2 Tikhronike
10 Rehobhowamu waya eShekhemu+ ngobe onkhe ema-Israyeli aya eShekhemu ayombeka kutsi abe yinkhosi.+ 2 Ngekushesha nje Jerobowamu+ indvodzana yaNebati nakakuva loko (abesolo aseGibhithe ngobe abebalekele iNkhosi Solomoni),+ wabuya asuka eGibhithe. 3 Babese batfumela kutsi ayolandvwa futsi Jerobowamu kanye nawo onkhe ema-Israyeli, baya kuRehobhowamu bafike batsi: 4 “Babe wakho wasetfwesa lijoka lelimatima.+ Kodvwa nangabe wena ungenta kutsi lomsebenti lomatima lebekasentisa wona ube melula, bese ulenta libe lula lelijoka lelimatima* labekasetfwese lona, tsine sitawuba ngakuwe.”
5 Rehobhowamu wabaphendvula watsi: “Nibobuya ngemuva kwemalanga lamatsatfu.” Labantfu babese bayahamba.+ 6 INkhosi Rehobhowamu yabese iyokhuluma nemadvodza lamadzala labekasebentela babe wayo Solomoni nakasaphila, yafike yatsi: “Ningangeluleka nitsi ngingabaphendvula ngitsini labantfu?” 7 Ayiphendvula atsi: “Nangabe wena utabaphatsa kahle labantfu, ubajabulise futsi ubanike imphendvulo labatayitsandza, batawuhlale batinceku takho.”
8 Nobe kunjalo, Rehobhowamu akasitsatsanga seluleko lasiniketwa ngulamadvodza lamadzala futsi wafuna seluleko emajaheni lakhula nawo, labesekatinceku takhe.+ 9 Wabuta lamajaha watsi: “Ngusiphi seluleko leninganginika sona ngendlela lesingaphendvula ngayo labantfu labatsite kimi: ‘Yenta lelijoka lesaletfweswa ngubabe wakho libe melula’?” 10 Lamajaha lebekakhule naye amphendvula atsi: “Naku lokufanele ukusho kulabantfu labatsite: ‘Babe wakho wasetfwesa lijoka lelimatima kodvwa wena kufanele ulente libe lula’; naku lokufanele ubatjele kona: ‘Mine ngitawucinisa sandla kwendlula babe. 11 Babe wanetfwesa lijoka lelimatima, kodvwa mine ngitalenta libe matima kakhulu. Babe bekanijezisa ngesiswebhu, kodvwa mine ngitanibhambabula ngesiswebhu lesinetintfo leticijile.’”
12 Jerobowamu kanye nabo bonkhe bantfu beta kuRehobhowamu ngelilanga lesitsatfu njengobe lenkhosi beyitsite: “Nibobuya kimi ngelilanga lesitsatfu.”+ 13 Kodvwa inkhosi yabaphendvula ngelunya labantfu. Ngaleyo ndlela, iNkhosi Rehobhowamu ayizange isitsatse leseluleko lebeyisinikwe ngemadvodza lamadzala. 14 Yabaphendvula isebentisa seluleko lesitsetse kulamajaha, yatsi: “Babe wanetfwesa umtfwalo losindzako; mine-ke ngitawengeta unisindze kakhulu kunakucala. Babe bekanijezisa ngesiswebhu, kodvwa mine ngitanibhambabula ngesiswebhu lesinetintfo leticijile.” 15 Ngako lenkhosi ayizange ibalalele labantfu, ngobe nguNkulunkulu weliciniso+ lowabangela loko kuze kufezeke livi Jehova labelikhulume kuJerobowamu indvodzana yaNebati asebentisa umphrofethi Ahiya+ waseShilo.
16 Ngesikhatsi onkhe ema-Israyeli abona kutsi inkhosi yalile kuwalalela, ayiphendvula atsi: “Sinasabelo sini tsine kuDavide? Site lifa endvodzaneni yaJese. Buyelani kubonkulunkulu benu nine ma-Israyeli. Nyalo naka indlu yakho wena Davide.”+ Ngaleyo ndlela, onkhe ema-Israyeli abuyela emakhaya* awo.+
17 Kodvwa Rehobhowamu wachubeka nekubusa ema-Israyeli labekahlala emadolobheni akaJuda.+
18 INkhosi Rehobhowamu yabese itfuma Hadoramu+ lobekayindvuna yalabo lebebasebentela inkhosi, kodvwa ema-Israyeli amgcoba ngematje waze wafa. INkhosi Rehobhowamu yona yakhona kugibela inkalishi yayo yabalekela eJerusalema.+ 19 Kuze kube ngulamuhla, ema-Israyeli solo avukela indlu yaDavide.