Incwadzi Yekucala YemaKhosi
19 Ahabi+ wabese utjela Jezebeli+ tonkhe letintfo lebetentiwe ngu-Elija nendlela labebulele ngayo bonkhe baphrofethi ngenkemba.+ 2 Nakeva loko Jezebeli watfumela sitfunywa ku-Elija, watsi: “Shengatsi bonkulunkulu bangangijezisa kakhulu nangabe kungashaya lesikhatsi kusasa wena ngingakakwenti loko lokwente kulabaphrofethi lobabulele!” 3 Nakeva loko Elija wesaba, wase uyasukuma uyabaleka afuna kusindzisa kuphila* kwakhe.+ Wabaleka waze wayofika eBherisheba+ yakaJuda,+ wafike washiya inceku yakhe khona. 4 Watsatsa luhambo lwelilanga lonkhe waya ehlane wafike wahlala ngephansi kwesihlahla semtsanyelo, wabese ucela kutsi afe. Watsi: “Sekwenele! Awu Jehova, ngicela nyalo usale utsatsa kuphila* kwami+ ngoba angincono kunabokhokho bami.”
5 Wabese uyacambalala futsi wabanjwa butfongo ngephansi kwalesihlahla semtsanyelo. Kodvwa ngekushesha ingilosi yamtsintsa,+ yatsi kuye: “Vuka udle.”+ 6 Watsi nakabuka ngasenhloko yakhe wabona sinkhwa lesiyindingilizi sibekwe ematjeni lashisako futsi bekukhona nelijeke lelinemanti. Wadla, wanatsa waphindze walala. 7 Ngekuhamba kwesikhatsi, lengilosi yaJehova yaphindze yabuya yamtsintsa, yase itsi: “Vuka udle ngobe usetawutsatsa luhambo loludze kakhulu.” 8 Ngako wavuka, wadla waphindze wanatsa. Ngekusitwa ngemandla lawatfola kuloko kudla, wahamba emalanga langu-40 nebusuku lobungu-40 waze wayofika eHorebe, intsaba yaNkulunkulu weliciniso.+
9 Wefika lapho wangena emgedzeni,+ wacitsa busuku bonkhe khona; livi laJehova lefika kuye latsi: “Wentani lapha ye-Elija?” 10 Yena waphendvula watsi: “Bengisolo ngimsebentela ngekutimisela Jehova Nkulunkulu wemabutfo;+ ngobe bantfu baka-Israyeli basishiyile sivumelwane sakho,+ ema-al’thare akho bawadzilitile futsi babulele baphrofethi bakho ngenkemba,+ ngimi kuphela losasele. Nyalo sebafuna kubulala nami.”*+ 11 Nkulunkulu watsi: “Phuma, ume embikwaJehova kulentsaba.” Jehova abendlula lapho+ futsi kwaba nemoya lomkhulu lowadzabula tintsaba ekhatsi wacheketa nemadvwala embikwaJehova,+ kodvwa Jehova bekangekho kulomoya. Nakuphela lomoya, kwaba nekutamatama kwemhlaba,+ kodvwa Jehova bekangekho kulokutamatama kwemhlaba. 12 Ngemuva kwalokutamatama kwemhlaba, kwaba nemlilo,+ kodvwa Jehova bekangekho kulomlilo. Ngemuva kwalomlilo, kwevakala livi lelipholile, lelikhulumela phansi.+ 13 Ngekushesha nje Elija nakaliva, watimbonya buso ngengubo* yakhe+ wase uyaphuma uma emnyango walomgedze. Kwabese kuba nelivi lelambuta latsi: “Wentani lapha ye-Elija?” 14 Yena waphendvula watsi: “Bengisolo ngimsebentela ngekutimisela Jehova Nkulunkulu wemabutfo; ngobe bantfu baka-Israyeli basishiyile sivumelwane sakho,+ ema-al’thare akho bawadzilitile futsi babulele baphrofethi bakho ngenkemba, ngimi kuphela losasele. Nyalo sebafuna kubulala nami.”+
15 Jehova watsi kuye: “Jika uye ehlane laseDamaseko. Ubotsi nawufika lapho ugcobe Hazayeli+ kutsi abe yinkhosi yaseSiriya. 16 Kufanele ugcobe naJehu+ umtukulu waNimshi kutsi abe yinkhosi ka-Israyeli, bese ugcoba na-Elisha,* indvodzana yaShafati wase-Abela-mehola kutsi abe ngumphrofethi esikhundleni sakho.+ 17 Noma ngubani lotawuphunyula enkembeni yaHazayeli,+ utawubulawa nguJehu;+ noma ngubani lotawuphunyula enkembeni yaJehu, utawubulawa ngu-Elisha.+ 18 Ngisenebantfu labasele labangu-7 000 ka-Israyeli+ labangazange sebaguce ngemadvolo bakhonte Bhali+ futsi labangakamcabuzi ngemilomo yabo.”+
19 Ngako wesuka lapho waya khona wafike wakhandza Elisha indvodzana yaShafati alima ngetinkunzi letingu-24 letiboshelwe ngatimbili, yena abechuba leti letimbili letisekugcineni. Ngako Elija waya ku-Elisha, wafike wajikijela ingubo+ yakhe kuye. 20 Elisha wavele washiya letinkuzi, wagijima walandzela Elija, wase utsi: “Ngicela ungivumele ngiyocabuza make nababe ngibavalelise.” Elija wamphendvula watsi: “Hamba, yini mine lengiyentile kuze ngikuvimbe?” 21 Ngako wajika wafike watsatsa tinkunzi letimbili wenta ngato umhlatjelo futsi inyama yato wayipheka ngelijoka nelikhuba lekulima, wase uniketa bantfu badla. Ngemuva kwaloko wasukuma walandzela Elija futsi wacala kuba yinceku yakhe.+