Incwadzi Yekucala YeTikhronike
28 Davide wabese uhlanganisa tonkhe tikhulu taka-Israyeli eJerusalema: Tiphatsimandla tetive, tindvuna temacembu+ lebekasebentela inkhosi, tindvuna tetinkhulungwane netemakhulu,+ tindvuna lebetibuke yonkhe imphahla nemfuyo yenkhosi+ nalebetibuke emadvodzana ayo,+ lokufaka ekhatsi netikhulu tasesigodlweni kanye nawo onkhe emadvodza lanemandla nalanelikhono.+ 2 INkhosi Davide yabese iyasukuma itsi:
“Ngilaleleni bomnaketfu nani sive sami. Bekusifiso sami kutsi ngakhe indlu ibe yindzawo yekuphumula yelibhokisi lesivumelwane saJehova iphindze ibe senabelo setinyawo taNkulunkulu wetfu,+ futsi ngenta emalungiselelo ekwakha.+ 3 Kodvwa Nkulunkulu weliciniso watsi kimi: ‘Angeke uyakhe indlu lebitwa ngelibito lami+ ngobe ulwe timphi letinyenti futsi ucitse ingati lenyenti.’+ 4 Nome kunjalo, Jehova Nkulunkulu wema-Israyeli wakhetsa mine kuyo yonkhe indlu yababe kutsi ngibe yinkhosi yaka-Israyeli phakadze,+ ngobe wakhetsa Juda kutsi abe ngumholi+ futsi endlini yaJuda, wakhetsa indlu yababe,+ kantsi emadvodzaneni ababe, wakhetsa mine kutsi ngibe yinkhosi ka-Israyeli.+ 5 Emadvodzaneni ami onkhe, njengobe Jehova angiphe emadvodzana lamanyenti,+ ukhetse Solomoni indvodzana yami+ kutsi ahlale esihlalweni sebukhosi saJehova, abuse ka-Israyeli.+
6 “Nkulunkulu watsi kimi: ‘NguSolomoni indvodzana yakho lotakwakha indlu yami kanye nemabala ami ngobe ngikhetse yena waba yindvodzana yami futsi mine ngitawuba ngubabe wakhe.+ 7 Ngitabucinisa bukhosi bakhe kuze kube phakadze+ nangabe ayigcina ngalokuphelele imiyalo yami netehlulelo tami,+ njengobe enta nyalo.’ 8 Ngako ngikhuluma embikwawo onkhe ema-Israyeli, libandla laJehova, naNkulunkulu wetfu eva, ngitsi: Yigcineni ngekucophelela yonkhe imiyalo yaJehova Nkulunkulu wenu niphindze niyifune kuze nititfolele live lelihle+ futsi nilendlulisele emadvodzaneni enu, libe lifa lawo kuze kube phakadze.
9 “Wena-ke Solomoni ndvodzana yami, mati kahle Nkulunkulu wababe wakho futsi umkhonte ngenhlitiyo lephelele*+ nangemphefumulo* lojabulako,* ngobe Jehova uhlola tonkhe tinhlitiyo+ futsi wati yonkhe imicabango.+ Nangabe umfuna, yena utatenta atfolakale kuwe+ kodvwa nangabe umshiya, utakulahla kuze kube phakadze.+ 10 Cabangisisa-ke manje, ngobe Jehova ukukhetsile kutsi wakhe indlu ibe yindzawo lengcwele. Bani nesibindzi, uhambe uyoyakha.”
11 Davide wabese uniketa indvodzana yakhe Solomoni ipulani+ yelivulandi+ netindlu talo, yemakamelo ekugcina tintfo, yemakamelo laseluphahleni, yemakamelo langekhatsi kanye neyendlu yekucolela.+ 12 Waniketa Solomoni ipulani yekwakha tonkhe tintfo lakhonjiswa tona ngekuphefumulelwa.* Wamniketa ipulani yemabala+ endlu yaJehova, yato tonkhe tindlu tekudlela lebetikuyo, yetindzawo tekugcina umcebo wendlu yaNkulunkulu weliciniso neyetindzawo tekugcina tintfo letingcwelisiwe;*+ 13 wamniketa neticondziso letimayelana nemacembu ebaphristi+ newemaLevi, netayo yonkhe imisebenti yendlu yaJehova, netekwakha tonkhe titja temsebenti wendlu yaJehova; 14 netesisindvo seligolide, teligolide lekwenta tonkhe titja temisebenti leyehlukehlukene, tesisindvo sato tonkhe titja telisiliva, netato tonkhe titja temisebenti leyehlukahlukene; 15 netesisindvo setintsi tetibane teligolide+ netibane tato teligolide, tesisindvo setintsi tetibane letehlukehlukene netibane tato, netesisindvo setintsi tetibane telisiliva, netelutsi lwesibane ngalunye kanye netibane tato kuye ngemisebenti yato; 16 kanye netesisindvo seligolide lematafula etinkhwa letititaki,*+ telitafula ngalinye kanye netelisiliva lematafula lakhiwe ngelisiliva, 17 tekwakha timfologo, tindishi, emajeke eligolide lelicwengisisiwe, netesisindvo setindishi letincane teligolide,+ netendishana ngayinye, netesisindvo setindishana telisiliva, netendishana ngayinye. 18 Waphindze wamniketa neticondziso tesisindvo seligolide lelicengisisiwe, teli-al’thare lemphepho+ kanye netalobekumelela incola,+ lokusho emakherubhi+ eligolide lebekavule timphiko tawo ambonye libhokisi lesivumelwane saJehova. 19 Davide watsi: “Sandla saJehova besikimi, futsi wanginika kuhlakanipha kuze ngiyibhale phansi yonkhe imininingwane yalepulani+ yelithempeli.”+
20 Davide wase utsi endvodzaneni yakhe Solomoni: “Bani nesibindzi ucine futsi uhambe uyosebenta. Ungesabi futsi ungetfuki ngobe Jehova Nkulunkulu, longuNkulunkulu wami unawe.+ Angeke akushiye nome akulahle+ kodvwa utawuba nawe kuze kube ngulapho wonkhe lomsebenti wendlu yaJehova sewuphelile. 21 Nankha emacembu ebaphristi+ newemaLevi+ latakwenta wonkhe umsebenti endlini yaNkulunkulu weliciniso. Unetisebenti letitinikele naletinelikhono lekwenta lonkhe luhlobo lwemsebenti+ kanye netindvuna+ nabo bonkhe bantfu labatawulandzela tonkhe ticondziso lotabanika tona.”