Incwadzi Yekucala YaSamuweli
12 Ekugcineni Samuweli watsi kuwo onkhe ema-Israyeli: “Sengikwente* konkhe leningicele kona, nganibekela nenkhosi kutsi inibuse.+ 2 Nayi-ke inkhosi lengumholi* wenu!+ Mine sengigugile, sengimphunga nasenhloko, nemadvodzana ami alamkhatsini wenu+ futsi bengisolo nginihola kusukela ngisemusha kuze kube ngulamuhla.+ 3 Nyalo ngisembikwenu. Yetfulani bufakazi lobumelene nami embikwaJehova nasembikwalogcotjiwe wakhe.+ Ngubani lengimtsatsele inkunzi yakhe nobe imbongolo yakhe?+ Ukhona yini lengimtsatsele lokutsite ngebucili nobe ngamcindzetela? Kuke kwenteka yini ngavuma kudizelwa* kuze ngingehluleli kahle?+ Nangabe kuke kwenteka, ngitakubuyisela kuye.”+ 4 Ema-Israyeli amphendvula atsi: “Awukaze utsatse lutfo lwetfu ngebucili, usicindzetele nobe wemukele nobe ngabe yini esandleni setfu.” 5 Ngako watsi kuwo: “Jehova ungufakazi ngalokumelene nani futsi lamuhla logcotjiwe wakhe ungufakazi wekutsi kute lenikutfolile leningangimangalela ngako.”* Kuloko amphendvula atsi: “Yebo ungufakazi.”
6 Samuweli wabese utsi kulabantfu: “Jehova lowasebentisa Mosi na-Aroni waphindze wakhipha bokhokho benu eveni laseGibhithe,+ yena ungufakazi. 7 Ngako nyalo, manini etindzaweni tenu, ngitawubese ngiyanehlulela embikwaJehova mayelana nayo yonkhe imisebenti lelungile Jehova layentele nine kanye nabokhokho benu.
8 “Ngekushesha nje ngesikhatsi Jakobe sekafikile eGibhithe+ nalapho bokhokho benu bacala kukhalela lusito kuJehova,+ Jehova watfumela Mosi+ na-Aroni kuze babahole baphume eGibhithe futsi babaletse kulendzawo lesikuyo.+ 9 Kodvwa bamkhohlwa Jehova Nkulunkulu wabo, ngako wabanikela+ esandleni saSisera+ umholi welibutfo laHasori, esandleni semaFilisti+ kanye nasesandleni senkhosi yakaMowabi+ futsi balwa nabo. 10 Babese bakhalela lusito kuJehova+ batsi: ‘Sonile+ ngobe simshiyile Jehova sayokhonta boBhali+ kanye netitfombe ta-Ashtarothe.+ Sicela usikhulule esandleni setitsa tetfu kuze sitokhonta wena.’ 11 Jehova watfumela Jerubhali,+ Bedani, Jeftha+ kanye naSamuweli+ futsi wanikhulula esandleni sato tonkhe titsa lebetinitungeletile kuze nitewuhlala ngekulondzeka.+ 12 Ngesikhatsi nibona kutsi Nahashi+ inkhosi yesive sema-Amoni ute kutonihlasela, nachubeka natsi: ‘Cha, sitimisele kuba nenkhosi letasibusa!’+ ngisho nobe Jehova Nkulunkulu wenu ayiNkhosi yenu.+ 13 Nayi-ke inkhosi leniyikhetsile, leyo leniyicelile. Jehova sewunibekele inkhosi letanibusa.+ 14 Nangabe nesaba Jehova,+ nimkhonta,+ nilalela livi lakhe,+ ningamelani nemitsetfo yaJehova, futsi nine kanye nalenkhosi lenibusako nilandzela Jehova Nkulunkulu wenu, loko kukahle. 15 Kodvwa nangabe ningalilaleli livi laJehova futsi niphambana nemitsetfo yaJehova, sandla saJehova sitawumelana nani kanye nabobabe benu.+ 16 Nyalo manini etindzaweni tenu nibone lentfo lemangalisako Jehova latayenta embikwenu. 17 Akusilo yini lilanga lekuvuna kolo lamuhla? Ngitawucela Jehova kutsi ente litulu lidvume futsi line, ngako nitawubese niyati niphindze nicondze kutsi yimbi kangakanani lentfo leniyentile emehlweni aJehova ngekuticelela kuba nenkhosi.”+
18 Ngaleso sikhatsi, Samuweli wabita Jehova futsi Jehova wabangela kutsi ngalelolanga kube nekudvuma kwelitulu nemvula, kangangekutsi bonkhe bantfu bamesaba kakhulu Jehova naSamuweli. 19 Ngako bonkhe labantfu batsi kuSamuweli: “Thantazela tinceku takho kuJehova Nkulunkulu wakho,+ ngobe asifuni kufa, njengobe sesengete lenye intfo lembi kuto tonkhe tono tetfu ngekutsi sicele inkhosi.”
20 Samuweli wabese utsi kulabantfu: “Ningesabi ngobe vele senibentile bonkhe lobubi. Ningacali niyekele kulandzela Jehova+ futsi nibokhonta Jehova ngenhlitiyo yenu yonkhe.+ 21 Ningatilandzeli tintfo letilite*+ letingasilo lusito lwalutfo+ naletingeke tinisindzise, ngobe tilite.* 22 Ngenca yelibito lakhe lelikhulu,+ Jehova ngeke abashiye bantfu bakhe,+ ngobe Jehova nguye lonente naba bantfu bakhe.+ 23 Kodvwa mine angikucabangi ngisho nekukucabanga kona kuJehova ngekuyekela kunithantazela, futsi ngitawuchubeka nginicondzisa endleleni lekahle nalelungile. 24 Kuphela nje yesabani Jehova,+ nimkhonte ngekwetsembeka* ngayo yonkhe inhlitiyo yenu, nikhumbule tonkhe tintfo letimangalisako lanentele tona.+ 25 Kodvwa nangabe ningenamahloni ekwenta lokubi, nitawubhujiswa+ nine kanye nenkhosi yenu.”+