Incwadzi Yekucala YaSamuweli

11 Ngemuva kwaloko, Nahashi um-Amoni+ wakhuphuka wamisa emathende eJabeshi+ yakaGileyadi kuze ayihlasele. Onkhe emadvodza aseJabeshi atsi kuNahashi: “Yenta sivumelwane natsi, futsi tsine sitawuba tisebenti takho.” 2 Nahashi um-Amoni watsi kuwo: “Ngingasenta sivumelwane nani, kuphela nje nangabe kungakupulutwa onkhe emehlo enu angesekudla. Loko ngitakwenta kuze ngihlazise onkhe ema-Israyeli.” 3 Emadvodza lamadzala aseJabeshi amphendvula atsi: “Sinikete emalanga langu-7 kuze sitfumele titfunywa kulo lonkhe live laka-Israyeli. Nangabe kute lotasisindzisa, sitawubese siyatinikela kuwe.” 4 Ngemuva kwesikhatsi lesitsite, letitfunywa tefika eGibeya+ lokulidolobha lakuboSawula,* tasho onkhe lamavi phambi kwalabantfu, futsi bonkhe labantfu badzindza sililo.

5 Sawula yena abebuya emadlelweni agalela umhlambi wetinkhomo, futsi watsi: “Kwentenjani ngalabantfu? Bakhalelani?” Ngako bamtjela ngawo onkhe emavi labeshiwo ngemadvodza aseJabeshi. 6 Ngesikhatsi Sawula eva lamavi, umoya waNkulunkulu wamnika emandla+ futsi watfukutsela wabila. 7 Ngako watsatsa tinkunzi letimbili waticoba taba ticucu wase utinika titfunywa kutsi titimikise kulo lonkhe live laka-Israyeli, tatsi: “Nobe ngubani longeke alandzele Sawula naSamuweli kufanele alindzele kutsi kwentiwe loku etinkhomeni takhe!” Labantfu babese befikelwa kumesaba Jehova kangangekutsi baphuma bamunye.* 8 Ngemuva kwaloko Sawula wababala eBhezeki, watfola kutsi bekunema-Israyeli langu-300 000 kanye nemadvodza akaJuda langu-30 000. 9 Babese batsi kuletitfunywa lebetitile: “Naku lokufanele nikusho emadvodzeni aseJabeshi yakaGileyadi: ‘Kusasa naselicala kushisa lilanga, nitawukhululwa.’” Ngako letitfunywa tefika tatjela lamadvodza aseJabeshi ngaloku futsi ajabula kakhulu. 10 Emadvodza aseJabeshi atsi kuNahashi: “Kusasa sitatinikela kuwe futsi ungasenta nobe yini loyitsandzako.”+

11 Ngelilanga lelilandzelako Sawula wehlukanisa labantfu baba ngemacembu lamatsatfu, futsi ngesikhatsi sekugadza kwasekuseni* bahamba baya ekhatsi nalendzawo lobekuhlalwa kuyo babulala ema-Amoni+ kwaze kwaba ngulapho lilanga selishisa. Labo labasindza bahlakateka, kangangekutsi nguloyo naloyo watibalekela yedvwa. 12 Labantfu babese batsi kuSamuweli: “Bobani-ke labebatsi: ‘Sawula vele utawuba yinkhosi yetfu yini?’+ Baletseni kitsi kuze sibabulale.” 13 Kodvwa Sawula watsi: “Kute ngisho namunye umuntfu lotawubulawa kulolusuku,+ ngobe Jehova uwasindzisile ema-Israyeli lamuhla.”

14 Ngekuhamba kwesikhatsi Samuweli watsi kulabantfu: “Asihambeni siye eGilgali+ kuze sicinisekise kutsi Sawula uyinkhosi.”+ 15 Ngako bonkhe labantfu bahamba baya eGilgali futsi nabefika lapho babeka Sawula kutsi abe yinkhosi embikwaJehova.+ Babese benta imihlatjelo yekuthula embikwaJehova kuleyo ndzawo, futsi Sawula kanye nawo onkhe ema-Israyeli bahalalisa ngenjabulo lenkhulu.+