Leya KuThithusi
2 Kodvwa wena, chubeka ukhuluma tintfo letivumelana nemfundziso lephilile.*+ 2 Emadvodza lakhulile kufanele atitsibe, angatsatsi tintfo melula, abe nengcondvo lebhadlile, acine ekukholweni, elutsandvweni, nasekuciniseleni. 3 Ngendlela lefanako, bafati labakhulile kufanele batiphatse ngendlela ledvumisa Nkulunkulu, banganyundzeli, bangatitiki ngeliwayini lelinyenti futsi babe bafundzisi balokuhle; 4 kuze beluleke* bafati labasebasha kutsi batsandze emadvodza abo, batsandze nebantfwana babo, 5 kutsi babe nengcondvo lebhadlile, babe msulwa, basebente* emakhaya abo, babe bantfu labalungile, futsi batitfobe emadvodzeni abo,+ kuze livi laNkulunkulu lingahlanjalatwa.
6 Chubeka ukhutsata nemajaha kutsi abe nengcondvo lebhadlile,+ 7 futsi ngato tonkhe tindlela ube sibonelo semisebenti lemihle. Fundzisa tintfo letihlantekile* ngako konkhe kutimisela,+ 8 usebentise inkhulumo leyakhako* lengeke isoleke,+ kuze labo labaphikisako bahlazeke, babe bete lokubi* labangakusho ngatsi.+ 9 Tigcili atititfobe kubaphatsi bato kuto tonkhe tintfo,+ tetame nekubajabulisa, futsi tingaphikisani nabo, 10 tingabebeli,+ kodvwa tetsembeke ngalokuphelele kuze ngato tonkhe tindlela tihlobise imfundziso yaNkulunkulu, longuMsindzisi wetfu.+
11 Ngobe umusa lomkhulu waNkulunkulu sewubonakalisiwe, futsi uletsa insindziso kuto tonkhe tinhlobo tebantfu.+ 12 Lomusa usicecesha kutsi sikulahle kungamhloniphi Nkulunkulu kanye netifiso talelive,+ kodvwa indlela lesiphila ngayo ikhombise kutsi sinengcondvo lebhadlile, silungile, futsi sesaba Nkulunkulu kulelive,*+ 13 njengobe silindzele litsemba lelimangalisako+ nekubonakaliswa lokukhatimulako kwaNkulunkulu lomkhulu nekweMsindzisi wetfu, Jesu Khristu, 14 lowatinikela ngenca yetfu+ kuze asikhulule*+ kuyo yonkhe inhlobo yebubi futsi atihlantele bantfu labayimphahla yakhe lekhetsekile, labashisekela imisebenti lemihle.+
15 Chubeka ukhuluma ngaletintfo, uyale* futsi wekhute ngalo lonkhe ligunya.+ Ungavumeli muntfu kutsi akubukele phansi.