza waphindze wawagaca. 11 Israyeli watsi kuJosefa: “Bengingacabangi kutsi ngiyoke ngiphindze ngibubone buso bakho,+ kodvwa Nkulunkulu ungente ngabona ngisho nebantfwana* bakho.” 12 Josefa wabese uyawakhweshisa lamadvodzana akhe ngasemadvolweni a-Israyeli, waguca phansi wakhotsama.
13 Josefa watsatsa lamadvodzana akhe lamabili wawasondzeta kuJakobe, wabamba Efrayimu+ ngesandla sakhe sangesekudla wammisa ngesencele sa-Israyeli, Manase+ wambamba ngesencele wammisa ngesekudla sa-Israyeli. 14 Kodvwa Israyeli wabeka sandla sakhe sangesekudla enhloko ya-Efrayimu, nanobe abengulomncane, wase ubeka sandla sakhe sangesencele enhloko yaManase. Loko wakwenta ngenhloso, ngisho nobe bekati kutsi Manase abengumntfwana wekucala.+ 15 Ngemuva kwaloko wabusisa Josefa watsi:+
“Nkulunkulu weliciniso labekhontwa ngumkhulu wami Abrahama nangubabe wami Isaka,+
Nkulunkulu weliciniso lobekasolo angihola kuphila kwami konkhe kwaze kwaba ngulamuhla,+
16 Lowasebentisa ingilosi yakhe kutsi ingikhulule kuko konkhe kuhlupheka kwami,+ akababusise labafana.+
Shengatsi bangabitwa ngelibito lami, ngelibito la-Abrahama nangelibito la-Isaka,
Abandze babe banyenti bagcwale kuwo wonkhe umhlaba.”+
17 Josefa waphatseka kabi ngesikhatsi abona kutsi babe wakhe abebeke sandla sakhe sangesekudla enhloko ya-Efrayimu, ngako wetama kusisusa enhloko ya-Efrayimu kuze asibeke enhloko yaManase. 18 Watsi kubabe wakhe: “Cha babe, ngulona longumntfwana wekucala.+ Ngako beka sandla sakho sangesekudla enhloko yakhe.” 19 Kodvwa babe wakhe wala kwenta njalo, watsi: “Ngiyati ndvodzana yami. Naye utawuba sive futsi abe mkhulu. Kodvwa lomnakabo lomncane utawuba mkhulu kakhulu kunaye,+ nebantfwana* bakhe batawuba banyenti kakhulu kube shengatsi tive letinyenti.”+ 20 Ngako Jakobe wababusisa ngalelolanga,+ watsi:
“Shengatsi Israyeli angabita emabito enu nakabusisa labanye, atsi:
‘Nkulunkulu akakwente ufane na-Efrayimu naManase.’”
Ngaleyo ndlela wachubeka abeka Efrayimu kucala kunaManase.
21 Ngemuva kwaloko Israyeli watsi kuJosefa: “Mine sengitakufa,+ kodvwa Nkulunkulu utawuhlale anani futsi utawunibuyisela eveni labokhokho benu.+ 22 Wena ngikunika lenye incenye yelive* ngetulu kwaleyo lengiyinika bomnakenu, lengayitsatsa kuma-Amori ngenkemba nangebutjoki.”