Incwadzi Yekucala YemaKhosi
21 Ngemuva kwaloko, kwaba nesigameko lesimayelana nensimu yemagilebisi lebeyiyaNabothi umJezreyeli; lensimu yemagilebisi beyiseJezreyeli+ eceleni kwesigodlo sa-Ahabi inkhosi yaseSamariya. 2 Ahabi watsi kuNabothi: “Nginike lensimu yakho yemagilebisi itewuba yingadze yami yetibhidvo ngobe iseceleni kwelikhaya lami. Ngitawubese ngikuniketa lenye lencono esikhundleni sayo, nobe ngikunikete imali nangabe unconota loko.” 3 Nabothi watsi ku-Ahabi: “Kuyintfo lengingayicabangi nekuyicabanga kutsi ngingakunika lifa labokhokho bami+ njengobe kusho umyalo waJehova.” 4 Ngemuva kwaloko, Ahabi wahamba waya ekhaya lakhe akwatile futsi abuhlungu ngemphendvulo yaNabothi waseJezreyeli, leyatsi: “Angeke ngikunike lifa labokhokho bami.” Wafike walala embhedzeni, wafulatselisa buso bakhe futsi wala nekudla.
5 Umkakhe, Jezebeli+ weta kuye wafike wambuta watsi: “Udvunyatwe yini* kangaka kutsi ungaze wale ngisho nekudla?” 6 Wamphendvula watsi: “Ngitsite nangitsi kuNabothi waseJezreyeli, ‘Ngitsengisele insimu yakho yemagilebisi noma ngikunikete lenye esikhundleni sayo nangabe unconota loko,’ yena watsi, ‘Angeke ngikunike insimu yami yemagilebisi.’” 7 Umfati wakhe Jezebeli watsi kuye: “Akusuwe yini loyinkhosi ka-Israyeli? Vuka udle futsi inhlitiyo yakho ijabule. Mine ngitakunika lensimu yemagilebisi yaNabothi waseJezreyeli.”+ 8 Ngako Jezebeli wabhala tincwadzi egameni la-Ahabi watifaka luphawu+ lwa-Ahabi, wase utitfumela kulabadzala+ netitatanyiswa lebetihlala edolobheni lakuboNabothi. 9 Naku lakubhala kuletincwadzi: “Memetelani kutsi kuzilwe kudla, bese nibita Nabothi kutsi ayohlala embikwebantfu. 10 Nibobese niletsa emadvodza lamabili langasilo lusito lwalutfo niwahlalise embikwaNabothi, niwatjele etfule bufakazi lobumelene naye+ atsi, ‘Wena wetfuke Nkulunkulu nenkhosi!’+ Ngemuva kwaloko, nimkhiphele ngephandle nimgcobe ngematje aze afe.”+
11 Ngako lamadvodza labekahlala kulelidolobha, emadvodza lamadzala kanye nalatitatanyiswa, enta njengobe kubhaliwe kuletincwadzi letatfunyelwa nguJezebeli. 12 Amemetela kutsi kufanele kuzilwe kudla futsi ahlalisa Nabothi embikwebantfu. 13 Lamadvodza lamabili langasilo lusito lwalutfo abese ayangena ahlala phansi embikwaNabothi futsi acala kwetfula bufakazi lobumelene naye embikwalabantfu, atsi: “Nabothi wetfuke Nkulunkulu nenkhosi!”+ Ngemuva kwaloko, bamtsatsa bamyisa ngephandle kwelidolobha, base bamgcoba ngematje waze wafa.+ 14 Babese batfumela livi kuJezebeli lelitsi: “Nabothi ugcotjwe ngematje waze wafa.”+
15 Ngekushesha nje Jezebeli nakeva kutsi Nabothi ugcotjwe ngematje waze wafa, watsi ku-Ahabi: “Sukuma uyotsatsa insimu yemagilebisi yaNabothi umJezreyeli,+ leyo langakavumi kukutsengisela yona, ngobe akasaphili, sewufile.” 16 Ngekushesha nje Ahabi nakeva kutsi Nabothi sewufile, wavuka kuze ewukele ensimini yemagilebisi yaNabothi umJezreyeli ayoyitsatsa.
17 Kodvwa livi laJehova lefika ku-Elija+ umThishbe latsi: 18 “Sukuma wewuke uyohlangana na-Ahabi, inkhosi yaka-Israyeli, loseSamariya.+ Nyalo usensimini yemagilebisi yaNabothi, wewukele kuyoyitsatsa. 19 Kufanele umtjele utsi: ‘Naku lokushiwo nguJehova: “Ubulele indvodza+ wase utsatsa lokungekwayo yini?”’*+ Ubophindze utsi kuye: ‘Naku lokushiwo nguJehova: “Kulendzawo lapho tinja tikhotse khona ingati yaNabothi, neyakho ingati titayikhotsa khona.”’”+
20 Ahabi watsi ku-Elija: “Sewungitfolile sitsa sami!”+ Elija waphendvula watsi: “Yebo ngikutfolile. Nkulunkulu utsite: ‘Ngesizatfu sekutsi utimisele* kwenta lokubi emehlweni aJehova,+ 21 ngiletsa inhlekelele etikwakho futsi ngitasitsanyelisisa situkulwane sakho ngiphindze ngicotfule wonkhe umuntfu lomdvuna*+ endlini ya-Ahabi lokufaka ekhatsi labangenamsiti kanye nalababutsakatsaka ka-Israyeli.+ 22 Ngitakwenta indlu yakho ifane nendlu yaJerobowamu+ indvodzana yaNebati iphindze ifane nendlu yaBhasha+ indvodzana ya-Ahiya ngoba ungitfukutselisile futsi ubangele ema-Israyeli kutsi one.’ 23 Ngalokuphatselene naJezebeli, Jehova utsite: ‘Tinja titawudlela Jezebeli ensimini leseJezreyeli.+ 24 Noma ngabe ngubani wendlu ya-Ahabi lotawufela edolobheni utawudliwa tinja, futsi noma ngabe ngubani lotawufela esigangeni utawudliwa tinyoni temazulu.+ 25 Ecinisweni akukaze kube nemuntfu lolingisa Ahabi+ lobekatimisele* ngekwenta lokubi emehlweni aJehova, alekelelwa ngumkakhe Jezebeli.+ 26 Wenta ngendlela leyenyanyeka kakhulu ngekutsi alandzele tithico letenyanyekako,* njengoba nje onkhe ema-Amori lakhishwa nguJehova kuma-Israyeli bekenta.’”+
27 Watsi nje Ahabi nakacedza kuva lamavi, wadzabula tembatfo takhe, wagcoka indvwangu yelisaka; wahamba wayozila kudla futsi wachubeka alele esakeni futsi advumele. 28 Livi laJehova labese liyefika ku-Elija umThishbe, latsi: 29 “Umbonile yini Ahabi kutsi ubese uyatitfoba ngenca yalesehlulelo?+ Ngobe utitfobile embikwami, angeke ngiyehlise lenhlekelele asaphila. Ngitayehlisela endlini yakhe ngesikhatsi sekubusa kwendvodzana yakhe.”+