Isaya
56 Naku lokushiwo nguJehova:
“Sekelani timiso letilungile+ futsi nente lokuhle,
Ngobe insindziso yami itawufika ngekushesha
Futsi kulunga kwami kutawembulwa.+
2 Uyajabula umuntfu lowenta loku
Nendvodzana yemuntfu lebambelela kuko,
Leyo legcina liSabatha futsi lengalihlambalati+
Iphindze ibambe sandla sayo kulo lonkhe luhlobo lwebubi.
3 Umuntfu wekuhamba lotihlanganisa naJehova+ akukafaneli atsi,
‘Nakanjani Jehova utangehlukanisa nebantfu bakhe.’
Futsi umtsenwa akukafaneli atsi, ‘Mine nje ngisihlahla lesomile.’”
4 Ngobe naku lokushiwo nguJehova kubatsenwa labagcina emasabatha ami nalabakhetsa kwenta lokungijabulisako nalababambelela esivumelwaneni sami:
5 “Ngitabanika sikhumbuto kanye neligama ngekhatsi endlini yami nangekhatsi kwetindvonga tami,
Lokuyintfo lencono kunemadvodzana nemadvodzakati.
Ngitawubanika ligama lelihlala kuze kube phakadze,
Lokuligama lelingeke liphele.
6 Mayelana nebantfu bakuletinye tive labatihlanganisa naJehova kuze bamkhonte,
Batsandze libito laJehova+
Futsi babe tinceku takhe,
Bonkhe labo labagcina liSabatha nalabangalihlambalati
Futsi lababambelela esivumelwaneni sami,
7 Ngitawuphindze ngibaletse entsabeni yami lengcwele+
Futsi ngibajabulise ngekhatsi endlini yami yemthantazo.
Iminikelo yabo yekushiswa kanye nemihlatjelo yabo itakwemukeleka e-al’thare lami.
Ngobe indlu yami kutawutsiwa yindlu yemthantazo yato tonkhe tive.”+
8 INkhosi Lephakeme Jehova, leyo lebutsela ndzawonye bantfu labahlakatekile baka-Israyeli,+ itsi:
“Ngiyawubutsisela kuye nalabanye, ngaphandle kwalabo lesengivele ngibabutsisile.”+
9 Nonkhe nine tilwane tesiganga, wotani nitokudla,
Nani nonkhe nine tilwane tesiganga lenisemahlatsini.+
10 Bogadzi bakhe ababoni emehlweni,+ kute ngisho namunye kubo lonakile.+
Bonkhe batinja letingenamsebenti, letingakhonkhotsi.+
Bayahehetela futsi balele phansi; bayakutsandza kulala.
11 Batinja letitsandza kakhulu kudla;
Akwenteki besutse.
Babelusi labete kucondza.+
Bonkhe batihambela ngendlela yabo;
Bonkhe ngelutsi lwabo batifunela inzuzo ngekungetsembeki futsi batsi:
12 “Wotani, asitsatseni liwayini,
Futsi asinatseni tjwala size sidzakwe.+
Kusasa kutawufana nalamuhla, futsi kutawuba ncono kakhulu!”