Incwadzi Yekucala YemaKhosi
2 Ngesikhatsi sekusondzela kufa kwaDavide, waniketa indvodzana yakhe Solomoni nayi imiyalo: 2 “Sengitakufa.* Ngako cina+ futsi ukhombise kutsi uyindvodza.+ 3 Kufanele umhloniphe Jehova Nkulunkulu wakho ngekutsi uhambe ngetindlela takhe futsi ugcine timiso takhe, imiyalo yakhe, imitsetfo yakhe kanye netikhumbuto takhe njengobe tibhalwe eMtsetfweni waMosi;+ nawenta njalo utawuphumelela* kuko konkhe lokwentako, nanobe ngabe ngukuphi lapho uya khona. 4 Jehova utasigcina setsembiso lasenta mayelana nami lesitsi: ‘Nangabe emadvodzana akho ayicaphelisisa indlela lahamba ngayo ngekutsi etsembeke kimi, ngayo yonkhe inhlitiyo yawo nemphefumulo* wawo,+ angeke kwenteke kutsi kungabi nendvodza esitukulwaneni sakho* letawuhlala esihlaweni sebukhosi saka-Israyeli.’+
5 “Ukwati kahle nalangenta kona Jowabe indvodzana yaSeruya. Loko lakwenta etindvuneni letimbili temabutfo aka-Israyeli, bo-Abneri+ indvodzana yaNeri na-Amasa+ indvodzana yaJetheri. Wababulala, wacitsa ingati+ ngesikhatsi sekuthula waphindze watsela libhande leliselukhalo lwakhe netincabule letisetinyaweni takhe, ngengati yemphi. 6 Kufanele wente ngekuhlakanipha futsi ungativumeli tinwele takhe tebumphunga kutsi tiye eThuneni* ngekuthula.+
7 “Kodvwa kufanele uwakhombise lutsandvo lolucotfo emadvodzana aBhazilayi+ umGileyadi futsi kufanele abe sekhatsi kwalabo labatawudla etafuleni lakho, ngobe angisekela+ ngesikhatsi ngibalekela umnakenu Absalomu.+
8 “Kukhona naShimeyi indvodzana yaGera umBhenjamini waseBhahurimu. Wangicalekisa kabuhlungu+ ngalesikhatsi ngiya eMahanayimu;+ kodvwa weta watongihlangabeta eJordane futsi ngafunga ngaJehova kuye ngatsi: ‘Ngeke ngikubulale ngenkemba.’+ 9 Ungamyekeli ungakamjezisi,+ ngobe wena uyindvodza lehlakaniphile futsi uyakwati lokufanele ukwente kuye; ungamvumeli atifele sekakhulile.”*+
10 Davide wabese uyafa futsi wangcwatjwa lapho kwangcwatjwa khona bokhokho bakhe eDolobheni laDavide.+ 11 Budze* besikhatsi sekubusa kwaDavide ka-Israyeli baba yiminyaka lengu-40. EHebroni+ wabusa iminyaka lengu-7, kantsi eJerusalema wabusa iminyaka lengu-33.+
12 Solomoni wabese uhlala esihlalweni sebukhosi sababe wakhe Davide futsi kancane kancane bukhosi bakhe bacina.+
13 Ngekuhamba kwesikhatsi Adoniya indvodzana yaHagithi waya kuBhatisheba, make waSolomoni, lowambuta watsi: “Ute ngekuthula yini?” Adoniya waphendvula watsi: “Yebo, ngite ngekuthula.” 14 Wabese utsi: “Kukhona lengicela kukusho kuwe.” Bhatisheba watsi: “Khuluma.” 15 Wachubeka watsi: “Wati kahle kutsi bukhosi bekufanele bube bami futsi onkhe ema-Israyeli bekalindzele* kutsi ngibe yinkhosi;+ kodvwa lobukhosi bangilahlekela, batsatfwa ngumnaketfu ngobe nguJehova lowamnika bona.+ 16 Kodvwa kunentfo yinye nje lengiyicelako kuwe. Ungangaleli.” Yena watsi: “Khuluma.” 17 Adoniya wabese utsi: “Ngicela ungicelele enkhosini Solomoni, ngobe kuwe itawuvuma, kutsi inginike Abishagi+ umShunemu abe ngumfati wami.” 18 Bhatisheba waphendvula watsi: “Kute inkinga. Ngitakukhulumela nenkhosi.”
19 Ngako Bhatisheba waya eNkhosini Solomoni wayokhulumela Adoniya. Nakangena, inkhosi yasukuma yamhlangabeta futsi yamkhotsamela. Ngemuva kwaloko inkhosi yahlala esihlalweni sayo sebukhosi yabese itsi akubekelwe make wayo sihlalo sebukhosi kuze ahlale ngesekudla sayo. 20 Bhatisheba wabese utsi: “Kunentfo lencane nje lengifisa kuyicela kuwe. Ngicela ungangicoshi.” Inkhosi yamphendvula yatsi: “Khululeka make; angeke ngikucoshe.” 21 Watsi: “Ngicela Abishagi umShunemu anikwe umnakenu Adoniya kutsi abe ngumfati wakhe.” 22 Nayiva loko, iNkhosi Solomoni yaphendvula make wayo yatsi: “Yini lekwenta ucele kutsi Abishagi umShunemu abe ngumfati wa-Adoniya? Kusho kutsi umcelela nebukhosi+ kimi ngobe mdzala kunami+ futsi usekelwa ngu-Abiyatha umphristi naJowabe+ indvodzana yaSeruya.”+
23 INkhosi Solomoni yabese ifunga ngaJehova yatsi: “Shengatsi Nkulunkulu angangijezisa kakhulu nangingete ngambulala Adoniya ngenca yalesicelo sakhe. 24 Ngako ngifunga Jehova Nkulunkulu lophilako, longibeke ngacina+ nalongihlalise esihlalweni sebukhosi saDavide babe wami waphindze wangakhela nendlu*+ njengobe beketsembisile, ngitsi Adoniya utawufa+ lamuhla.” 25 Ngekushesha iNkhosi Solomoni yatfumela Bhenaya+ indvodzana yaJehoyada, waphuma wayohlasela Adoniya futsi wambulala.
26 Inkhosi yabese itsi ku-Abiyatha+ umphristi: “Hamba uye emasimini akho e-Anathothi!+ Ufanelwe kufa kodvwa ngeke ngikubulale lamuhla ngobe wetfwala Libhokisi leNkhosi Lephakeme Jehova embikwababe wami Davide+ futsi bewunaye kubo bonkhe bumatima labhekana nabo.”+ 27 Ngako Solomoni wamyekelisa Abiyatha kuba ngumphristi waJehova kute kugcwaliseke livi Jehova lalikhuluma eShilo+ lelimayelana nendlu ya-Eli.+
28 Tatsi letindzaba natifika kuJowabe—ngobe bekasekela Adoniya+ kodvwa akamsekelanga Absalomu+—Jowabe wabaleka waya ethendeni laJehova+ wafike wabamba timphondvo teli-al’thare. 29 Kwase kufika umbiko eNkhosini Solomoni lotsi: “Jowabe ubalekele ethendeni laJehova futsi ulapho eceleni kweli-al’thare.” Solomoni wase utfumela Bhenaya indvodzana yaJehoyada, watsi: “Hamba uyombulala!” 30 Ngako Bhenaya wahamba waya ethendeni laJehova wafike watsi kuJowabe: “Naku lokushiwo yinkhosi, ‘Phuma lapho!’” Kodvwa yena watsi: “Hhayi ngitawufela lapha.” Bhenaya wabuyisela imphendvulo enkhosini wafike watsi: “Jowabe ungiphendvule kanjena.” 31 Inkhosi yabese itsi kuBhenaya: “Yenta njengobe ashito; mbulale bese uyamngcwaba, futsi ususe kimi nasendlini yababe ingati lete licala leyacitfwa nguJowabe.+ 32 Jehova utalibeka kuye licala lengati ngobe wahlasela futsi wabulala emadvodza lamabili ngenkemba, babe wami Davide angati. Lamadvodza bekalunge kakhulu futsi bekancono kunaye, bo-Abneri+ indvodzana yaNeri lobekayindvuna yelibutfo laka-Israyeli+ na-Amasa+ indvodzana yaJetheri lobekayindvuna yelibutfo lakaJuda.+ 33 Licala lengati yabo litawuba senhloko yaJowabe nasentalelwaneni yakhe kuze kube phakadze;+ kodvwa shengatsi kuDavide, entalelwaneni yakhe, endlini yakhe nasesihlalweni sakhe sebukhosi, kungaba nekuthula lokuvela kuJehova kuze kube phakadze.” 34 Bhenaya indvodzana yaJehoyada wakhuphuka wayohlasela Jowabe wambulala, wase ungcwatjwa eceleni kwendlu yakhe lesehlane. 35 Inkhosi yabese ibeka Bhenaya+ indvodzana yaJehoyada kutsi abe yindvuna yelibutfo esikhundleni saJowabe futsi yabeka Sadoki+ umphristi esikhundleni sa-Abiyatha.
36 Inkhosi yabese ibita Shimeyi+ yatsi kuye: “Takhele indlu eJerusalema futsi uhlale khona; ungacali uphume uye kulenye indzawo. 37 Ngelilanga loyawuphuma ngalo wewele Sihosha saseKhidroni,+ ubokwati kutsi utawufa. Ingati yakho itawuba senhloko yakho.” 38 Shimeyi waphendvula inkhosi watsi: “Loku lokushoko kukahle. Inceku yakho itakwenta njengobe inkhosi yayo ishito.” Ngako Shimeyi wahlala eJerusalema emalanga lamanyenti.
39 Nobe kunjalo, ekupheleni kweminyaka lemitsatfu, tigcili taShimeyi letimbili tabaleka taya ku-Akhishi+ indvodzana yaMakha inkhosi yaseGathi. Ngesikhatsi Shimeyi atfola umbiko lotsi: “Tigcili takho tiseGathi,” 40 ngekushesha wagibela imbongolo yakhe wahamba wayobona Akhishi eGathi kuze atfole letigcili takhe. Shimeyi watsi nakabuya eGathi naletigcili, 41 kwefika umbiko kuSolomoni lotsi: “Shimeyi bekaphumile eJerusalema waya eGathi futsi sewubuyile.” 42 Nayiva lombiko inkhosi yabita Shimeyi, yatsi kuye: “Angizange ngikufungise yini ngaJehova futsi ngakwecwayisa ngatsi kuwe: ‘Ngelilanga loyawuphuma ngalo lapha uye kulenye indzawo, ubokwati kutsi utawukufa’? Akusuwe yini lowatsi kimi, ‘Loku lokushoko kukahle; ngitakwenta njengobe ushito’?+ 43 Ubangelwe yini kutsi ungasihloniphi sifungo lowasenta kuJehova kanye nemyalo lengakunika wona?” 44 Inkhosi yabese itsi kuShimeyi: “Enhlitiyweni yakho uyabati bonkhe buhlungu lowabuvisa babe wami Davide,+ futsi Jehova utawuphindzisela lobo buhlungu kuwe.+ 45 Kodvwa iNkhosi Solomoni itawubusiswa+ nesihlalo sebukhosi saDavide sitawukuma sicine embikwaJehova kuze kube phakadze.” 46 Ngenca yaloko inkhosi yakhuluma naBhenaya indvodzana yaJehoyada, lowahamba wahlasela Shimeyi futsi wambulala.+
Ngaleyondlela umbuso wema wacina esandleni saSolomoni.+