Incwadzi Yekucala YaSamuweli
25 Ngemuva kwesikhatsi Samuweli+ wafa, ngako onkhe ema-Israyeli abutsana ndzawonye kuze alile ngenca yekufa kwakhe futsi amngcwaba dvutane nendlu yakhe eRama.+ Davide wase wehlela ehlane lasePharani.
2 Bekunendvodza eMayoni+ lebeyinemfuyo eKhameli.*+ Lendvodza beyinjinge kakhulu, beyinetimvu letingu-3 000 kanye netimbuti letingu-1 000, futsi ngaleso sikhatsi beyihhula timvu tayo eKhameli. 3 Libito lalendvodza bekunguNabali,+ umfati wayo bekungu-Abigayili.+ Lomfati bekahlakaniphile futsi amuhle, kodvwa lendvodza yakhe lengumKhalebi,+ beyite umusa futsi beyenta tintfo letimbi.+ 4 Nabali bekahhula timvu takhe ngesikhatsi Davide asehlane, futsi Davide weva ngaloko. 5 Ngako Davide watfumela emajaha langu-10 kuye, watsi kuwo: “Khuphukelani eKhameli, nanifika kuNabali ningibutele kutsi unjani. 6 Bese nitsi kuye: ‘Shengatsi emalanga akho angaba manyenti, futsi shengatsi ungaba nekuthula wena nendlu yakho kanye nako konkhe lokukwakho. 7 Ngivile kutsi nyalo uhhula timvu. Ngesikhatsi belusi bakho banatsi asizange sibalimate,+ futsi kute lokwabalahlekela kuso sonkhe lesikhatsi baseKhameli. 8 Buta tinceku takho futsi titakutjela. Shengatsi emajaha lengiwatfumele kuwe ungawaphatsa kahle ngobe sifike ngesikhatsi kujatjuliwe.* Ngicela uphe tinceku takho kanye nendvodzana yakho Davide nobe ngabe yini lonayo.’”+
9 Ngako letinceku taDavide tahamba tafike tatjela Nabali konkhe loko lobekushiwo nguDavide. Naseticedzile, 10 Nabali watiphendvula watsi: “Ungubani Davide, futsi ingubani lendvodzana yaJese? Kulamalanga tinceku letinyenti tiyabaleka kubaphatsi bato.+ 11 Kufanele yini ngitsatse sinkhwa sami, emanti ami kanye nenyama lengiyilungiselele labo labahhula timvu tami, ngikunike emadvodza lengingati nekutsi abuya kuphi?”
12 Ngemuva kwaloko, letinceku taDavide tabuyela emuva futsi tamtjela konkhe lokushiwo nguNabali. 13 Masinyane Davide watsi etincekwini takhe: “Nonkhe hlomani ngetinkemba tenu!”+ Ngako tonkhe tahloma ngetinkemba tato, naDavide wahloma ngeyakhe, futsi emadvodza langaba ngu-400 akhuphuka naye, kwasala emadvodza langu-200 agadze umtfwalo.
14 Ngaleso sikhatsi, lenye inceku yatjela Abigayili umfati waNabali yatsi: “Davide utfumele titfunywa tisuka ehlane kuze tifisele umphatsi wetfu imphilo lenhle, kodvwa yena utetfukile.+ 15 Lamadvodza abesiphetse kahle kakhulu. Akazange asilimate futsi kute ngisho nakunye lokwasilahlekela ngalesikhatsi sindzawonye emadlelweni.+ 16 Kuso sonkhe lesikhatsi lesasicitsa seluse nawo umhlambi, bekasivikela njengeludvonga busuku nemini. 17 Manje-ke bona kutsi utawenta njani ngobe umphatsi wetfu nayo yonkhe indlu yakhe+ batawehlelwa yinhlekelele, futsi uyindvodza lengenangcondvo*+ kangangekutsi kute nalongakhona kukhuluma naye.”
18 Ngekushesha Abigayili+ watsatsa tinkhwa letingu-200, timbita letinkhulu letimbili letineliwayini, timvu letisihlanu lesetihlindziwe, bobhasikidi* labasihlanu labanalokutinhlavu lokugayingiwe, emacebelengwane langu-100 emagilebisi lomisiwe nemacebelengwane langu-200 emakhiwa lomisiwe, futsi konkhe wakwetfwesa timbongolo.+ 19 Wabese utsi etincekwini takhe: “Hambani, mine ngitanilandzela.” Kodvwa akashongo lutfo kuNabali indvodza yakhe.
20 Watsi asehla agibele imbongolo futsi asitfwe ngulentsaba, Davide nalamadvodza labehamba nawo beta ngakuye, ngako wahamba wayobahlangabeta. 21 Davide bekasolo atsi: “Ngadlala ngesikhatsi sami ngekugadza tonkhe tintfo talendvodza lena ehlane. Kute ngisho nakunye kwayo lokwalahleka+ kodvwa yona ingibuyisela ngalokubi kulokuhle lengiyentele kona.+ 22 Shengatsi Nkulunkulu angaletsela titsa taDavide* tijeziso ngekulandzelana, nangabe ngitawuvuma kutsi kuse kusekhona umuntfu lomdvuna* losaphila endlini yaNabali.”
23 Ngesikhatsi Abigayili abona Davide, wehla masinyane kulembongolo futsi waguca phansi wase uyakhotsama embikwaDavide. 24 Waguca ngasetinyaweni taDavide watsi: “Nkhosi, akube ngimi lobekwa licala; ngicela uvumele incekukati yakho kutsi ikhulume nawe futsi ulalele loko lefuna kukusho. 25 Ngicela inkhosi yami ingamnaki Nabali+ ngobe ungumuntfu longenamsebenti, ufana nje nelibito lakhe. Ubitwa ngekutsi nguNabali* futsi akanangcondvo. Incekukati yakho ayikatiboni tinceku letitfunyelwe nguwe nkhosi yami. 26 Manje-ke nkhosi, ngifunga ngekuphila kwaJehova nangekuphila kwakho kutsi nguJehova lokuvimbile+ kutsi ube nelicala lengati,+ nekutsi utiphindziselele* ngesandla sakho. Shengatsi titsa takho kanye nalabo labafuna kukulimata bangafana naNabali. 27 Ngicela kutsi lesipho*+ incekukati yakho lesiphatsele wena nkhosi, siniketwe lamajaha lahamba nawe.+ 28 Ngicela ucolele incekukati yakho kulesono lesentile, ngobe Jehova utawukwenta indlu yakho ihlale njalo,+ ngenca yekutsi wena nkhosi ulwa timphi taJehova+ futsi kuko konkhe kuphila kwakho kute bubi lobutfolakele kuwe.+ 29 Nangabe lotsite akucosha futsi afuna kukubulala, Jehova Nkulunkulu wakho utakuvikela njengemuntfu lovikela tintfo letiligugu letifakwe esikhwameni, kodvwa titsa takho utawutilahlela khashane njengelitje naliphuma esidubulelweni. 30 Jehova nasekakwentele tonkhe letintfo letinhle lakwetsembise tona futsi wakubeka kutsi ube ngumholi wema-Israyeli,+ 31 ngeke uve buhlungu nobe utisole* enhlitiyweni yakho ngekucitsa ingati ngaphandle kwesizatfu nangekutiphindziselela*+ ngesandla sakho. Lapho Jehova sekakwentele lokuhle nkhosi yami, uboyikhumbula incekukati yakho.”
32 Nakeva loku, Davide watsi ku-Abigayili: “Akadvunyiswe Jehova Nkulunkulu wema-Israyeli, lokutfumele kutsi utewungihlangabeta lamuhla! 33 Shengatsi ungabusiswa ngalomcondvo wakho lokhaliphile! Shengatsi ungabusiswa ngekungivimbela kutsi ngicitse ingati+ futsi ngitiphindziselele* ngetandla tami. 34 Kube awuketi masinyane kutewungihlangabeta,+ ngifunga Jehova Nkulunkulu lophilako wema-Israyeli longivimbile nganganilimati,+ kutsi bekutawutsi nakusa kube sekute ngisho namunye lomdvuna* losaphila endlini yaNabali.”+ 35 Ngemuva kwaloko Davide wakwemukela loko lakuniketwa ngu-Abigayili wase utsi kuye: “Hamba ngekuthula ubuyele endlini yakho. Ngikuvile loko lokushoko, futsi ngitakwenta njengobe ucelile.”
36 Abigayili wabese ubuyela kuNabali lobekente lidzili lelifanana nelenkhosi emtini wakhe, futsi Nabali* abejabulile, adzakwe angulomhlaba. Abigayili akazange amtjele lutfo kwaze kwaba kusekuseni. 37 Ekuseni nasekasangulukile Nabali, umfati wakhe wamtjela konkhe lobekwentekile. Inhlitiyo yakhe yafanana neyemuntfu lofile, walala watsi tfwi, woma njengelitje. 38 Ngemuva kwemalanga lacishe abe ngu-10, Jehova washaya Nabali, futsi wafa.
39 Ngesikhatsi Davide eva kutsi Nabali ufile, watsi: “Akadvunyiswe Jehova longiphindziselele+ ekwetfukweni nguNabali+ waphindze wavimbela inceku yakhe kutsi ingayenti intfo lembi,+ futsi Jehova umjezisile Nabali ngekwenta kwakhe tintfo letimbi!” Ngemuva kwaloko Davide watfumela livi ku-Abigayili wamsoma kute amtsatse abe ngumfati wakhe. 40 Ngako tinceku taDavide taya ku-Abigayili eKhameli tatsi kuye: “Davide usitfumile kutsi sitokutsatsa ube ngumfati wakhe.” 41 Ngekushesha wasukuma wase uyakhotsama watsi: “Mine ngiyincekukati yakho futsi ngitawugeza tinyawo+ tetinceku tenkhosi yami.” 42 Ngekushesha Abigayili+ wesuka wagibela imbongolo yakhe alandzelwa tincekukati takhe letisihlanu; wahamba naletitfunywa taDavide futsi waba ngumfati wakhe.
43 Davide abephindze ashade na-Ahinowami+ waseJezreyeli,+ futsi bobabili baba bafati bakhe.+
44 Kodvwa Sawula abesayitsetse indvodzakati yakhe Mikhali,+ lebeyingumfati waDavide, wayendzisela Phaliti+ indvodzana yaLayishi lobekawaseGalimu.