Imisebenti Yebaphostoli
24 Nasekwendlule emalanga lasihlanu, Ananiyase umphristi lophakeme+ wehla nalamanye emadvodza lamadzala kanye nemmeli lokutsiwa nguThethulusi, baya kumbusi bafike babeka Pawula licala.+ 2 Ngesikhatsi Thethulusi abitwa, wamangalela Pawula watsi:
“Mhlonishwa Feliksi, live letfu linekuthula lokukhulu ngenca yakho, futsi ngenca yekuhlakanipha kwakho kunetingucuko letinyenti eveni letfu, 3 letintfo sitemukela ngenjabulo lenkhulu ngaso sonkhe sikhatsi nakuto tonkhe tindzawo. 4 Kodvwa kuze ngingakubambeleli, ngicela usikhombise umusa futsi usilalele. 5 Sitfole kutsi lomuntfu uluhlupho*+ futsi ususa siphitsiphitsi+ emkhatsini wawo onkhe emaJuda emhlabeni wonkhe, nekutsi ungumholi welicembu lelibitwa ngekutsi ngemaNazaretha.+ 6 Wetame nekungcolisa lithempeli, ngako sibese siyambamba.+ 7 *—— 8 Nawe nawungamphenyisisa, utatibona tonkhe letintfo lesimmangalela ngato.”
9 EmaJuda nawo angenela, futsi ammangalela, agomela atsi letintfo tiliciniso. 10 Ngesikhatsi umbusi amkhomba ngenhloko kutsi akhulume, Pawula waphendvula watsi:
“Ngati kahle kutsi bewusolo ungumehluleli walesive iminyaka leminyenti, ngako ngiyajabula kutfola lelitfuba lekutsi ngitiphendvulele embikwakho.+ 11 Nawe ungatihlolela ubone kutsi akukapheli emalanga langu-12 ngiye kuyokhonta eJerusalema;+ 12 futsi abazange sebangikhandze ngiphikisana nalotsite ethempelini nobe ngisusa siphitsiphitsi emasinagogeni nasedolobheni. 13 Kantsi futsi ngeke bakwati kutifakazela letintfo labangimangalela ngato lamuhla. 14 Kodvwa ngiyavuma kutsi ngihamba ngalendlela labayibita ngekutsi lihlelo, futsi ngikhonta Nkulunkulu wabokhokho bami,+ ngitikholwa tonkhe tintfo letiseMtsetfweni naletibhalwe baPhrofethi.+ 15 Nginelitsemba kuNkulunkulu, lokulitsemba nalabantfu labalibuke ngalabovu, lekutsi labalungile nalabangakalungi batawuvuswa ekufeni.+ 16 Ngaleso sizatfu, ngihlale ngetama kuba nanembeza lomsulwa* embikwaNkulunkulu nasembikwebantfu.+ 17 Ngako ngemuva kweminyaka letsite, ngabuyela eJerusalema kuze ngiphe sive sakitsi tipho,+ ngiphindze ngente iminikelo. 18 Ngesikhatsi ngisenta loku, bangitfola ethempelini sengitihlambululile+ ngekuvumelana neMtsetfo. Bekute sicumbi sebantfu futsi bengingabangeli nesiphitsiphitsi. Kodvwa kunalamanye emaJuda lebekasuka esifundzeni sase-Asiya lebekalapho, 19 futsi lebekufanele ngabe nawo alapha kuze angimangalele nangabe analokutsite ngami.+ 20 Nalamadvodza lalapha akatikhulumele wona asho kutsi ngubuphi bubi labutfole kimi ngesikhatsi ngime embikweNkantolo YemaJuda. 21 Kuphela kwentfo lengiyishito njengobe bengime emkhatsini wawo ngunayi: ‘Lamuhla, sizatfu lesenta kutsi ngehlulelwe kutsi ngikholelwa ekuvusweni kwalabafile!’”+
22 Kodvwa njengobe Feliksi bekawati kahle emaciniso lamayelana naleNdlela,+ wabekhuta labantfu wase utsi: “Nasekafikile Lisiyasi indvuna yemphi, ngitawubese ngikhipha sijubo ngalendzaba yenu.” 23 Ngako wayala indvuna yelibutfo kutsi itsatse Pawula imbophe, kodvwa anikwe inkhululeko letsite, nekutsi bangani bakhe bavunyelwe kutsi bamsite nganobe yini layidzingako.
24 Ngemuva kwemalangana, Feliksi wefika nemkakhe Drusila, lobekangumJuda, futsi watsi akubitwe Pawula, wase uyamlalela nakakhuluma ngekukholwa kwakhe kuKhristu Jesu.+ 25 Kodvwa ngesikhatsi Pawula asakhuluma mayelana nekulunga, nekutibamba, kanye nekwehlulelwa lebekutawufika,+ Feliksi wesaba wase utsi: “Kwanyalo hamba, ngitawuphindze ngikubite nangitfola sikhatsi.” 26 Feliksi bekanelitsemba lekutsi Pawula utamdizela. Ngaleso sizatfu bekasolo atsi akabitwe futsi bekakhuluma naye. 27 Kodvwa kwatsi nasekwendlule iminyaka lemibili, kwangena Phokhiyusi Festusi esikhundleni saFeliksi. Ngenca yekutsi Feliksi bekafuna kutsandvwa ngemaJuda,+ akazange amkhiphe Pawula ejele.