Incwadzi Yesibili YaSamuweli
16 Watsi Davide nase endlule kancane esicongweni sentsaba,+ Siba,+ inceku yaMefiboshethi,+ bekalapho kute abonane naDavide futsi bekachuba timbongolo letimbili letiboshelwe tilayishe tinkhwa letingu-200, emacebelengwane langu-100 lentiwe ngemagilebisi lomisiwe, nemacebelengwane langu-100 lentiwe ngetitselo tasehlobo,* kanye nelijeke lelikhulu lelineliwayini.+ 2 Inkhosi yase itsi kuSiba: “Utiletseleni letintfo?” Siba wayiphendvula watsi: “Letimbongolo titawugitjelwa ngumndeni wenkhosi, tinkhwa kanye netitselo tasehlobo titawudliwa ngemajaha kantsi liwayini lona litawunatfwa ngulabo labasehlane lesebadziniwe.”+ 3 Inkhosi yase itsi kuye: “Iphi indvodzana yenkhosi yakho?”+ Siba watsi enkhosini: “Seyihlala eJerusalema futsi itsite, ‘Lamuhla indlu yaka-Israyeli itawubuyisa kimi umbuso wababe.’”+ 4 Inkhosi yabese itsi kuSiba: “Tonkhe tintfo taMefiboshethi setakho.”+ Siba waphendvula watsi: “Ngikhotsama embikwakho nkhosi futsi ngicela kutfola umusa emehlweni akho.”+
5 Ngesikhatsi iNkhosi Davide ifika eBhahurimu, indvodza levela emndenini waSawula lebekutsiwa nguShimeyi,+ indvodzana yaGera, yaphuma imemeta tinhlamba itibhekise enkhosini njengobe isondzela.+ 6 Beyijikijela iNkhosi Davide ngematje kanye nato tonkhe tinceku tayo lokufaka ekhatsi bonkhe bantfu nemachawe labekangesekudla nesencele sayo. 7 Shimeyi bekacalekisa atsi: “Phuma, phuma wena ndvodza lenelicala lengati! Uyindvodza lengenamsebenti! 8 Jehova ubeke etikwakho lonkhe lelicala lengati lonalo ngenca yendlu yaSawula, wena lobe yinkhosi esikhundleni sakhe. Kodvwa Jehova undlulisela umbuso etandleni ta-Absalomu, indvodzana yakho. Nyalo inhlekelele seyisetikwakho ngobe uyindvodza lenelicala lengati!”+
9 Abishayi indvodzana yaSeruya,+ wabese utsi enkhosini: “Kungani lenja+ lefile icalekisa inkhosi yami?+ Ngiyacela nkhosi, ngivumele ngicondze kuyo ngiyijube inhloko.”+ 10 Kodvwa inkhosi yatsi: “Madvodzana aSeruya+ ningenaphi nine kulendzaba? Myekeleni angicalekise+ ngoba Jehova utsite kuye,+ ‘Calekisa Davide!’ Ngako ngubani longatsi, ‘Ukwentelani loko?’” 11 Davide wabese utsi ku-Abishayi nato tonkhe tinceku takhe: “Indvodzana yami letalwa ngimi ifuna kungibulala,*+ kangakanani-ke ngalomBhenjamini!+ Myekeleni angicalekise ngobe utfunywe nguJehova! 12 Mhlawumbe Jehova utakubona kuhlupheka kwami,+ futsi Jehova utawubuyisela lokuhle kimi esikhundleni saleticalekiso lengicalekiswa ngato lamuhla.”+ 13 Davide kanye nemadvodza lebekanawo bachubeka bewuka ngemgwaco ngesikhatsi Shimeyi lobekahamba eceleni kwentsaba macondzana nabo, amemeta ticalekiso+ futsi abajikijela ngematje kanye nemhlaba lomnyenti.
14 Ngemuva kwesikhatsi lesidze inkhosi nebantfu lebebanayo befika endzaweni lebebaya kuyo badzinwe kakhulu, futsi befike baphumula.
15 Ngesikhatsi lesifanako, Absalomu kanye nawo onkhe emadvodza aka-Israyeli bafika eJerusalema, na-Ahithofeli+ bekahamba nabo. 16 Ngesikhatsi Hushayi+ um-Akhi,+ umngani* waDavide, efika ku-Absalomu watsi: “Lunwele loludze nkhosi!+ Lunwele loludze nkhosi! 17 Nakeva loko, Absalomu watsi kuHushayi: “Lolokwentako kukutsandza umngani wakho yini? Awukahambi ngani naye?” 18 Hushayi watsi ku-Absalomu: “Chake, mine ngisekela loyo lokhetfwe nguJehova, nalokhetfwe ngulabantfu kanye nawo onkhe emadvodza aka-Israyeli. Ngitawuhlala naye. 19 Ngiyaphindza ngitsi, ngubani lokufanele ngibe ngephansi kwakhe? Akusiyo yini indvodzana yakhe? Njengobe bengingephansi kwababe wakho, nawe ngitawuba ngephansi kwakho.”+
20 Absalomu wabese utsi ku-Ahithofeli: “Ngicela seluleko sakho.+ Kufanele sente njani?” 21 Ahithofeli watsi ku-Absalomu: “Lala nemaphovela+ ababe wakho lawashiyile kute anakekele indlu.*+ Onkhe ema-Israyeli atawubese ayeva kutsi utente waba sinengiso kubabe wakho futsi labo labakusekelako batawucina.” 22 Ngako bamisela Absalomu lithende eluphahleni+ lwendlu futsi walala nemaphovela ababe wakhe+ embikwawo onkhe ema-Israyeli.+
23 Ngalawo malanga seluleko sa-Ahithofeli+ besitsatfwa njengelivi lelivela kuNkulunkulu weliciniso. BoDavide na-Absalomu bebasihlonipha kanjalo-ke seluleko sa-Ahithofeli.