Tihlabelelo
Sicondziso lesiya kumcondzisi. Ingoma yaDavide.
64 Awu Nkulunkulu, ngikhatsatekile, ngicela ungilalele.+
Ngivikele njengobe ngihlaselwa sitsa.
2 Ngivikele emachingeni lentiwa bantfu lababi,+
Ungivikele nasesicunjini salabenta lokubi.
3 Balola lulwimi lwabo kuhle kwenkemba;
Balungela kudubula ngemavi lalimatako kube shengatsi ayimicibisholo,
4 Kute badubule longenacala babe balapho babhace khona;
Bamdubule angakagadzi, babe bangesabi.
5 Bachubeka nemacebo abo lamabi;*
Bakhuluma ngekutsi batatifihla njani titsiyo tabo.
Batsi: “Ngubani lotatibona?”+
6 Bafuna tindlela letinsha tekwenta lokubi;
Emacebo abo lanebucili bawakhela emasitseleni;+
Loko lokusetinhlitiyweni tabo kufihlakele.
7 Kodvwa Nkulunkulu utabadubula;+
Batsi bangakagadzi batitfole bagwazwe ngumcibisholo.
8 Lamacebo labawentako atawubuya ehlele bona;+
Bonkhe lababukele batawunikina tinhloko.
9 Bonkhe bantfu batawesaba,
Batawumemetela loko lokwentiwe nguNkulunkulu,
Futsi bayicondze imisebenti yakhe.+