Isaya
58 “Memeta ngalo lonkhe liphimbo lakho; umemete nje ungesabi!
Phakamisa livi lakho njengeluphondvo.
Memetela kubantfu bami kuvukela kwabo,+
Memetela tono tabo endlini yaJakobe.
2 Bangifuna onkhe malanga,
Futsi bayakutsandza kwati tindlela tami,
Kube shengatsi basive lesenta kulunga
Futsi abakayilahli imitsetfo yaNkulunkulu wabo.+
Bacela kutsi ngehlulele ngendlela lelungile,
Kube shengatsi batsandza kusondzela kuNkulunkulu:+
3 ‘Kungani ungaboni nasizila kudla?+
Futsi kungani unganaki nasitibangela tinsizi?’*+
4 Kuzila kwenu kudla kuphela ngekuhhwilitisana nangekulwa,
Futsi nibese nishayana ngesibhakela sebubi.
Angeke nizile kudla ngalendlela bese nicabanga kutsi emavi enu atawuviwa ezulwini.
5 Kufanele yini kube njena kuzila kudla lengikukhetsako,
Njengelilanga lapho lotsite atibangela tinsizi,*
Agobisa inhloko yakhe njengetjani lobudze,
Ente umbhedze wakhe ngendvwangu yelisaka nangemlotsa?
Kungiko yini loku lenikubita ngekuzila kudla nelilanga lelijabulisako kuJehova?
6 Cha, naku kuzila kudla lengikukhetsako:
Kutsi kuchachwe tinketane tebubi,
Kukhunyulwe tintsambo telijoka,+
Kukhululwe locindzetelekile,+
Nekutsi kwephulwe onkhe emajoka emkhatsini;
7 Kudla nalabalambile,+
Kuhlalisa labeswele nalabete emakhaya endlini yakho,
Kugcokisa longcunu nawumbona,+
Nekungamfulatseli loyo loyingati yakho.
8 Ngemuva kwaloko, kukhanya kwakho kutawukhanya njengekusa,+
Futsi utawusheshe welapheke.
Kulunga kwakho kutawuhamba embikwakho,
Futsi inkhatimulo yaJehova itakugadza ngemuva.+
9 Utawubese uyamemeta, futsi Jehova akuphendvule;
Utawukhalela lusito, yena atsi: ‘Nangu mine!’
Nangabe nje ususa lijoka emkhatsini wenu
Futsi niyekela kukhombana ngemuno nekukhuluma tintfo letilimatako,+
10 Nangabe uniketa lolambile loko nawe lokufisako*+
Futsi wenetise labo labacindzetelekile,*
Kukhanya kwakho kutawubese kuyakhanya ngisho nasebumnyameni,
Nebumnyama bakho butawufana nemini.+
11 Jehova utakuhola njalo
Enetise netidzingo takho* ngisho naseveni lelomile;+
Utawucinisa ematsambo akho,
Futsi wena utawuba njengengadze leniselwa kahle,+
Nanjengemtfombo lonemanti langapheli.
12 Batakwakha kabusha tindzala takadzeni ngenca yakho,+
Futsi utawubuyisela tisekelo tetitukulwane letendlulile.+
Utawubitwa ngekutsi ungulovusa tindvonga letidzilikile,+
Lovusa imigwaco lokutawuhlalwa emaceleni ayo.
13 Nangabe ngeliSabatha, lokulilanga lami lelingcwele, ungakwenti* loko lokukujabulisako+
Futsi ubita liSabatha ngekutsi lilanga lenjabulo lenkhulu, lilanga lelingcwele laJehova, lilanga lekukhatinyuliswa,+
Futsi ulikhatimulise esikhundleni sekwenta loko lokukujabulisako nekukhuluma emagama lalite,
14 Utawubese utfola injabulo lenkhulu kuJehova,
Futsi ngitakwenta ugibele etindzaweni letiphakeme temhlaba.+