Imisebenti Yebaphostoli
21 Ngemuva kwekwehlukana nabo, sahamba ngemkhumbi sacondza eKhosi. Ngakusasa saya eRodosi, nasisuka lapho saya ePhatara. 2 Ngesikhatsi sesitfole umkhumbi lowelela eFenisiya, sawugibela sahamba ngawo. 3 Satsi nasesibona sihlenge saseSiphrosi sasendlula ngesencele saya eSiriya, safike sehla eThire ngobe umkhumbi bewutakwehlisa umtfwalo. 4 Safuna bafundzi futsi sabatfola, sase sihlala lapho emalanga langu-7. Kodvwa ngenca yaloko lebebakwembulelwe ngumoya, labafundzi bebasolo batjela Pawula kutsi angayi eJerusalema.+ 5 Nasekaphelile emalanga etfu ekuhlala lapho, sachubeka neluhambo lwetfu, futsi bonkhe labafundzi, lokufaka ekhatsi bafati nebantfwana, basiphekeletela saze saphumela ngephandle kwelidolobha. Safike saguca elugwini sathantaza, 6 sase siyavalelisana. Ngemuva kwaloko, tsine sagibela umkhumbi, bona babuyela emakhaya.
7 Sesuka eThire ngemkhumbi sahamba saze sefika ePhitolemayisi, sabingelela bazalwane futsi sahlala nabo lilanga linye. 8 Ngakusasa sesuka saya eKhesariya, sefika endlini yaFiliphu umvangeli, lobekangulomunye wemadvodza langu-7 lakhetfwa,+ futsi sahlala naye. 9 Bekanemadvodzakati lamane langakashadi* futsi lamadvodzakati bekaphrofetha.+ 10 Kodvwa nasesihleti lapho emalanga lambalwa, kwefika lomunye umphrofethi lokutsiwa ngu-Agabusi,+ esuka eJudiya. 11 Weta kitsi, watsatsa libhande laPawula watibopha tinyawo netandla, wase utsi: “Naku lokushiwo ngumoya longcwele: ‘EJerusalema,+ emaJuda atambopha ngalendlela umnikati walelibhande, futsi atamnikela kubantfu betive.’”+ 12 Senela kuva loku, tsine kanye nebantfu lebebakhona sancenga Pawula kutsi angayi eJerusalema. 13 Kodvwa yena watsi: “Nikhalelani, futsi nifunelani kungicedza emandla?* Cinisekani kutsi angikalungeli kuboshwa nje kuphela, kodvwa ngikulungele ngisho nekufa eJerusalema ngenca yelibito leNkhosi Jesu.”+ 14 Satsi nasehluleka kumvimba, samyekela* sase sitsi: “Akwenteke intsandvo yaJehova.”*
15 Ngemuva kwalawo malanga, salungiselela luhambo lwetfu, sase sikhuphukela eJerusalema. 16 Kodvwa labanye bafundzi baseKhesariya bahamba natsi basiyisa kuMnasoni waseSiphrosi, lobekangulomunye wemakholwa ekucala, futsi besitawulala kakhe. 17 Satsi nasifika eJerusalema, bazalwane basemukela ngemusa. 18 Ngakusasa, Pawula waya natsi kuJakobe,+ futsi bonkhe labadzala bebakhona. 19 Wababingelela wase ubachazela tonkhe tintfo Nkulunkulu lebekatente ngaye etiveni.
20 Nabeva loku badvumisa Nkulunkulu, base batsi kuye: “Mzalwane, uyabona kutsi tingakanani tinkhulungwane tebantfu labakholwako kumaJuda, futsi bonkhe babambelele kakhulu eMtsetfweni.+ 21 Kodvwa beve emahemuhemu ngawe latsi bewufundzisa onkhe emaJuda lahlala emkhatsini waletinye tive kutsi ahlubuke eMtsetfweni waMosi, nekutsi utsi akukafaneli asoke bantfwana bawo nobe alandzele emasiko awo.+ 22 Sitawenta njani ngaloko? Ngobe batawuva kutsi ulapha. 23 Ngako naku lokufanele ukwente: Lapha kunemadvodza lamane lente sifungo. 24 Watsatse utihlambulule kanye nawo, uwakhokhele tindleko, kuze ahhule etinhloko. Bonkhe bantfu batawubese bayati kutsi lamahemuhemu lebebaweva ngawe awasilo liciniso, batawati nekutsi wena uphila ngekuvumelana neMtsetfo.+ 25 Emakholwa lavela kuletinye tive siwatfumelele sincumo lesisentile sekutsi kufanele atibalekele tintfo letinikelwe etithicweni,+ abalekele ingati,+ netilwane leticumbelene,*+ kanye nebugwadla.”*+
26 Ngakusasa, Pawula wawatsatsa lamadvodza watihlambulula nawo ngekuvumelana neMtsetfo,+ wase ungena ethempelini kuze achaze kutsi lamalanga ekutihlambulula atawuphela nini, nekutsi ngamunye wawo kufanele entelwe umnikelo.
27 Ngesikhatsi sekutawuphela lamalanga langu-7, emaJuda ase-Asiya atsi nakambona ethempelini, abangela kutsi bantfu babe neludlame, ase ayambamba, 28 amemeta atsi: “Madvodza aka-Israyeli, sisiteni! Nayi lendvodza lehamba yonkhe indzawo ifundzisa bantfu tintfo letimelene nebantfu bakitsi, naletimelene neMtsetfo wetfu kanye nalendzawo. Ngetulu kwaloko ingenise emaGriki lapha ethempelini futsi yangcolisa lendzawo lengcwele.”+ 29 Loku akusho ngobe bekambone edolobheni anaTrofimusi+ wase-Efesu, futsi bekacabanga kutsi umngenise ethempelini. 30 Kwesuka siphitsiphitsi kulo lonkhe lidolobha, bantfu bagijima ndzawonye bafike babamba Pawula bamhudvulela ngephandle kwelithempeli, futsi ngekushesha emasango avalwa. 31 Batsi basetama kumbulala, indvuna yemphi yeva kutsi kunesiphitsiphitsi kuyo yonkhe iJerusalema; 32 ngako ngekushesha yalandza emasotja netindvuna temasotja yagijimela khona. Nabayibona ita nemasotja, labantfu bayekela kushaya Pawula.
33 Ngemuva kwaloko, yasondzela yambamba, yatsi akaboshwe ngetinketane letimbili.+ Yase iyambuta kutsi ungubani nekutsi wenteni. 34 Kodvwa lesicumbi sebantfu besimemeta, labanye basho loku, labanye basho lokwa. Ngenca yalesiphitsiphitsi, lendvuna yemphi beyingacondzi kutsi kwentekani, ngako yase itsi Pawula akayiswe enkambu yemasotja. 35 Watsi Pawula nakefika etitebhisini, lamasotja amphakamisa ngobe lesicumbi besineludlame, 36 futsi besisolo sibalandzela, simemeta sitsi: “Mbulale!”
37 Ngesikhatsi Pawula sekatawuyiswa enkambu yemasotja, wakhuluma nalendvuna yemphi watsi: “Ngivumelekile yini kukhuluma nawe?” Yona yatsi: “Uyakwati yini kukhuluma siGriki? 38 Awusiye yini lomGibhithe lowasusa lutfutfuva futsi watsatsa emadvodza latidlova langu-4 000 wawayisa ehlane?” 39 Pawula watsi: “Mine ngingumJuda+ waseThasusi+ eSilisiya, ngisakhamuti sasedolobheni lelibalulekile. Ngiyakuncenga kutsi ungivumele ngikhulume nalabantfu.” 40 Ngemuva kwekutfola imvume, Pawula wema etitebhisini wabindzisa labantfu. Batsi nasebabindzile, wakhuluma nabo ngelulwimi lwesiHebheru,+ watsi: