Incwadzi Yekucala YaSamuweli
23 Ngekuhamba kwesikhatsi, Davide watfola umbiko lotsi: “EmaFilisti ahlasela iKheyila,+ futsi atsatsa tonkhe tintfo emabaleni ekubhulela.” 2 Ngako Davide wabuta kuJehova watsi:+ “Ngihambe yini ngiyobulala lamaFilisti?” Jehova waphendvula Davide watsi: “Hamba uyowabulala futsi ukhulule iKheyila.” 3 Kodvwa emadvodza labehamba naDavide atsi kuye: “Sesaba nje sisekhona lakaJuda,+ kakhulu kangakanani-ke nasiya eKheyila siyokulwa nelibutfo lemaFilisti!”+ 4 Davide waphindze wabuta kuJehova.+ Ngako Jehova wamphendvula watsi: “Hamba wehlele eKheyila, ngobe emaFilisti ngitawanikela esandleni sakho.”+ 5 Davide nalamadvodza labenaye babese bayahamba baya eKheyila bayokulwa nemaFilisti. Watsatsa imfuyo yawo, wabulala incumbi yawo, futsi wakhulula bantfu labebahlala eKheyila.+
6 Ngesikhatsi Abiyatha+ indvodzana ya-Ahimeleki abaleka aya kuDavide eKheyila, abephetse sidziya. 7 Sawula watfunyelelwa umbiko lotsi: “Davide ufike lapha eKheyila.” Sawula wabese utsi: “Nkulunkulu umnikele esandleni sami,*+ ngobe utivalele yena ngekungena edolobheni lelinemagede lanemishudvo.” 8 Ngako Sawula watsi bonkhe bantfu abaye emphini, behlele eKheyila futsi bavimbetele Davide nalamadvodza labenaye. 9 Ngesikhatsi Davide eva kutsi Sawula wakha licebo lekumbulala, watsi ku-Abiyatha umphristi: “Nginikete lesidziya.”+ 10 Ngemuva kwaloko, Davide watsi: “Awu Jehova Nkulunkulu wema-Israyeli, inceku yakho ivile kutsi Sawula ufuna kuta lapha eKheyila kuze abhubhise lelidolobha ngenca yami.+ 11 Baholi* baseKheyila batanginikela yini esandleni sakhe? Utawehla yini Sawula njengobe inceku yakho ivile? Awu Jehova Nkulunkulu wema-Israyeli, ngicela ungitjele.” Jehova watsi: “Yebo utawehla.” 12 Davide wabuta watsi: “Baholi baseKheyila batanginikela yini mine nalamadvodza lengihamba nawo esandleni saSawula?” Jehova wamphendvula watsi: “Yebo bataninikela.”
13 Ngaso leso sikhatsi, Davide nalamadvodza langaba ngu-600 labekanye naye,+ bahamba eKheyila futsi behla benyuka besuka kulenye indzawo baya kulenye. Ngesikhatsi Sawula atjelwa kutsi Davide ubalekile eKheyila, akazange amlandzele. 14 Davide wahlala ehlane etindzaweni lobekumatima kufika kuto, lebetisesifundzeni lesinetintsaba lesisehlane laseZifu.+ Sawula wachubeka amfuna,+ kepha Jehova akazange amnikele esandleni sakhe. 15 Ngesikhatsi Davide asehlane laseZifu eHoreshi, bekati kutsi* Sawula uphumele kuyomfuna kute ambulale.
16 Jonathani indvodzana yaSawula wahamba waya kuDavide eHoreshi, futsi wamsita kutsi acinise kwetsembela* kwakhe kuJehova.+ 17 Watsi kuye: “Ungesabi, ngobe babe angeke akutfole; wena utawuba yinkhosi ka-Israyeli+ futsi mine ngibe wesibili kuwe, nababe uyakwati loko.”+ 18 Bobabili babese benta sivumelwane+ embikwaJehova futsi Davide wahlala eHoreshi, Jonathani yena wabuyela ekhaya lakhe.
19 Ngekuhamba kwesikhatsi, emadvodza aseZifu akhuphuka aya kuSawula eGibeya+ afike atsi: “Davide ubhace edvute natsi,+ etindzaweni lokumatima kufika kuto letiseHoreshi,+ egcumeni laseHakhila+ leliseningizimu* yeJeshimoni.*+ 20 Ungeta nobe kunini nawufuna kuta nkhosi, futsi sitamnikela esandleni sakho.”+ 21 Nakeva loko, Sawula watsi: “Shengatsi Jehova anganibusisa ngobe ningivele. 22 Ngicela nihambe niyongihlolela kutsi kahle kahle ukuphi nekutsi ngubani lombonile, ngobe ngivile kutsi unebucili. 23 Funisisani tonkhe tindzawo labhaca kuto bese nibuya kimi nebufakazi. Ngitawubese ngihamba nani futsi nangabe akulelive, ngitamfuna kulolonkhe lusendvo* lwakaJuda.”
24 Ngako bahamba kucala kunaSawula baya eZifu,+ ngaleso sikhatsi Davide nemadvodza labenaye bebasehlane laseMayoni+ e-Arabha,+ leseningizimu yaseJeshimoni. 25 Ngemuva kwaloko Sawula weta nemadvodza labehamba naye batomfuna.+ Ngesikhatsi Davide atjelwa ngaloku, ngekushesha wehla waya edvwaleni+ futsi wahlala ehlane laseMayoni. Nakeva ngaloko Sawula waya ehlane laseMayoni acosha Davide. 26 Watsi Sawula nakefika kulolunye luhlangotsi lwentsaba, Davide nemadvodza labehamba nawo bebakulolunye luhlangotsi lwayo. Davide bekagijima kute abalekele+ Sawula, kodvwa Sawula nemadvodza labehamba nawo bebasondzela kute babambe Davide nemadvodza labehamba naye.+ 27 Kodvwa kwefika sitfunywa kuSawula, satsi: “Buya masinyane ngobe emaFilisti sekangenile kutewuhlasela live letfu!” 28 Ngaleso sikhatsi Sawula wayekela kucosha Davide+ futsi wahamba wayolwa nemaFilisti. Kungako lendzawo yabitwa ngekutsi Lidvwala Lekwehlukanisa.
29 Ngemuva kwaloko Davide wakhuphuka esuka lapho futsi wahamba wayohlala etindzaweni lobekumatima kufika kuto letise-Eni-gedi.+