Incwadzi Yekucala YemaKhosi

15 Ngemnyaka wesi-18 wekubusa kweNkhosi Jerobowamu+ indvodzana yaNebati, Abijamu waba yinkhosi yakaJuda.+ 2 Wabusa iminyaka lemitsatfu eJerusalema. Libito lamake wakhe bekunguMakha,+ umtukulu wa-Abishalomu. 3 Abijamu wachubeka enta tonkhe tono lebetentiwe ngubabe wakhe ngaphambi kwekutsi yena abuse, futsi inhlitiyo yakhe beyingakatinikeli ngalokuphelele kuJehova Nkulunkulu wakhe. Akazange amlingise Davide khokho wakhe. 4 Nome kunjalo, ngenca yaDavide,+ Jehova Nkulunkulu wakhe wamniketa sibane eJerusalema+ ngekutsi emise indvodzana yakhe ngemuva kwakhe futsi agcine iJerusalema ikhona. 5 Davide wenta lokuhle emehlweni aJehova, futsi akazange aphambuke kunome ngabe yini Nkulunkulu lamyala kutsi ayente kuko konkhe kuphila kwakhe, ngaphandle kwendzaba ya-Uriya umHethi.+ 6 Bekunemphi emkhatsini waRehobhowamu naJerobowamu onkhe emalanga ekuphila kwakhe.+

7 Lomunye umlandvo wa-Abijamu nako konkhe lakwenta, kubhaliwe encwadzini yemlandvo wetikhatsi temakhosi akaJuda.+ Bekuphindze kube nemphi emkhatsini wa-Abijamu naJerobowamu.+ 8 Ngemuva kwaloko, Abijamu wangcwatjwa lapho kwangcwatjwa khona bokhokho bakhe, eDolobheni laDavide; futsi indvodzana yakhe Asa+ yaba yinkhosi ngemuva kwakhe.+

9 Ngemnyaka wesi-20 wekubusa kwaJerobowamu ka-Israyeli, Asa wacala kubusa kaJuda. 10 Wabusa iminyaka lengu-41 eJerusalema. Gogo wakhe bekunguMakha+ umtukulu wa-Abishalomu. 11 Asa wenta lokuhle emehlweni aJehova+ njengaDavide khokho wakhe. 12 Wacosha tingwadla letindvuna tasethempelini kulendzawo+ futsi wasusa tonkhe tithico letenyanyekako* lebetentiwe bokhokho bakhe.+ 13 Waze wasusa naMakha,+ gogo wakhe, esikhundleni sakhe sekuba yindlovukazi ngobe bekente sithico lesenyanyekako sekukhonta insika lengcwele.* Asa wajuba lesithico+ lesenyanyekako futsi wasishisa eSihosheni saseKhidroni.+ 14 Kodvwa tindzawo letiphakeme atizange tisuswe.+ Nome kunjalo, inhlitiyo ya-Asa beyitinikele ngalokuphelele kuJehova konkhe kuphila kwakhe.* 15 Waletsa endlini yaJehova tintfo lebetingcweliswe nguye nababe wakhe letifaka ekhatsi lisiliva, ligolide kanye naletinye tintfo.+

16 Bekunemphi lengapheli emkhatsini wa-Asa naBhasha+ inkhosi yaka-Israyeli. 17 INkhosi Bhasha yaka-Israyeli yakhuphuka yahlasela sive sakaJuda futsi yacala kwakha kabusha iRama+ kuze ivimbe bantfu kutsi bangaphumi futsi bangangeni eveni leNkhosi Asa yakaJuda.+ 18 Ngenca yaloko, Asa watsatsa lonkhe lisiliva neligolide lebelisele lapho bekugcinwa khona umcebo endlini yaJehova nalapho bekugcinwa khona umcebo endlini* yenkhosi, walinika tinceku takhe. INkhosi Asa yabese ilitfumela kuBheni-hadadi indvodzana yaThabrimoni loyindvodzana yaHeziyoni, inkhosi yaseSiriya.+ Bheni-hadadi bekahlala eDamaseko. INkhosi Asa yatsi: 19 “Kunesivumelwane emkhatsini wami nawe nasemkhatsini wababe wami nababe wakho. Ngikutfumelela lisiliva neligolide. Wota, utokwephula sivumelwane losente naBhasha inkhosi yaka-Israyeli kuze atoyekela kungihlasela.” 20 Bheni-hadadi wayilalela iNkhosi Asa futsi watfumela tindvuna telibutfo lakhe kutsi tiyohlasela emadolobha aka-Israyeli. Tancoba i-Ijoni,+ iDani,+ i-Abela-bhethi-makha, yonkhe iKhinerethi kanye nalo lonkhe lakaNaftali. 21 Watsi Bhasha nakakuva loko, ngekushesha wayekela kwakha* iRama futsi wachubeka nekuhlala eThisa.+ 22 INkhosi Asa yabese ibita onkhe emaJuda futsi kute lebekufanele asale. LamaJuda atsatsa onkhe ematje netingodvo taseRama lebetisetjentiswa nguBhasha nakakha. INkhosi Asa yakha* ngaletintfo iGeba+ kaBhenjamini kanye neMispa.+

23 Lomunye umlandvo wa-Asa, onkhe emandla akhe kanye nako konkhe lakwenta, nemadolobha lawakha,* kubhaliwe encwadzini yemlandvo wangetikhatsi temakhosi akaJuda. Kodvwa ekukhuleni kwakhe waphatfwa sifo setinyawo.+ 24 Ngemuva kwaloko, Asa wafa futsi wangcwatjwa lapho kwangcwatjwa khona bokhokho bakhe eDolobheni laDavide khokho wakhe; indvodzana yakhe Jehoshafati+ yaba yinkhosi ngemuva kwakhe.

25 Nadabi+ indvodzana yaJerobowamu, waba yinkhosi ka-Israyeli ngemnyaka wesibili wekubusa kwa-Asa kaJuda futsi Nadabi wabusa ka-Israyeli iminyaka lemibili. 26 Wachubeka enta lokubi emehlweni aJehova futsi walingisa babe wakhe, wenta nesono lesentiwa ngubabe+ wakhe lesabangela ema-Israyeli kutsi one.+ 27 Bhasha indvodzana ya-Ahiya wendlu ya-Isakhari wakhela Nadabi licebo futsi wambulala ngesikhatsi Nadabi nawo onkhe ema-Israyeli bavimbetela iGibhethoni+ lokuyindzawo yemaFilisti. 28 Ngako Bhasha wambulala ngemnyaka wesitsatfu wekubusa kweNkhosi Asa yakaJuda futsi waba yinkhosi esikhundleni sakhe. 29 Ngekushesha nje nakaba yinkhosi, wabulala bonkhe bantfu bendlu yaJerobowamu. Kute ngisho namunye lowasala lobekavela endlini yaJerobowamu; wabacotfula bonkhe njengobe Jehova bekakhulumile ngenceku yakhe Ahiya waseShilo.+ 30 Loku kwabangelwa tono lebetentiwe nguJerobowamu futsi nguye lobekabangele ema-Israyeli kutsi one ngobe yena wona kakhulu kuJehova Nkulunkulu wema-Israyeli. 31 Lomunye umlandvo waNadabi nako konkhe lakwenta, kubhaliwe encwadzini yemlandvo wangetikhatsi temakhosi aka-Israyeli. 32 Bekunemphi lengapheli emkhatsini wa-Asa neNkhosi Bhasha yaka-Israyeli.+

33 Ngemnyaka wesitsatfu wekubusa kweNkhosi Asa yakaJuda, Bhasha indvodzana ya-Ahiya waba yinkhosi eThisa wabusa onkhe ema-Israyeli futsi wabusa iminyaka lengu-24.+ 34 Kodvwa wachubeka nekwenta lokubi emehlweni aJehova+ futsi walingisa Jerobowamu. Wenta nesono lebesentiwa nguJerobowamu, abangela ema-Israyeli kutsi one.+