Amose
7 Naku lengatjengiswa kona yiNkhosi Lephakeme Jehova: Wadala libulo lesikhonyane ngesikhatsi kumila sitjalo lesahlanyelwa ebusika.* Lesi bekusitjalo lebesihlanyelwe ngemuva kwekusikwa kwetjani benkhosi. 2 Ngesikhatsi lelibulo licedza kudla lesitjalo salelive, ngatsi: “Awu Nkhosi Lephakeme Jehova, ngicela ucolele+ bantfu bakho! Jakobe angasindza njani?* Ngobe yena ubutsakatsaka!”+
3 Ngako Jehova wakucabanga kabusha* loku.+ Jehova watsi: “Angeke kuze kwenteke loku.”
4 Naku lengakhonjiswa kona yiNkhosi Lephakeme Jehova: INkhosi Lephakeme Jehova yaletsa sehlulelo semlilo. Lomlilo washwabadzela onkhe emanti lajulile kanye nencenye yalelive. 5 Ngabese ngitsi: “Awu Nkhosi Lephakeme Jehova, ngicela ungakwenti loku.+ Jakobe angasindza njani?* Ngobe yena ubutsakatsaka!”+
6 Ngako Jehova wakucabanga kabusha* loku.+ INkhosi Lephakeme Jehova yatsi, “Naloku futsi angeke kwenteke.”
7 Naku langikhombisa kona: Jehova bekeme etikwelubondza lebelakhiwe kusetjentiswa intsambo yekucondzisa, futsi leyo ntsambo beyisesandleni sakhe. 8 Jehova wase utsi kimi: “Ubonani ye-Amose?” Ngako ngamphendvula ngatsi: “Ngibona intsambo yekucondzisa.” Jehova wabese utsi: “Ngibeka intsambo yekucondzisa kubantfu bami ema-Israyeli. Angeke ngisabacolela.+ 9 Tindzawo letiphakeme ta-Isaka+ titawusala tingenamuntfu, netindzawo letingcwele taka-Israyeli titawubhujiswa;+ futsi ngitawuhlasela indlu yaJerobowamu ngenkemba.”+
10 Amasiya umphristi waseBetheli+ watfumelela iNkhosi Jerobowamu+ yaka-Israyeli umlayeto lotsi: “Amose wakha licebo lekukuvukela khona lana endlini yaka-Israyeli.+ Lelive angeke likhone kumelana nawo onkhe emavi akhe.+ 11 Ngobe Amose utsi: ‘Jerobowamu utawubulawa ngenkemba futsi ema-Israyeli atawusuka eveni lawo aye ekutfunjweni.’”+
12 Amasiya wabese utsi ku-Amose: “Awu mboni wemibono, hamba, balekela eveni lakaJuda, tfola sinkhwa sakho lapho, futsi uphrofethe khona lapho.+ 13 Kodvwa ungasaphrofetheli eBetheli+ ngobe iyindlu lengcwele yenkhosi+ nendlu yembuso.”
14 Amose wabese uphendvula Amasiya watsi: “Bengingasuye umphrofethi, futsi bengingasiyo indvodzana yemphrofethi; kodvwa bengimane ngingumelusi,+ futsi benginakekela tihlahla temakhiwa.* 15 Kodvwa Jehova wangiyekelisa kunakekela umhlambi, futsi Jehova watsi kimi: ‘Hamba uyophrofetha kubantfu baka-Israyeli.’+ 16 Ngako lalela nali livi laJehova: ‘Wena utsi, “Ungaphrofethi tintfo letimelene na-Israyeli,+ futsi ungashumayeli+ tintfo letimelene nendlu ya-Isaka.” 17 Ngako-ke naku lokushiwo nguJehova: “Umfati wakho utawuba yingwadla edolobheni, futsi emadvodzana akho nemadvodzakati akho atawubulawa ngenkemba. Live lakho litawabiwa kusetjentiswa intsambo yekukala, futsi wena lucobo lwakho utawufela eveni lelingakahlanteki; nakanjani ema-Israyeli atawusuka eveni lawo aye ekutfunjweni.”’”+