Incwadzi Yekucala YemaKhosi
17 Elija*+ umThishbe lohlala kaGileyadi+ watsi ku-Ahabi: “Ngifunga Jehova Nkulunkulu lophilako wema-Israyeli, loyo lengimkhontako* ngitsi, kuleminyaka ngeke abe khona ematolo nemvula kuze kusho mine!”+
2 Livi laJehova lefika ku-Elija latsi: 3 “Hamba kulendzawo uye ngasemphumalanga ufike ubhace eSihosheni saseKherithi, emphumalanga neJordane. 4 Kufanele unatse emtfonjeni wemanti futsi ngitawutfuma emahhwabayi kutsi akuletsele kudla kuleyondzawo.”+ 5 Ngekushesha wahamba futsi wakwenta loko lokwakushiwo nguJehova; wahamba wayohlala ngaseSihosheni saseKherithi, emphumalanga neJordane. 6 Lamahhwabayi bekamletsela sinkhwa nenyama ekuseni futsi amletsela sinkhwa nenyama entsambama, futsi bekanatsa emanti kulomtfombo.+ 7 Kodvwa ngekuhamba kwemalanga, lomtfombo washa+ ngobe belingasani kuleyondzawo.
8 Livi laJehova lase liyefika kuye latsi: 9 “Hamba uye eSarefathi, indzawo yaseSidoni, ufike uhlale khona. Ngitawutjela umfelokati lolapho kutsi akunike kudla.”+ 10 Ngako wahamba waya eSarefathi. Nakefika esangweni lalelidolobha, wabona umfelokati atfota. Wambita, wase utsi: “Ngicela ungiphe emanti lamancane nje ngendzebe ngitonatsa.”+ 11 Ngesikhatsi lomfelokati ayolandza lamanti, Elija wambita watsi: “Ngicela ungiphatsele nelucetu lwesinkhwa.” 12 Lomfelokati waphendvula watsi: “Ngifunga Jehova Nkulunkulu wakho lophilako kutsi sengite sinkhwa, sengisele nafulaha lomncane ejekeni lelikhulu kanye nemafutsa lamancane ejekeni lelincane.+ Nyalo ngisatfota, ngitawubuyela ekhaya ngifike ngente kudla kwami nekwendvodzana yami. Nasesidlile, sitawubese siyafa.”
13 Elija watsi kuye: “Ungesabi. Hamba ufike wente njengobe ushito. Kodvwa ngicela ucale ngekungibhakela sinkhwa lesiyindingilizi lesincane ngaloko lokusele, usiletse lapha kimi. Ngemuva kwaloko ungabese ulungisa kudla kwakho nekwendvodzana yakho. 14 Ngobe naku lokushiwo nguJehova Nkulunkulu wema-Israyeli: ‘Ngeke uphele fulaha kulelijeke lelikhulu futsi angeke aphele emafutsa kulelijeke lelincane kuze kube ngulapho Jehova aletsa imvula emhlabeni.’”+ 15 Ngako lomfelokati wahamba wenta njengobe Elija bekashito futsi yena nemndeni wakhe kanye na-Elija, baba nekudla emalanga lamanyenti.+ 16 Lofulaha awuphelanga kulelijeke lelikhulu, nalamafutsa awaphelanga kulelijeke lelincane njengobe Jehova bekakhulumile asebentisa Elija.
17 Ngemva kwaloko, lendvodzana yalomake lebekangumnikati walendlu yagula futsi lokugula kwayicindzetela kangangekutsi yaze yafa.+ 18 Lomnikati walendlu wase utsi ku-Elija: “Ngoneni kuwe* wena muntfu waNkulunkulu weliciniso? Utele kutongikhumbuta sono sami nekutobulala indvodzana yami yini?”+ 19 Kodvwa Elija watsi kuye: “Nginike lendvodzana yakho.” Lomphrofethi wayitsatsa etandleni tamake wayo wayetfwala waya nayo ekamelweni lelisetulu labekahlala khona, wafike wayilalisa embhedzeni wakhe.+ 20 Elija wathantaza kuJehova watsi: “Awu Jehova Nkulunkulu wami,+ uletsa inhlekelele yini nakulomfelokati lengihlala kakhe ngekubulala indvodzana yakhe?” 21 Wabese ululela imikhono yakhe kulomntfwana tikhatsi letintsatfu, wathantaza kuJehova watsi: “Awu Jehova Nkulunkulu wami, ngicela aphindze aphile lomntfwana.” 22 Jehova wasilalela sicelo sa-Elija+ futsi lomntfwana waphindze waphila.+ 23 Elija watsatsa lomntfwana wehla naye esuka ekamelweni lelingetulu waya kulendlu, wafike wamnika make wakhe; wabese utsi: “Buka-ke, indvodzana yakho seyiyaphila.”+ 24 Lomake wabese utsi ku-Elija: “Nyalo sengiyati kutsi wena ungumuntfu waNkulunkulu+ nekutsi livi laJehova leliphuma emlonyeni wakho liliciniso.”