Kulandzisa KwaLukha
17 Wase utsi kubafundzi bakhe: “Ngeke nitibalekele tintfo letiwisana ekukholweni. Nanobe kunjalo, maye kuloyo letita ngaye! 2 Bekungaba ncono kakhulu ngaye kube bekungaboshelwa litje lelikhulu entsanyeni yakhe bese ujikwa elwandle, kunekutsi onise lomunye walaba labancane.+ 3 Ticapheleni. Nangabe umzalwane wakho enta sono, mekhute,+ futsi nangabe aphendvuka, mtsetselele.+ 4 Ngisho nobe angakona tikhatsi letingu-7 ngelilanga, bese abuya tikhatsi letingu-7 atsi: ‘Ngicolele,’ kufanele umtsetselele.”+
5 Baphostoli batsi eNkhosini: “Sisite sicinise kukholwa kwetfu.”+ 6 INkhosi yase itsi kubo: “Kube kukholwa kwenu bekungangenhlanyelo yesinaphi, beningatsi kulesihlahla semgungumence: ‘Siphuka uyomila elwandle!’ futsi besitawuvele sinilalele.+
7 “Ngubani kini longatsi nakanesisebenti lesilimako nobe leselusako bese utsi kuso nasibuya ensimini: ‘Wota udle nami etafuleni’? 8 Ngeke yini atsi kuso: ‘Ngilungisele kudla, uvunule sidziya sakho ungiletsele tintfo lengitidzingako ngize ngicedze kudla nekunatsa, ngemuva kwaloko, nawe ungadla futsi unatse’? 9 Uyasibonga yini lesisebenti lesente loko bekufanele sikwente? 10 Ngendlela lefanako, nani nasenikwente konkhe lebenitfunywe kona, nibotsi: ‘Sitisebenti letingakafaneli kubongwa. Lesikwentile nguloko lebekufanele sikwente.’”+
11 Ngesikhatsi aya eJerusalema, wendlula emkhatsini weSamariya neGalile. 12 Watsi nakangena kulelinye lidolobhana, kweta emadvodza langu-10 lebekanebulephelo, kodvwa ema khashanyana.+ 13 Amemeta atsi: “Jesu, Mfundzisi, sihawukele!” 14 Ngesikhatsi awabona, watsi kuwo: “Hambani niye kubaphristi nitivete kubo.”+ Njengobe lamadvodza ahamba, ahlambululeka.+ 15 Lenye yawo yatsi nayibona kutsi seyiphilile yabuyela emuva, yakhatimulisa Nkulunkulu ngelivi lelikhulu. 16 Yafike yaguca yakhotsama etinyaweni taJesu, yambonga. Lendvodza beyingumSamariya.+ 17 Jesu watsi: “Angitsi kuhlanjululwe emadvodza langu-10? Pho aphi lalamanye langu-9? 18 Ikhona yini lenye indvodza lebuyile yadvumisa Nkulunkulu, ngaphandle kwalendvodza yakulesinye sive?” 19 Wabese utsi kulendvodza: “Sukuma uhambe; kukholwa kwakho kukuphilisile.”+
20 Ngalelinye lilanga baFarisi bambuta kutsi uMbuso waNkulunkulu utawufika nini,+ kodvwa wabaphendvula watsi: “UMbuso waNkulunkulu ngeke ute ngendlela letawubonwa ngibo bonkhe bantfu; 21 futsi bantfu ngeke batsi: ‘Asenibuke, nangu lapha!’ nobe batsi: ‘Nanguya!’ Ngobe uMbuso waNkulunkulu usemkhatsini wenu.”*+
22 Ngako watsi kubafundzi bakhe: “Siyeta sikhatsi lapho nitawufisa shengatsi ningabona linye nje lemalanga eNdvodzana yemuntfu, kodvwa ngeke nilibone. 23 Bantfu batawutsi kini: ‘Asenibuke lapha!’ nobe batsi: ‘Asenibuke lana!’ Ningayi lapho futsi ningabalandzeli.+ 24 Njengobe umbane umanyata usuka kulenye incenye yelizulu uya kulenye, itawuba njalo neNdvodzana yemuntfu+ ngalelolanga.*+ 25 Kodvwa kufanele icale ihlupheke kakhulu futsi nalesitukulwane singayemukeli.+ 26 Ngetulu kwaloko, njengobe bekunjalo ngesikhatsi saNowa,+ atawuba njalo nemalanga ekuba khona kweNdvodzana yemuntfu:+ 27 Ngobe bantfu bebadla, banatsa, labadvuna batsatsa bafati, labasikati bendziswa, kwaze kwaba lilanga Nowa langena ngalo emkhunjini,+ naZamcolo wefika wababhubhisa bonkhe.+ 28 Ngendlela lefanako, njengobe kwenteka emalangeni aLoti:+ Bantfu bebadla, banatsa, batsenga, batsengisa, bahlanyela, futsi bakha. 29 Kodvwa ngelilanga Loti laphuma ngalo eSodoma, kwana umlilo nesibabule kuvela ezulwini kwababhubhisa bonkhe.+ 30 Kutawuba njalo nangelilanga lekwembulwa kweNdvodzana yemuntfu.+
31 “Ngalelolanga, umuntfu losetikwendlu akangehli kuyolandza tintfo takhe letisendlini, naloyo losemasimini akangabuyeli etintfweni letisemuva. 32 Khumbulani umkaLoti.+ 33 Nobe ngubani lofuna kusindzisa kuphila kwakhe utawulahlekelwa ngiko, kodvwa nobe ngubani lolahlekelwa ngiko utakusindzisa.+ 34 Ngiyanitjela ngitsi: Ngalobo busuku bantfu lababili batawube balele embhedzeni munye; lomunye utawutsatfwa, kodvwa lomunye ashiywe.+ 35 Bafati lababili batawube basila etjeni linye; lomunye utawutsatfwa, kodvwa lomunye ashiywe.” 36 *—— 37 Ngako bamphendvula batsi: “Kutawenteka kuphi loku Nkhosi?” Yena watsi kubo: “Lapho kunesidvumbu khona, ngulapho nemangce abutsana khona.”+