Imisebenti Yebaphostoli
22 “Banaketfu nani bobabe, ngicela ningilalele njengobe ngichaza.”+ 2 Ngesikhatsi beva kutsi bekakhuluma nabo ngelulwimi lwesiHebheru, bathula dvu, yena wase utsi: 3 “Mine ngingumJuda+ wekutalwa eThasusi yaseSilisiya,+ kodvwa ngafundza kulelidolobha, ngifundziswa nguGamaliyeli,+ ngaceceshelwa kulalelisisa uMtsetfo wabokhokho,+ futsi ngiwukhutsalele umsebenti waNkulunkulu njengobe nje nani ninjalo.+ 4 Bengibahlupha baze bafe labo lebebalandzela leNdlela, futsi bengibopha labadvuna nalabasikati ngiphindze ngibavalele ejele.+ 5 Umphristi lophakeme kanye nayo yonkhe inhlangano yemadvodza lamadzala bangangifakazela. Bona banginika tincwadzi lebetiya kumaJuda laseDamaseko, futsi bengisendleleni ngiyobopha labo lebebalapho bese ngibaletsa eJerusalema kuze bajeziswe.
6 “Njengobe bengihamba sengisondzela eDamaseko, futsi kusemini, kwavela kukhanya lokukhulu kuphuma ezulwini, kwamanyata ndzawo tonkhe eceleni kwami,+ 7 ngako ngase ngiyawa, futsi ngeva livi litsi kimi: ‘Sawula, Sawula, ungihluphelani?’ 8 Ngaphendvula ngatsi: ‘Ungubani wena Nkhosi?’ Lelivi latsi: ‘NginguJesu waseNazaretha, loyo lomhluphako.’ 9 Lamadvodza lebengihamba nawo akubona lokukhanya, kodvwa akazange alive lelivi lalomuntfu lebengikhuluma naye. 10 Ngemuva kwaloko ngatsi: ‘Nkhosi, kufanele ngenteni?’ Yona yatsi kimi: ‘Sukuma uye eDamaseko, nawufika khona utawutjelwa konkhe lokufanele ukwente.’+ 11 Kodvwa njengobe bengingaboni lutfo ngenca yalokukhanya lokukhulu, labo lebengihamba nabo bangibamba ngesandla ngaze ngefika eDamaseko.
12 “Ananiyase, indvodza leyesaba Nkulunkulu, legcina uMtsetfo nalekhulunyelwa kahle ngiwo onkhe emaJuda lahlala lapho, 13 weta kimi. Wafike wema eceleni kwami watsi: ‘Sawula mzalwane wami, phindze ubone!’ Ngaso leso sikhatsi ngaphakamisa emehlo, ngambona emile.+ 14 Watsi: ‘Nkulunkulu wabokhokho betfu ukukhetsile kutsi wati intsandvo yakhe, ubone loyo lolungile,+ uphindze uve nelivi lakhe, 15 ngobe wena kufanele ufakaze ngaye kubo bonkhe bantfu ngetintfo lotibonile nalotivile.+ 16 Yini-ke lekubambile? Sukuma ubhajatiswe, futsi utihlambulule etonweni takho+ ngekutsi ubite libito lakhe.’+
17 “Ngatsi nasengibuyele eJerusalema,+ futsi ngithantaza ethempelini, ngabona umbono. 18 Ngabona iNkhosi itsi kimi: ‘Phangisa uphume eJerusalema, ngobe ngeke bakwemukele loko lobatjela kona mayelana nami.’+ 19 Mine ngatsi: ‘Nkhosi, labantfu bati kahle kutsi bengivame kubavalela ejele labo labakholwa nguwe, futsi bengibabhambabula emasinagogeni;+ 20 nangalesikhatsi kubulawa Stefano lobekangufakazi wakho, mine bengime lapho futsi ngisekela labo lebebambulala, ngigadze netingubo tabo tangetulu.’+ 21 Nanobe kunjalo yatsi kimi: ‘Hamba, ngobe ngitakutfuma etiveni letikhashane.’”+
22 Labantfu bebasolo bamlalele. Ngemuva kwaloko bamemeta batsi: “Mbulaleni lomuntfu, ngobe ufanelwe kufa!” 23 Ngesizatfu sekutsi bebamemeta, futsi bajika tingubo tabo tangetulu emoyeni, basakata nemhlabatsi,+ 24 lendvuna yemphi yatsi Pawula akayiswe enkambu yemasotja, yatsi kufanele aphenyisiswe ngekutsi ashaywe kamatima, kuze itfole kutsi kwentiwa yini labantfu bamemete ngalendlela. 25 Kodvwa batsi nasebambophile kuze bambhambabule, wakhuluma nendvuna yemasotja lebeyime lapho watsi: “Kuvumelekile yini kutsi nishaye umuntfu longumRoma* futsi lote licala?”*+ 26 Ngesikhatsi lendvuna yemasotja iva loku, yaya kulendvuna yemphi yabika yatsi: “Nyalo utawenta njani, ngobe lomuntfu ungumRoma?” 27 Ngako lendvuna yemphi yaya kuPawula yatsi: “Ngicela ungitjele, ungumRoma yini?” Yena watsi: “Yebo nginguye.” 28 Lendvuna yemphi yatsi: “Mine ngakhipha imali lenhle kuze ngibe ngumRoma.” Pawula yena watsi: “Mine-ke nginguye ngekutalwa.”+
29 Masinyane lamadvodza lebekufanele aphenyisise Pawula ngekutsi amshaye kamatima esuka kuye, futsi lendvuna yemphi yesaba nayitfola kutsi ungumRoma, nekutsi beyimbophe ngetinketane.+
30 Lendvuna yemphi beyifuna kusati kahle sizatfu lesente emaJuda ammangalela, ngako ngelilanga lelilandzelako yamkhulula futsi yatjela baphristi labakhulu nemalunga eNkantolo YemaJuda kutsi bahlangane. Yabese iletsa Pawula yammisa embikwabo.+