Incwadzi Yesibili YaSamuweli
17 Ahithofeli wabese utsi ku-Absalomu: “Ngicela kukhetsa emadvodza langu-12 000, sihlome bese sicosha Davide lamuhla ebusuku. 2 Ngitawufika kuye nasadzinwe kakhulu*+ futsi ngitamesabisa; bonkhe bantfu lanabo batawubaleka, ngitawubese ngibulala inkhosi kuphela.+ 3 Ngemuva kwaloko, ngitababuyisa kuwe bonkhe labantfu. Kubuya kwabo bonkhe kutawuya ngekutsi kwentekani kulomuntfu lomfunako. Bonkhe labantfu ngeke basaphindze bakhatsateke.” 4 Lesicelo sabonakala sisihle emehlweni a-Absalomu nakuwo onkhe emadvodza lamadzala aka-Israyeli.
5 Nobe kunjalo, Absalomu watsi: “Ngicela nibite naHushayi+ um-Akhi kute sive kutsi yena utsini.” 6 Ngako Hushayi wefika ku-Absalomu. Absalomu wase utsi kuye: “Nguleso-ke seluleko Ahithofeli lasinikete sona. Sisilandzele yini? Nakungenjalo, sitjele kutsi senteni.” 7 Hushayi yena wase utsi ku-Absalomu: “Asisikahle leseluleko sa-Ahithofeli esimeni lesinjengalesi.”+
8 Hushayi wachubeka watsi: “Wati kahle kutsi babe wakho nalamadvodza lakanye nawo banemandla+ futsi banelulaka* njengelibhele lelilahlekelwe bantfwana balo esigangeni.+ Ngetulu kwaloko, babe wakho uyingwazi+ futsi angeke acitse busuku akanye nebantfu. 9 Loku sikhuluma nje, ubhace kuleminye yemigedze* nobe kulenye indzawo;+ futsi nakangahlasela kucala, labatawukuva loko batawutsi, ‘Bantfu labasekela Absalomu behluliwe!’ 10 Ngisho nemuntfu lonesibindzi njengelibhubesi,+ nakanjani utawuphela emandla ngekwesaba, ngobe onkhe ema-Israyeli ayati kutsi babe wakho uyingwazi+ nekutsi lamadvodza lakanye nawo anesibindzi. 11 Nasi seluleko lengikunika sona: Hlanganisa onkhe ema-Israyeli kusukela kaDani kuya eBherisheba,+ abe manyenti ngangesihlabatsi saselwandle+ futsi kufanele uwahole kulemphi. 12 Nakanjani sitamtfola futsi sitabatuma sibahlasele ngelibutfo lelikhulu kuhle kwematolo nakehlela emhlabatsini. Yena nebantfu bakhe ngeke basindze. 13 Nakungenteka abalekele edolobheni lelitsite, onkhe ema-Israyeli atawuphatsa tintsambo aye kulelodolobha futsi sitalidvonsa sililahle phansi esihosheni kungasali ngisho nelitje lekubika.”
14 Absalomu nawo onkhe emadvodza aka-Israyeli, babese batsi: “Leseluleko saHushayi um-Akhi sincono+ kunalesi sa-Ahithofeli!” Jehova bekafuna kutsi seluleko sa-Ahithofeli+ singalalelwa kuze Jehova atewuletsa inhlekelele ku-Absalomu.+
15 Ngekuhamba kwesikhatsi Hushayi wakhuluma nebaphristi, boSadoki na-Abiyatha,+ watsi: “Ahithofeli umeluleke kanjalo Absalomu kanye nemadvodza lamadzala aka-Israyeli kantsi mine ngimeluleke kanje. 16 Sheshisani nitfumele livi kuDavide futsi nimecwayise nitsi: ‘Ungahlali ematibukweni* asehlane lamuhla ebusuku, kodvwa yewela ngekushesha. Uma ungenti njalo, wena nkhosi nabo bonkhe bantfu labakanye nawe nitawucotfulwa.’”*+
17 Jonathani+ na-Ahimasi+ bebahlala e-Eni-rogeli;+ ngako intfombatana lesisebenti yahamba yayobatjela base bona bayotjela iNkhosi Davide, ngobe bebangafuni kubonakala bangena edolobheni. 18 Nobe kunjalo, kukhona lijaha lelababona lase libikela Absalomu. Ngako bobabili babaleka ngekushesha baya endlini yaBhahurimu+ indvodza lebeyinemtfombo wemanti ebaleni layo. Bangena kuwo babhaca, 19 ngako umfati walendvodza wambonya lomtfombo wabese usakata lokutinhlavu lokugayiwe ngetulu kwawo; kute lobekati ngaloko. 20 Tinceku ta-Absalomu teta endlini kulomfati, tefike tambuta tatsi: “Baphi bo-Ahimasi naJonathani?” Yena wabaphendvula watsi: “Bendlulile babheka ngasemtfonjeni.”+ Ngako lamadvodza achubeka abafuna kodvwa akabatfolanga, futsi abuyela emuva eJerusalema.
21 Ngemuva kwekutsi lamadvodza asahambile, bo-Ahimasi naJonathani baphuma kulomtfombo bahamba bayobikela iNkhosi Davide. Batsi kuyo: “Vuka, wewele umfula ngekushesha ngobe Ahithofeli ukhiphe leso seluleko lesimelene nawe.”+ 22 Ngekushesha Davide kanye nabo bonkhe bantfu labehamba nabo bavuka bewela iJordane. Kwatsi nakusa bonkhe besebewelile.
23 Ngemuva kwekutsi Ahithofeli asabonile kutsi seluleko sakhe asikasetjentiswa, wagibela imbongolo waya endlini yakhe lebeyisedolobheni lakubo.+ Waniketa umndeni wakhe+ ticondziso wabese uyatikhunga.*+ Ngako wafa futsi wangcwatjwa lapho kwangcwatjwa khona bokhokho bakhe.
24 Ngaleso sikhatsi, Davide waya eMahanayimu+ kantsi Absalomu yena wewela iJordane nawo onkhe emadvodza aka-Israyeli. 25 Absalomu wabeka Amasa+ kutsi alawule libutfo esikhundleni saJowabe;+ Amasa abeyindvodzana yaJetheri um-Israyeli, lowalala na-Abigayili+ indvodzakati yaNahashi, longudzadzewaboSeruya aphindze abe ngumake waJowabe. 26 Ema-Israyeli kanye na-Absalomu bemisa emathende kaGileyadi.+
27 Watsi Davide nakefika eMahanayimu, ngekushesha Shobi, indvodzana yaNahashi waseRabha+ yema-Amoni, naMakhire+ indvodzana ya-Amiyeli waseLo-dabari, kanye naBhazilayi+ umGileyadi waseRogelimu 28 baletsa tintfo tekulala, tindishi, tindziwo, kolo, ibhali, fulaha, lokutinhlavu lokugayingiwe, emabhontjisi, emalentili, nalokutinhlavu lokukhantingiwe, 29 luju lwetinyosi, bhotela, timvu kanye nashizi. Konkhe loku bakuniketa Davide kanye nebantfu lebekahamba nabo kute badle,+ ngobe bebatsi: “Labantfu balambile, badziniwe futsi bomile lehlane.”+