Imisebenti Yebaphostoli
18 Ngemuva kwaloko, Pawula wesuka e-Athene wahamba waze wafika eKhorinte. 2 Wakhandza lomunye umJuda lokutsiwa ngu-Akhwila,+ awasePhontusi, asandza kubuya eTaliyane naPhrisila umkakhe, ngenca yekutsi Klawudiyuse bekakhiphe umyalo wekutsi onkhe emaJuda aphume eRoma. Ngako Pawula waya kubo, 3 futsi ngesizatfu sekutsi naye bekenta umsebenti wekwakha emathende njengabo, wahlala ekhaya labo wasebenta nabo.+ 4 Bekavamise kwetfula tinkhulumo* esinagogeni+ njalo ngelisabatha,+ futsi etama kwenta emaJuda nemaGriki kutsi akholwe.
5 BoSilasi+ naThimothi+ batsi nabefika besuka eMasedoniya, Pawula waba matasatasa ngekushumayela livi laNkulunkulu, afakaza kumaJuda kutsi Jesu unguKhristu.+ 6 Ngesikhatsi achubeka amphikisa futsi akhuluma naye kabi, watsintsitsa tingubo+ takhe watsi kuwo: “Ingati yenu ayibe setikwenu.+ Mine ngimsulwa.+ Kusukela nyalo sengitawuya kubantfu betive.”+ 7 Wabese uyesuka* uya endlini yalenye indvodza lebeyikhonta Nkulunkulu, libito layo kunguThithiyusi Justusi. Lendlu beyisedvute nelisinagoge. 8 Khrispusi,+ lobekengamele lisinagoge, wakholwa yiNkhosi akanye nawo wonkhe umndeni wakhe. Bantfu baseKhorinte labanyenti labeva tindzaba letimnandzi nabo bakholwa base bayabhajatiswa. 9 Ebusuku, iNkhosi yakhuluma naPawula embonweni yatsi: “Ungesabi, kodvwa chubeka ukhuluma futsi ungabindzi, 10 ngobe mine nginawe.+ Kute umuntfu lotakuhlasela akulimate; ngobe nginebantfu labanyenti kulelidolobha.” 11 Ngako wahlala lapho umnyaka netinyanga letisitfupha, afundzisa bantfu livi laNkulunkulu.
12 Ngesikhatsi Galiyo angumbusi wesifundza* sase-Akhaya, emaJuda ahlanganyela Pawula, ambamba amyisa endzaweni lokutekelwa kuyo emacala, 13 atsi: “Lomuntfu ucindzetela bantfu kutsi bakhonte Nkulunkulu ngendlela lephambene nemtsetfo.” 14 Ngesikhatsi Pawula atsi uyakhuluma, Galiyo watsi kulamaJuda: “Kube bekusento lesibi nobe kulicala lelimatima, bengitawuba nesizatfu sekunilalela. 15 Kodvwa nangabe niphikisana ngenkhulumo, ngemagama, nangemtsetfo wenu,+ tiboneleni nine. Angifuni kwehlulela kuleto tindzaba.” 16 Ngemuva kwaloko wabacosha kulendzawo lokutekelwa kuyo emacala. 17 Bonkhe base babamba Sostenesi+ lowengamele lisinagoge, bamshayela kuyo leyo ndzawo. Kodvwa Galiyo akatihluphanga ngisho nakancane ngaloku.
18 Ngemuva kwekuhlala emalanga lambalwa, Pawula wavalelisa bazalwane, wahamba ngemkhumbi waya eSiriya, anaPhrisila na-Akhwila. NakaseKhenkhariya,+ wahhula tinwele takhe taba timfisha ngobe bekente sifungo. 19 Batsi nabefika e-Efesu, wabashiya wangena esinagogeni, wafike wabonisana nemaJuda.+ 20 Nanobe bebamncenga kutsi ahlalahlale, akazange avume, 21 kodvwa wabavalelisa, watsi: “Nangabe Jehova* avuma, ngitawuphindze ngibuye.” Ngako wesuka ngemkhumbi e-Efesu, 22 wahamba waze wefika eKhesariya. Waya eJerusalema, wafike wavusela libandla, wase uyesuka uya e-Antiyokhi.+
23 Ngemuva kwekuhlala sikhashana lapho, wesuka wavakashela tindzawo letehlukahlukene eGalathiya naseFrigiya,+ acinisa bonkhe bafundzi.+
24 Kwefika lomunye umJuda e-Efesu, lokutsiwa ngu-Apholosi,+ awase-Alekzandriya. Bekasikhulumi lesihle, ayati kahle nemiBhalo. 25 Bekafundziswe* tindlela taJehova,* avutsa emoyeni, akhuluma futsi afundzisa kahle ngetintfo letimayelana naJesu, kodvwa bekatayelene nelubhabhatiso lwaJohane kuphela. 26 Apholosi wakhuluma ngesibindzi esinagogeni. Ngesikhatsi boPhrisila na-Akhwila+ bamuva, bamtsatsa bamchazela kahle indlela yaNkulunkulu. 27 Ngesizatfu sekutsi bekafuna kuya e-Akhaya, bazalwane babhalela bafundzi balapho kutsi bamemukele ngemusa. Ngako nakefika, wabasita kakhulu labo lebebabe ngemakholwa ngenca yemusa lomkhulu waNkulunkulu; 28 ngobe wakuveta ngalokucacile embikwebantfu, kanye nangemdlandla kutsi timfundziso temaJuda tingemanga, futsi wakhombisa ngemiBhalo kutsi Jesu unguKhristu.+