Incwadzi Yekucala YeTikhronike
17 Ngekushesha nje Davide nasatintile endlini* yakhe watsi kuNathani+ umphrofethi: “Mine ngihlala endlini lekahle yemisedari+ kantsi libhokisi lesivumelwane saJehova lihlala ethendeni letindvwangu.”+ 2 Nathani waphendvula Davide watsi: “Yenta noma ngabe yini lesenhlitiyweni yakho ngobe Nkulunkulu weliciniso unawe.”
3 Ngabo lobo busuku, livi laNkulunkulu lefika kuNathani latsi: 4 “Hamba uye encekwini yami Davide ufike utsi, ‘Naku lokushiwo nguJehova: “Akusuwe lotangakhela indlu lengitawuhlala kuyo.+ 5 Ngobe angikaze ngihlale endlini kusukela ngelilanga lengakhulula ngalo ema-Israyeli kuze kube ngulamuhla, kodvwa bengisolo ngihamba ngisuka kulelinye lithende ngiye kulelinye ngiphindze ngisuke kulelinye lithende lekukhontela ngiye kulelinye.*+ 6 Kuso sonkhe lesikhatsi ngihamba nawo onkhe ema-Israyeli, ngake ngasho yini kubehluleli baka-Israyeli lengababeka kutsi beluse bantfu bami ngatsi, ‘Anikangakheli ngani indlu lekahle yemisedari?’”’
7 “Ubotjela inceku yami Davide utsi: ‘Naku lokushiwo nguJehova wemabutfo: “Ngakutsatsa emadlelweni welusa umhlambi, ngakwenta umholi webantfu bami ema-Israyeli.+ 8 Ngitawuba nawe noma ngukuphi lapho uya khona+ futsi ngitawucotfula* tonkhe titsa takho embikwakho;+ ngitakwakhela ligama lelifana nelebantfu labadvumile emhlabeni.+ 9 Ngitawukhetsa indzawo lapho ngitawuhlalisa khona bantfu bami ema-Israyeli futsi batawuhlala lapho bangaphindze baphatanyiswe; bantfu lababi angeke baphindze babacindzetele* njengobe benta esikhatsini lesendlulile,+ 10 kusukela ngelilanga lengabeka ngalo behluleli kubantfu bami ema-Israyeli.+ Ngitatincoba tonkhe titsa takho.+ Ngetulu kwaloko, ngitsi kuwe: ‘Jehova utakwakhela indlu.’*
11 “‘“Nakuphela emalanga ekuphila kwakho futsi sewungcwatjwe lakwangcwatjwa khona bokhokho bakho, ngitawubese ngibeka intalelwane* yakho, lomunye wemadvodzana+ akho, kutsi abe yinkhosi ngemuva kwakho futsi ngitabucinisa bukhosi bakhe.+ 12 Nguye lotangakhela indlu,+ futsi ngitawucinisa sihlalo sakhe sebukhosi kuze kube phakadze.+ 13 Ngitawuba ngubabe wakhe, yena utawuba yindvodzana yami.+ Angeke ngilususe lutsandvo lwami lolucotfo kuye+ njengobe ngalususa kuloyo lebekabusa ngaphambi kwakho.+ 14 Ngitamenta kutsi eme endlini yami nasebukhosini bami kuze kube phakadze,+ futsi sihlalo sakhe sebukhosi sitawuba khona kuze kube phakadze.”’”+
15 Nathani watjela Davide onkhe lamavi nawo wonkhe lombono.
16 Nayikuva loko iNkhosi Davide yangena ngekhatsi yahlala phansi embikwaJehova, yase itsi: “Awu Jehova Nkulunkulu, bengiyini nje mine? Beyiyini nje indlu yami kutsi ungaze ungibeke kulesigaba lesengikuso?+ 17 Awu Nkulunkulu, loko longentele kona bekungakeneli yini? Ukhuluma nangendlu yenceku yakho kutsi utayibusisa kuze kube sesikhatsini lesidze lesitako,+ futsi ungitsetse njengemuntfu lokufanele achubeke abekwa esigabeni lesisetulu,* awu Jehova Nkulunkulu. 18 Yini lenye inceku yakho Davide lengayisho kuwe mayelana naloludvumo lenginikwe lona ube uyati kahle kangaka inceku yakho?+ 19 Awu Jehova, ngenca yenceku yakho nangekuvumelana nenhlitiyo yakho,* wente tonkhe letintfo letinkhulu ngekutsi wembule bukhulu bakho.+ 20 Awu Jehova, akekho lonjengawe+ futsi kute lomunye Nkulunkulu ngaphandle kwakho;+ konkhe lesikuve ngetindlebe tetfu kuyakufakazela loko. 21 Sikhona yini lesinye sive emhlabeni lesifana nebantfu bakho ema-Israyeli?+ Nkulunkulu weliciniso wahamba wayobakhulula baba bantfu bakhe.+ Watentela ligama ngetento takho letinkhulu naletimangalisako,+ wacosha tive embikwebantfu bakho+ lowabakhulula eGibhithe. 22 Wente bantfu bakho ema-Israyeli baba bantfu bakho ngaso sonkhe sikhatsi;+ futsi wena, awu Jehova, waba nguNkulunkulu wabo.+ 23 Nyalo, awu Jehova, shengatsi setsembiso losentile lesimayelana nenceku yakho kanye nendlu yayo ungasigcina ngaso sonkhe sikhatsi, futsi shengatsi ungenta njengobe wetsembisile.+ 24 Shengatsi libito lakho lingahlala,* liphakanyiswe+ kuze kube phakadze kuze bantfu batsi: ‘Jehova wemabutfo, Nkulunkulu wema-Israyeli, unguNkulunkulu kuma-Israyeli,’ futsi shengatsi indlu yenceku yakho Davide ingamiswa icine embikwakho.+ 25 Ngobe wena Nkulunkulu wami, uyembulile injongo yakho encekwini yakho kutsi utayakhela indlu.* Kungako inceku yakho inesibindzi sekuthantaza lomthantazo kuwe. 26 Nyalo, awu Jehova, wena unguNkulunkulu weliciniso futsi wetsembise letintfo letinhle mayelana nenceku yakho. 27 Ngako shengatsi kungaba kuhle kuwe kubusisa lendlu yenceku yakho futsi shengatsi ingachubeka kuze kube phakadze embikwakho ngobe wena, awu Jehova, uyibusisile futsi ibusiswe phakadze.”