2 Tikhronike
16 Ngemnyaka wesi-36 wekubusa kwa-Asa, iNkhosi Bhasha+ yaka-Israyeli yakhuphuka yahlasela sive sakaJuda futsi yacala kwakha kabusha iRama+ kuze ivimbe bantfu kutsi bangaphumi futsi bangangeni* eNkhosini Asa yakaJuda.+ 2 Ngenca yaloko, Asa wakhipha lisiliva neligolide labekugcinwa khona umcebo endlini yaJehova nasendlini*+ yenkhosi, wakutfumelela iNkhosi Bheni-hadadi yaseSiriya+ lebeyihlala eDamaseko, watsi: 3 “Kunesivumelwane emkhatsini wami nawe nasemkhatsini wababe wami nababe wakho. Ngikutfumelela nalo lisiliva neligolide. Wota, utokwephula sivumelwane losente naBhasha inkhosi yaka-Israyeli kuze atoyekela kungihlasela.”
4 Bheni-hadadi wayilalela iNkhosi Asa futsi watfumela tindvuna telibutfo lakhe kutsi tiyohlasela emadolobha aka-Israyeli futsi tancoba i-Ijoni,+ iDani+ ne-Abela-mayimu kanye nato tonkhe tindzawo tekugcina kudla naletinye tintfo, lebetisemadolobheni akaNaftali.+ 5 Watsi Bhasha nakakuva loko, ngekushesha wayekela kwakha* iRama. 6 INkhosi Asa yabese itsatsa onkhe emaJuda ayewutfwala ematje netingodvo taseRama,+ loko Bhasha lebekakhe ngako+ futsi Asa wakusebentisa kuze akhe kabusha iGeba+ neMispa.+
7 Ngaleso sikhatsi, Hanani+ umboni wemibono, wefika ku-Asa inkhosi yakaJuda, watsi: “Ngobe wetsembele enkhosini yaseSiriya wangetsembeli kuJehova Nkulunkulu wakho, libutfo lenkhosi yaseSiriya seliphunyukile esandleni sakho.+ 8 BaseTopiya nebaseLibhiya bebangasilo yini libutfo lelikhulu lelinetincola letinyenti temphi nebagibeli bemahhashi? Kodvwa ngobe wetsembela kuJehova, yena wawanikela esandleni sakho.+ 9 Ngobe emehlo aJehova abuka wonkhe umhlaba+ kuze emandla akhe awakhombise* labo inhlitiyo yabo lephelele kuye.+ Wente bulima kulendzaba; kusukela nyalo kuchubeke, utakulwa timphi siphelane.”+
10 Kodvwa Asa kwamkhuba lolokwashiwo ngulomboni wemibono futsi wamfaka ejele* ngobe bekamtfukutselele. Asa wacala kuphatsa kabi nalabanye bantfu ngaleso sikhatsi. 11 Umlandvo wa-Asa kusukela ekucaleni kwawo kuze kube sekugcineni, ubhaliwe eNcwadzini Yemakhosi akaJuda newaka-Israyeli.+
12 Ngemnyaka wesi-39 wekubusa kwakhe, Asa wangenwa kugula etinyaweni futsi wagcina asagula kakhulu; ngisho nasekuguleni kwakhe, akazange amfune Jehova, kodvwa wafuna lusito etangomeni. 13 Asa wabese uyafa futsi wangcwatjwa lapho kwangcwatjwa khona bokhokho bakhe;+ wafa ngemnyaka wesi-41 wekubusa kwakhe. 14 Ngako bamngcwaba ethuneni lelikhetselo labekatakhele lona eDolobheni laDavide.+ Bamngcwaba ngeluhlaka lebelugcwele emafutsa ebhalisamu lahlanganiswe netinhlobonhlobo tetitsako aba sitaputapu selikhetselo.+ Ngetulu kwaloko, bamentela umngcwabo lomkhulu kakhulu baphindze bashisa tinongo letehlukahlukene.