Incwadzi Yekucala YaSamuweli
24 Watsi nje Sawula nakacedza kuhlasela emaFilisti, watfola umbiko lotsi: “Davide usehlane lase-Eni-gedi.”+
2 Ngako Sawula wakhetsa emadvodza langu-3 000 kulo lonkhe live laka-Israyeli, bahamba bayofuna Davide nemadvodza labehamba nawo emadvwaleni labehlala timbuti tasentsabeni. 3 Sawula wefika etibayeni tetimvu* letiseceleni kwemgwaco, lapho bekunemhume khona futsi wangena watikhulula.* Davide nemadvodza labehamba nawo bebahleti ekugcineni kwalomhume.+ 4 Lamadvodza atsi kuDavide: “Lamuhla Jehova utsi kuwe: ‘Nginikela sitsa sakho esandleni sakho+ futsi ungenta nobe yini loyifunako kuso.’” Ngako Davide wasukuma futsi wanyenya wajuba umphetfo welijazi laSawula lelite imikhono. 5 Kodvwa ngemuva kwaloko Davide wadliwa ngunembeza*+ ngobe abejube umphetfo welijazi laSawula lelite imikhono. 6 Watsi kulamadvodza labehamba nawo: “Jehova angeke avume kutsi ngente intfo lenjena enkhosini yami lengulogcotjiwe waJehova, ngekutsi ngiyilimate ngobe ingulogcotjiwe waJehova.”+ 7 Ngako Davide wekhuta* lamadvodza ngalamavi, futsi akazange awavumele kutsi ahlasele Sawula. Sawula waphuma kulomhume wachubeka nendlela yakhe.
8 Ngemuva kwaloko Davide waphuma kulomhume wamemeta Sawula watsi: “Nkhosi yami!”+ Ngesikhatsi Sawula abuka emvakwakhe, Davide waguca phansi futsi wakhotsama. 9 Davide watsi kuSawula: “Uwalalelelani emadvodza latsi kuwe: ‘Davide ufuna kukulimata’?+ 10 Lamuhla utibonele ngewakho emehlo indlela Jehova lakunikele ngayo esandleni sami ngesikhatsi usemhumeni. Kodvwa ngesikhatsi lotsite atsi angikubulale,+ ngikuvele buhlungu futsi ngatsi: ‘Angeke ngiyilimate inkhosi yami ngobe ingulogcotjiwe waJehova.’+ 11 Manje nkhosi yami, buka nangu umphetfo welijazi lakho lelingenamikhono lapha esandleni sami; ngobe ngesikhatsi ngijuba umphetfo walo wena angikakubulali. Nyalo-ke sewungabona futsi wati kutsi angikatimiseli ngekukulimata nobe kukuvukela, nekutsi angikakoni+ ngalutfo kodvwa wena uyangitingela kute ungibulale.+ 12 Shengatsi Jehova angaba ngumehluleli emkhatsini wami nawe,+ futsi shengatsi Jehova angangiphindziselela kuwe,+ kodvwa mine angeke ngikubulale.+ 13 Kunesisho sakadzeni lesitsi: ‘Kubenti balokubi kuvela tento letimbi,’ kodvwa-ke mine angeke ngikubulale. 14 Inkhosi yaka-Israyeli icoshana nami yini? Ngingubani nje mine? Ngimane ngifanana nenja lefile futsi ngifanana nelikululu.+ 15 Shengatsi Jehova angaba ngumehluleli, ehlulele emkhatsini wami nawe, futsi utawubona, angimelele,+ angehlulele aphindze angikhulule esandleni sakho.”
16 Ngalesikhatsi Davide acedza kukhuluma, Sawula watsi: “Nguwe yini lolokhulumako Davide ndvodzana yami?”+ Sawula wase ucala kudzindza sililo. 17 Watsi kuDavide: “Wena ulunge kakhulu kwendlula mine, ngobe ungiphetse kahle kodvwa mine ngikubuyisele ngalokubi.+ 18 Lamuhla ungitjele ngalokuhle lokwentile ngekutsi ungangibulali ngalesikhatsi Jehova anginikele esandleni sakho.+ 19 Ukhona yini umuntfu lotsi sekasitfolile sitsa sakhe bese uyasiyekela siphunyule angakasilimati? Jehova utakubusisa ngalokuhle+ ngenca yaloko longentele kona lamuhla. 20 Sengiyati kutsi nakanjani utawuba yinkhosi+ nekutsi umbuso waka-Israyeli utawuhlala uwakho. 21 Nyalo funga kimi ngaJehova+ kutsi angeke uyicotfule intalelwane* yami nasengifile, nekutsi angeke ulesule ligama lami endlini yababe.”+ 22 Ngako Davide wafunga kuSawula, ngemuva kwaloko Sawula wabuyela ekhaya lakhe.+ Kodvwa Davide nemadvodza labehamba nawo bakhuphukela endzaweni yekubhaca.+