Incwadzi Yesibili YaSamuweli
19 Jowabe watfola umbiko lotsi: “Inkhosi iyakhala futsi iyalila nga-Absalomu.”+ 2 Ngako kuncoba* kwangalelolanga kwagucuka kwaba sililo kubo bonkhe bantfu ngobe beva kutsi inkhosi idzabuke kakhulu ngekufa kwendvodzana yayo. 3 Bantfu bebathulile nabajika babuyela edolobheni+ ngalelolanga futsi bebafana nebantfu labanemahloni ngobe bebabalekile emphini. 4 Inkhosi yatimbonya buso yachubeka nekukhala kakhulu itsi: “Awu! Ndvodzana yami Absalomu! Absalomu ndvodzana yami, ndvodzana yami!”+
5 Jowabe wabese uya endlini yenkhosi wafike watsi kuyo: “Lamuhla utitsele ngelihlazo tonkhe tinceku takho letisindzise kuphila* kwakho, tasindzisa kuphila kwemadvodzana akho,*+ kwemadvodzakati akho,+ kwebafati bakho kanye nekwemaphovela akho.+ 6 Utsandza labakwenyanyako futsi wenyanya labakutsandzako, ngobe ukwente kwacaca lamuhla kutsi tindvuna takho netinceku takho atisilutfo kuwe, ngobe ngiyaciniseka kutsi kube Absalomu uyaphila lamuhla futsi kube tsine sonkhe sifile, loko bekungeke kube yinkinga kuwe. 7 Sukuma nyalo uhambe uyocinisekisa* tinceku takho ngobe ngifunga Jehova kutsi nawungenti njalo, kute umuntfu lotawusala nawe lamuhla ebusuku. Loko kutawuba buhlungu kakhulu kuwe kwendlula bonkhe buhlungu lowake wabuva kusukela ebusheni bakho kuze kube ngunyalo.” 8 Ngako inkhosi yasukuma yaya esangweni lelidolobha yafike yahlala khona, futsi bonkhe bantfu batjelwa kwatsiwa: “Inkhosi ihleti esangweni.” Ngemuva kwaloko, bonkhe bantfu beta embikwenkhosi.
Kodvwa ema-Israyeli bekabalekile, nguloyo naloyo waya ekhaya lakhe.+ 9 Bonkhe bantfu kuto tonkhe tive taka-Israyeli bebaphikisana batsi: “Inkhosi yasisindzisa etitseni tetfu+ yaphindze yasisindzisa nakumaFilisti; kodvwa nyalo seyibalekile kulelive ngenca ya-Absalomu.+ 10 Na-Absalomu lesamgcoba kutsi abe yinkhosi yetfu+ ufile emphini.+ Manje nibangelwa yini kutsi ningenti lutfo kute nibuyise inkhosi?”
11 Inkhosi Davide yatfumelela baphristi, boSadoki+ na-Abiyatha,+ umlayeto lotsi: “Khulumani nemadvodza lamadzala akaJuda+ nitsi, ‘Kungani kufanele nibe bekugcina ekubuyiseni inkhosi endlini yayo kantsi livi lawo onkhe ema-Israyeli lifikile enkhosini ngesikhatsi isendlini yayo? 12 Nine nibomnaketfu; nitihlobo tami tengati.* Kubangelwa yini kutsi nibe bekugcina ekubuyiseni inkhosi?’ 13 Kufanele utsi ku-Amasa,+ ‘Wena awusilo yini litsambo lami nengati yami? Ngako shengatsi Nkulunkulu angangijezisa kabuhlungu nangabe ungeke ube yindvuna yelibutfo lami esikhundleni saJowabe,+ kusukela nyalo.’”
14 Inkhosi yatizuza* kanjalo tinhlitiyo tawo onkhe emadvodza akaJuda, kwaba shengatsi ayindvodza yinye. Abese atfumela livi enkhosini lelitsi: “Buya nkhosi kanye nato tonkhe tinceku takho.”
15 Inkhosi yabuyela emuva futsi yagcina ifike eJordane, bantfu bakaJuda beta eGilgali+ kute bahlangane nenkhosi baphindze bayisingatse futsi bayewete iJordane. 16 Ngemuva kwaloko, Shimeyi+ indvodzana yaGera umBhenjamini waseBhahurimu, wehlela enkhosini ngekushesha anemadvodza akaJuda kute ayohlangana neNkhosi Davide, 17 futsi bekunemadvodza langu-1 000 akaBhenjamini labekanye naye. NaSiba,+ inceku yendlu yaSawula, nemadvodzana akhe langu-15 kanye netinceku letingu-20, bewukela eMfuleni iJordane ngekushesha isengakafiki inkhosi. 18 Wewela* ngelitubuko kuze awetele ngesheya umndeni wenkhosi futsi ente nobe ngabe yini lebekayibona ikahle. Kodvwa Shimeyi indvodzana yaGera waguca embikwenkhosi ngesikhatsi inkhosi seyitowela iJordane. 19 Watsi enkhosini: “Inkhosi yami ngicela ingangibeki licala, futsi ngicela ingakukhumbuli lokubi lokwentiwa yinceku yayo+ ngalelilanga inkhosi yami ibaleka eJerusalema. Shengatsi inkhosi yami ingete yakufaka enhlitiyweni, 20 ngobe inceku yakho yati kahle kutsi yonile; kungako lamuhla ngibe wekucala kuyo yonkhe indlu yaJosefa kwehla ngite lapha ngitohlangana nenkhosi yami.”
21 Kusenjalo, Abishayi+ indvodzana yaSeruya+ watsi: “Shimeyi akukafaneli yini abulawe ngalesento lasenta, ngobe wacalekisa logcotjiwe waJehova?”+ 22 Davide watsi: “Ningenaphi kulendzaba nine madvodzana aSeruya+ kutsi ningaze nimelane nami lamuhla? Kufanele yini kube khona lobulawako lamuhla ka-Israyeli? Mine angati yini kutsi lamuhla ngiyinkhosi ka-Israyeli?” 23 Inkhosi yase itsi kuShimeyi: “Angeke ufe.” Inkhosi yafunga kuye.+
24 Mefiboshethi+ umtukulu waSawula naye wehla kuze abonane nenkhosi. Bekangakaze ageze tinyawo* takhe, angakaze alungise silevu futsi angakaze awashe netembatfo takhe kusukela ngelilanga inkhosi leyahamba ngalo kuze kube ngulapho ibuya ngekuthula. 25 Ngesikhatsi efika* eJerusalema atobonana nenkhosi, yona yambuta yatsi: “YeMefiboshethi, kungani ungazange uhambe nami?” 26 Yena waphendvula watsi: “Nkhosi yami, inceku yami+ yangikhohlisa. Mine* bengitsite kuyo, ‘Bophela imbongolo yami kuze ngiyigibele ngiye enkhosini,’ ngobe ngikhubateke* tinyawo.+ 27 Kepha yanginyundzela kuwe nkhosi yami.+ Nobe kunjalo, inkhosi yami injengengilosi yaNkulunkulu weliciniso, ngako yenta nome yini loyibona ikahle. 28 Wonkhe umndeni wababe bekufanele ngabe ubulewe yinkhosi yami, kodvwa wena nkhosi uvumele inceku yakho kutsi ibe ngulomunye walabo labadla etafuleni lakho.+ Ngako nginalungelo lini lekutikhalela enkhosini?”
29 Inkhosi yabese itsi: “Ubangelwa yini kutsi uchubeke ukhuluma ngalendlela? Sengivele ngisitsetse sincumo sekutsi nigiyelane lensimu naSiba.”+ 30 Nakeva loko, Mefiboshethi watsi enkhosini: “Akayitsatse yonkhe ngobe inkhosi yami ifike ngekuthula endlini yayo.”
31 Bhazilayi+ umGileyadi wabese usuka eRogelimu waya eJordane kute asingatse inkhosi, ayewete iJordane. 32 Bhazilayi abesamdzala kakhulu, aneminyaka lengu-80 futsi bekaniketa inkhosi kudla ngalesikhatsi ihlala eMahanayimu+ futsi abeyindvodza lenjinge kakhulu. 33 Ngako inkhosi yatsi kuBhazilayi: “Yewela nami, ngitakondla eJerusalema.”+ 34 Bhazilayi watsi enkhosini: “Mangakhi emalanga* lasasele ngaphambi kwekutsi ngife, kutsi ngingakhuphuka nenkhosi ngiye eJerusalema? 35 Lamuhla sengineminyaka lengu-80 budzala.+ Ngingakhona yini kwehlukanisa emkhatsini walokuhle nalokubi? Ngingakhona yini, mine nceku yakho, kuva loko lengikudlako nalengikunatsako? Ngisengakhona yini kulalela livi lebahlabeleli labadvuna nalabasikati?+ Ngako kungani kufanele inceku yakho ibe ngumtfwalo enkhosini yami? 36 Kwenele kutsi inceku yakho iletse inkhosi lapha eJordane. Kungani kufanele kutsi inkhosi ingibhadale ngalendlela? 37 Ngiyacela nkhosi, ngivumele kutsi ngijike ngiyofela edolobheni lakitsi eceleni kwalapho kwangcwatjwa khona bobabe namake.+ Nayi inceku yakho Khimhamu.+ Ngicela wewele naye nkhosi yami futsi ungamentela noma ngabe yini loyibona iyinhle emehlweni akho.”
38 Ngako inkhosi yatsi: “Khimhamu utakwewela nami, futsi ngitamentela noma ngabe yini lebonakala iyinhle emehlweni akho; noma ngabe yini loyicela kimi, ngitakwentela yona.” 39 Bonkhe bantfu babese bewela iJordane. Yatsi inkhosi nayewela, yacabuza Bhazilayi+ yaphindze yambusisa; Bhazilayi wabese ubuyela ekhaya. 40 Ngesikhatsi inkhosi yewelela eGilgali,+ Khimhamu wewela nayo. Bonkhe bantfu bakaJuda kanye nehhafu yebantfu baka-Israyeli basingatsa inkhosi nayewela.+
41 Onkhe emadvodza aka-Israyeli abese aya enkhosini efike atsi kuyo: “Kubangelwe yini kutsi bomnaketfu, emadvodza akaJuda, akwebe futsi awele iJordane nenkhosi nemndeni wayo kanye nawo onkhe emadvodza aDavide?”+ 42 Onkhe emadvodza akaJuda aphendvula lamadvodza aka-Israyeli atsi: “Kungobe inkhosi ihlobene natsi.+ Kungani nisitfukutselele ngaloku? Kukhona yini lesikudlile kwenkhosi, nobe kukhona yini sipho lesiniketwe sona?”
43 Kodvwa emadvodza aka-Israyeli aphendvula lawa akaJuda atsi: “Tsine sitive letingu-10, ngako-ke tsine lesikushoko kuDavide kunesisindvo kunalokushiwo ngini. Pho nisedzelele leni? Bekungakafaneli yini kube ngitsi lesibuyisa inkhosi yetfu kucala?” Nobe kunjalo, lokwakhulunywa ngemaJuda kwaba nesisindvo kwendlula loko lokwakhulunywa ngema-Israyeli.