2 Tikhronike
19 INkhosi Jehoshafati yakaJuda yase ibuyela endlini* yayo leseJerusalema iphephile.*+ 2 Jehu+ indvodzana yaHanani+ umboni wemibono, waphuma wayohlangana neNkhosi Jehoshafati futsi watsi kuyo: “Kungiko yini lokutsi usite lababi+ futsi utsandze labo labatondza Jehova?+ Ngenca yaloko, intfukutselo yaJehova itakuvutsela. 3 Nobe kunjalo, kunetintfo letinhle letitfolakele kuwe,+ ngobe ususe tinsika letingcwele* kulelive futsi walungisa inhlitiyo yakho* kutsi ifune Nkulunkulu weliciniso.”+
4 Jehoshafati wachubeka ahlala eJerusalema futsi waphindze waya kubantfu kusukela eBherisheba kuyofika esifundzeni lesinetintsaba saka-Efrayimu+ kuze ababuyisele kuJehova Nkulunkulu wabokhokho babo.+ 5 Waphindze wabeka behluleli kulo lonkhe live; kuwo onkhe emadolobha labiyelwe akaJuda, lidolobha ngelidolobha.+ 6 Watsi kulabehluleli: “Kunakisiseni loko lenikwentako ngobe anikabekwa ngumuntfu kutsi nibe behluleli kodvwa nibekwe nguJehova futsi unani nanikhipha sehlulelo.+ 7 Shengatsi ningamhlonipha kakhulu Jehova.+ Kunakisiseni loko lenikwentako ngoba Jehova Nkulunkulu wenu ute kungalungi,+ akakhetsi muntfu+ futsi akadizelwa.”+
8 NaseJerusalema, Jehoshafati wabeka lamanye emaLevi nebaphristi naletinye tinhloko temindeni yaka-Israyeli kutsi babe behluleli, bahlulele egameni laJehova nekutsi bateke emacala ebantfu baseJerusalema.+ 9 Wabanika nangu umyalo: “Kufanele nente lemisebenti yenu ngendlela lekhombisa kutsi nesaba Jehova, futsi niwente ngekwetsembeka nangenhlitiyo lephelele. 10 Nome nini lapho bomnakenu labahlala emadolobheni akubo baletsa licala lelimayelana nekucitfwa kwengati+ nobe babuta mayelana nemtsetfo, nemyalo, timiso nobe tehlulelo, kufanele nibecwayise kuze bangabi nelicala kuJehova; naningakwenti loko, intfukutselo yakhe itanivutsela kanye nalabomnakenu. Nguloko-ke lokufanele nikwente kuze ningabi nelicala. 11 Nangu Amariya umphristi lomkhulu loniphetse kuto tonkhe tindzaba letimayelana naJehova.+ Zebadiya indvodzana ya-Ishmayeli ngumholi wendlu yakaJuda kuto tonkhe tindzaba letiphatselene nenkhosi. EmaLevi atawuba basiti benu. Cinani, nente lomsebenti futsi shengatsi Jehova angaba nalabo labenta lokuhle.”+