Isaya
24 Jehova utsatsa tintfo letikulelive* futsi ulenta lingasabi nalutfo.+
Ulibhekisa phansi+ futsi uyabahlakata bantfu labahlala kulo.+
2 Tintfo titabafananela bonkhe:
Bantfu batawuba njengemphristi,
Inceku ibe njengemphatsi wayo,
Incekukati ibe njengenkhosikati,
Umtsengi abe njengemtsengisi,
Umbolekisi abe njengalobolekako,
Lokweledwako abe njengalokweledako.+
3 Lelive litawusala lingenalutfo sanhlobo;
Titawutsatfwa tonkhe tintfo talo,+
Ngobe Jehova ukhulumile.
4 Lelive liyalila;*+ alisakhiciti.
Indzawo letselako iyabuna; iyaphela.
Bantfu labasetikhundleni letisetulu balelive bayawa.
6 Kungako sicalekiso silicedza lelive,+
Futsi labahlala kulo batfolakele banelicala.
Kungako bantfu labahlala kulelive bancipha ngesibalo,
Sekusele bantfu labambalwa kakhulu.+
7 Liwayini lelisha liyalila,* tihlahla temagilebisi tiyabuna,+
Bonkhe labatsakasile enhlitiyweni bayabubula.+
8 Injabulo yemathamborine seyiphelile;
Umsindvo walabatijabulele sewuphelile;
Umsindvo wenjabulo lokhishwa lihabhu sewuphelile.+
9 Banatsa liwayini ngaphandle kwengoma,
Futsi tjwala buyababa kulabo lababunatsako.
10 Lidolobha lelishiyiwe, libhidlitiwe;+
Tonkhe tindlu tivaliwe, akungeni muntfu.
11 Bakhalela liwayini etitaladini.
Sekuphele yonkhe injabulo;
Injabulo yalelive seyiphelile.+
12 Lelidolobha lisele litindzala;
Ligede lifohlotiwe laba yindvudvuma yeticucu.+
13 Kutawuba njena-ke kulelive, emkhatsini webantfu:
Kutawufana nalapho sihlahla semncumo siphundlwa,+
Kufane nemagilebisi lasele nasekuphele sikhatsi sekuvuna.+
14 Batawuphakamisa emavi abo,
Bamemete ngenjabulo.
Bamemetele bukhosi baJehova kusukela elwandle.*+
15 Kungako batawudvumisa Jehova emphumalanga;+
Badvumise libito laJehova Nkulunkulu wema-Israyeli etichingini telwandle.+
16 Siva tingoma letivela emikhawulweni yemhlaba:
Kodvwa ngitsi: “Ngiyondza, ngiyondza!
Maye kimi! Labakhohlakele bente ngekukhohlakala;
Ngekukhohlakala, tikhohlakali tente kukhohlakala.”+
17 Umelwe kwesaba, nemigodzi kanye netingibe, wena lohlala kulelive.+
18 Nome ngubani lobalekiswa ngumsindvo wekwesaba utawugcumkela emgodzini,
Futsi nome ngubani lophuma kulomgodzi utawubanjwa lugibe.+
Ngobe emafasitelo etikhukhula asezulwini atawuvuleka,
Futsi tisekelo telive titawutamatama.
20 Lelive liyayendza kuhle kwemuntfu lodzakiwe,
Liyajikita, njengendlu yetjani nayipheshulwa ngumoya.
Kuphambuka kwalo sekukhulu kangangekutsi kuyalesindza,+
Litakuwa lingasaphindzi livuke.
21 Ngalelolanga, Jehova utawunaka libutfo lasemazulwini
Kanye nemakhosi emhlaba lasemhlabeni.
22 Atawuhlanganiswa ndzawonye
Njengetiboshwa tihlanganiswe ndzawonye emgodzini,
Futsi atawuvalelwa ejele;
Anakwe ngemuva kwemalanga lamanyenti.