Tikhulu
10 Ngemuva kwa-Abimeleki, Thola indvodzana yaPhuwa, indvodzana yaDodo, indvodza yaka-Isakhari, walandzela ekusindziseni ema-Israyeli.+ Bekahlala eShamiri, esifundzeni setintsaba saka-Efrayimu. 2 Wehlulela ema-Israyeli iminyaka lengu-23. Ngemuva kwaloko wafa, wangcwatjwa eShamiri.
3 Ngemuva kwakhe, kwalandzela Jayire wakaGileyadi, futsi wehlulela ema-Israyeli iminyaka lengu-22. 4 Bekanemadvodzana langu-30 lebekagibela timbongolo letingu-30, aphindze abe nemadolobha langu-30 labitwa ngekutsi yiHavothi-jayire+ kuze kube ngulamuhla, futsi asendzaweni yakaGileyadi. 5 Ngemuva kwaloko Jayire wafa futsi wangcwatjwa eKhamoni.
6 Ema-Israyeli aphindze enta lokubi emehlweni aJehova+ futsi acala kukhonta boBhali,+ titfombe ta-Ashtarothe, bonkulunkulu bema-Aramu,* bonkulunkulu baseSidoni, bonkulunkulu bakaMowabi,+ bonkulunkulu baka-Amoni+ kanye nabonkulunkulu bemaFilisti.+ Amlahla Jehova futsi angasamkhonti. 7 Intfukutselo yaJehova yase iyawavutsela ema-Israyeli futsi wawanikela etandleni temaFilisti netema-Amoni.+ 8 Ngako-ke bawafihlita futsi bawacindzetela kakhulu ema-Israyeli ngalowo mnyaka. Kwaphela iminyaka lengu-18 bacindzetela onkhe ema-Israyeli lebekahlala ngale kwe-Jordane, lebekulive lema-Amori eGileyadi. 9 Ema-Amoni bekaphindze ewele iJordane kuze ayokulwa nebakaJuda, bakaBhenjamini kanye nendlu ya-Efrayimu. Loko kwawacindzetela kakhulu ema-Israyeli. 10 Ngemuva kwaloko ema-Israyeli atikhalela kuJehova acela lusito,+ atsi: “Sonile kuwe ngobe sikulahlile, wena Nkulunkulu wetfu futsi sakhonta boBhali.”+
11 Kodvwa Jehova watsi kuma-Israyeli: “Anginisindzisanga yini kubaseGibhithe,+ kubaka-Amori,+ kubaka-Amoni, kumaFilisti,+ 12 kubaseSidoni, kubaka-Amaleki, nakubakaMidiyani nabanicindzetela? Ngesikhatsi ningikhalela, nganisindzisa esandleni sabo. 13 Kodvwa nangilahla, nase nikhonta labanye bonkulunkulu.+ Kungako ngingeke ngiphindze nginisindzise.+ 14 Hambani niye kulabonkulunkulu lenibakhetsile futsi nicele kubo lusito.+ Akube ngibo labanisindzisako esikhatsini senu sebumatima.”+ 15 Kodvwa ema-Israyeli atsi kuJehova: “Sonile. Yenta kitsi nobe yini loyifunako. Kuphela nje, sicela umane usisindzise lamuhla.” 16 Asusa labonkulunkulu baletive emkhatsini wawo ase akhonta Jehova,+ ngako Nkulunkulu akazange asakhona kukubeketelela kuhlupheka kwema-Israyeli.+
17 Ngekuhamba kwesikhatsi ema-Amoni+ abitelwa ndzawonye futsi amisa emathende eGileyadi. Ngako ema-Israyeli abutsana, amisa emathende eMispa. 18 Labantfu netindvuna takaGileyadi batsi kulomunye nalomunye: “Ngubani lotasihola nasilwa nebaka-Amoni?+ Lowo muntfu akabe ngumholi wabo bonkhe bantfu labahlala kaGileyadi.”