Hezekeli
39 “Wena ndvodzana yemuntfu, phrofetha ngalokumelene naGogi,+ umtjele utsi: ‘INkhosi Lephakeme Jehova itsi: “Ngimelene nawe Gogi, wena sikhulu lesiyinhloko* sakaMesheki nesakaThubali.+ 2 Ngitakugucula, ngikuhole futsi ngikwente usuke etindzaweni letikhashane kakhulu tasenyakatfo,+ ngikuyise etintsabeni taka-Israyeli. 3 Ngitawushaya butjoki lobusesandleni sakho sangesencele, ngiwise nemicibisholo yakho lesesandleni sangesekudla. 4 Wena utawuwela etintsabeni taka-Israyeli,+ nawo onkhe emabutfo akho kanye nabo bonkhe bantfu labatawube banawe. Utawuba kudla kwemangce nekwetilwane tesiganga.”’+
5 “INkhosi Lephakeme Jehova itsi: ‘Wena utawufela esigangeni,+ ngobe mine lucobo lwami sengikhulumile.’
6 “‘Ngiyawutfumela umlilo umelane naMagogi kanye nalabahlala ngekulondzeka etichingini,+ futsi batawukwati kutsi mine nginguJehova. 7 Ngitawenta libito lami lelingcwele kutsi latiwe emkhatsini wesive sami ema-Israyeli, futsi angeke ngiphindze ngivume kutsi libito lami lelingcwele lihlanjalatwe; netive titawukwati kutsi mine nginguJehova,+ Longcwele waka-Israyeli.’+
8 “INkhosi Lephakeme Jehova itsi: ‘Loku kuyeta futsi kutawenteka. Leli ngilo lelilanga lengakhuluma ngalo. 9 Bantfu labahlala emadolobheni aka-Israyeli batawuphuma babase umlilo ngaletikhali, lokungemahawu lamakhulu nalamancane,* butjoki nemicibisholo, tizeze* kanye netikhali. Batawube basebentisa kona iminyaka lengu-7 kuze babase umlilo.+ 10 Angeke kudzingeke batfote tinkhuni esigangeni nobe bayotifuna emahlatsini ngobe batawusebentisa letikhali kuze babase umlilo.’
“INkhosi Lephakeme Jehova itsi: ‘Batawutsatsa tintfo talabo lababemuka tintfo tabo, batitsatsele nemcebo kulabo labatsatsa umcebo wabo.’
11 “‘Ngalelolanga, ngiyawunika Gogi+ indzawo yekungcwatjwa ka-Israyeli, lesesihosheni salabo labahamba emphumalanga yelwandle, futsi lendzawo iyawuvimba indlela yalabendlula khona. Bayawumngcwaba lapho-ke Gogi kanye nalo lonkhe libutfo lakhe, futsi lendzawo iyawubitwa ngekutsi Sihosha sakaHamona-Gogi.*+ 12 Kuyawuphela tinyanga letingu-7 solo bantfu baka-Israyeli babangcwaba kuze bahlante lelive.+ 13 Bonkhe bantfu bakulelive batawubangcwaba, futsi loko kutawubaletsela ludvumo ngelilanga lengiyotikhatimulisa ngalo,’+ kusho iNkhosi Lephakeme Jehova.
14 “‘Emadvodza latsite atawunikwa umsebenti wekwehla enyuka kulelive futsi angcwabe tidvumbu letitawube tisele emhlabeni kuze awuhlante. Ayawuchubeka atifuna kuze kuphele tinyanga letingu-7. 15 Lawo lendlula kulelive atawutsi nawabona litsambo lemuntfu, abeke luphawu eceleni kwalo. Emadvodza lanikwe umsebenti wekungcwaba atawubese ayalitsatsa ayolingcwaba eSihosheni sakaHamona-Gogi.+ 16 Lapho kuyawuba nelidolobha lokutsiwa yiHamona.* Ayawulihlanta kanjalo-ke lelive.’+
17 “Wena ndvodzana yemuntfu, naku iNkhosi Lephakeme Jehova lekushoko: ‘Tjela lonkhe luhlobo lwetinyoni nato tonkhe tilwane tesiganga utsi: “Butsanani ndzawonye nite, futsi nitungelete umhlatjelo wami lenginilungiselela wona, lokungumhlatjelo lomkhulu etintsabeni taka-Israyeli.+ Nitawudla inyama futsi ninatse ingati.+ 18 Nitawudla inyama yemachawe futsi ninatse ingati yetikhulu tasemhlabeni—timvu letindvuna, emazinyane etimvu, timbuti kanye netinkunzi—tonkhe tilwane letikhuluphele taseBhashani. 19 Nitawutitika ngemanoni alomhlatjelo lenginilungiselele wona, ninatse nengati yawo nize nidzakwe.”’
20 “INkhosi Lephakeme Jehova itsi: ‘Etafuleni lami nitawesutsiswa ngemahhashi, bagibeli bemahhashi, ngemachawe kanye nalo lonkhe luhlobo lwemasotja.’+
21 “‘Ngitawukhombisa inkhatimulo yami etiveni, futsi tonkhe tive tiyawusibona sehlulelo lengisikhiphile nemandla* lengiwakhombisile emkhatsini wato.+ 22 Kusukela ngalelolanga kuchubeke, bantfu baka-Israyeli bayawukwati kutsi mine nginguJehova Nkulunkulu wabo. 23 Tive tiyawukwati kutsi bantfu baka-Israyeli batfunjwa ngenca yetono tabo, ngobe abazange betsembeke kimi.+ Kungako ngabafihlela buso bami,+ ngabanikela esandleni setitsa tabo+ futsi bonkhe babulawa ngenkemba. 24 Ngabehlulela kwaya ngekungcola kwabo nangetono tabo, futsi ngabafihlela buso bami.’
25 “Ngako-ke iNkhosi Lephakeme Jehova itsi: ‘Ngitababuyisa labatfunjiwe besive saJakobe,+ futsi ngitawuba nemusa kubo bonkhe bantfu baka-Israyeli;+ ngitawuvikela libito lami lelingcwele ngawo onkhe emandla ami.*+ 26 Nasebahlazekile ngenca yako konkhe kungetsembeki kwabo kimi,+ batawuhlala ngekulondzeka eveni labo, angeke kusaba khona lotabesabisa.+ 27 Ngesikhatsi ngibabuyisa etiveni futsi ngibabutsisa ndzawonye basuka emaveni etitsa tabo,+ ngitawutingcwelisa emkhatsini wabo embikwetive letinyenti.’+
28 “‘Bayawukwati kutsi mine nginguJehova Nkulunkulu wabo ngesikhatsi ngibatfumela ekutfunjweni etiveni futsi ngiphindze ngibabutsanisa ndzawonye kuze babuyele eveni labo, ngingashiyi ngisho namunye wabo.+ 29 Ngeke ngisachubeka nekubafihlela buso bami,+ ngobe ngiyawutfululela umoya wami kubantfu baka-Israyeli,’+ kusho iNkhosi Lephakeme Jehova.”