Isaya
36 Ngemnyaka wesi-14 wekubusa kweNkhosi Hezekiya, Senaheribi inkhosi yase-Asiriya,+ wakhuphuka wayohlasela onkhe emadolobha labiyelwe akaJuda futsi wawancoba.+ 2 Inkhosi yase-Asiriya yabese itfumela Rabushake*+ nelibutfo lelikhulu lebelisuka eLakhishi,+ yalitfumela eNkhosini Hezekiya yaseJerusalema. Lafike lamisa emathende eceleni kwemsele wesitiba lesingenhla,+ lesisemgwacweni lomkhulu wensimu yemwashi wetimphahla.+ 3 Eliyakimu+ indvodzana yaHilkiya, lobekabuke indlu,* naShebna+ mabhalane kanye naJowa umgcini mabhuku futsi loyindvodzana ya-Asafa, babese bayaphuma baya kuye.
4 Ngako Rabushake watsi kubo: “Ngicela nitsi kuHezekiya, ‘Naku lokushiwo yinkhosi lenkhulu, inkhosi yase-Asiriya, itsi: “Wena wetsembeni?+ 5 Utsi: ‘Nginelichinga nemandla ekulwa imphi,’ kodvwa lawo mavi alite. Ulibeke kubani litsemba lakho kutsi ungaze ube nesibindzi lesingaka sekungivukela?+ 6 Wetsembele ekusitweni ngulomhlanga lofohlokile, lokuyiGibhithe, lokutsi ngisho umuntfu angatsi ubambelela kuwo angahlabeka sandla alimale. Unjalo-ke Faro inkhosi yaseGibhithe kubo bonkhe labetsembele kuye.+ 7 Naningatsi kimi: ‘Setsembele kuJehova Nkulunkulu wetfu,’ akusuye yini lona Hezekiya lasuse tindzawo takhe letiphakeme nema-al’thare,+ abe atsi kubantfu bakaJuda nebaseJerusalema: ‘Kufanele nikhotsame embikwaleli-al’thare’?”’+ 8 Ngako nyalo ngicela ubheje nenkhosi yami, inkhosi yase-Asiriya,+ ngitakunika emahhashi langu-2 000 nawungakhona kuwatfolela bagibeli. 9 Ungakwenta kanjani-ke kutsi ubuyisele emuva indvuna yembuso lenesikhundla lesiphansi kakhulu etincekwini tenkhosi yami, ube ubeke litsemba lakho eGibhithe kutsi ikunike tincola nebagibeli bemahhashi? 10 Akusuye yini Jehova lokhiphe umyalo wekutsi angikhuphuke ngitoyihlasela? Jehova lucobo lwakhe utsite kimi, ‘Khuphuka uyohlasela lelive uphindze ulincobe.’”
11 Nabeva loko, bo-Eliyakimu naShebna+ kanye naJowa batsi kuRabushake:+ “Sicela ukhulume netinceku takho ngelulwimi lwesi-Aramu*+ ngobe ngilo lesiluvako; ungakhulumi natsi ngelulwimi lwemaJuda ngobe kuva bonkhe labantfu labaselubondzeni.”+ 12 Kodvwa Rabushake watsi: “Inkhosi yami ingitfume kutsi ngikhulume lamavi enkhosini yenu nakini kuphela yini? Ayikangitfumi yini kutsi ngiwakhulume nakulamadvodza lahleti elubondzeni, latakudla emangcoliso awo, anatse nemichamo yawo kanye nani?”
13 Rabushake wabese uyasukuma, wamemeta ngelulwimi lwemaJuda+ watsi: “Lalelani livi lenkhosi lenkhulu, inkhosi yase-Asiriya.+ 14 Naku lokushiwo yinkhosi, ‘Ningamvumeli Hezekiya aniyenge ngobe angeke akhone kunisindzisa.+ 15 Ningamvumeli Hezekiya kutsi anente netsembele kuJehova+ ngekutsi atsi: “Jehova utasikhulula nakanjani, futsi lelidolobha angeke linikelwe esandleni senkhosi yase-Asiriya.” 16 Ningamlaleli Hezekiya, ngobe naku lokushiwo yinkhosi yase-Asiriya: “Yentani kuthula nami futsi nitinikele. Ngamunye wenu utakudla ensimini yakhe yemagilebisi nasesihlahleni sakhe semakhiwa aphindze anatse emanti emtfonjeni wakhe, 17 kuze kube ngulapho ngita ngitonilandza nginiyise eveni lelinjengelive lenu,+ live lelinalokutinhlavu neliwayini lelisha, live lelinesinkhwa nemasimu emagilebisi. 18 Ningamvumeli Hezekiya kutsi anidukise ngekutsi atsi: ‘Jehova utasikhulula.’ Ukhona yini kulabonkulunkulu betive lokhonile kusindzisa live lakhe esandleni senkhosi yase-Asiriya?+ 19 Baphi bonkulunkulu baseHamathi nase-Aphadi?+ Baphi bonkulunkulu baseSefavayimu?+ Bayikhululile yini iSamariya esandleni sami?+ 20 Ngumuphi emkhatsini wabo bonkhe labonkulunkulu balamave lokhonile kukhulula live lakhe esandleni sami, lokunenta nicabange kutsi Jehova angakhulula iJerusalema esandleni sami?”’”+
21 Kodvwa bebabindzile futsi bangasho lutfo kuye, ngobe inkhosi beyibayale yatsi: “Ningamphendvuli.”+ 22 Ngemuva kwaloko Eliyakimu indvodzana yaHilkiya, lobekabuke indlu,* Shebna+ mabhalane kanye naJowa umgcini mabhuku futsi loyindvodzana ya-Asafa, beta kuHezekiya badzabula tembatfo tabo futsi bamtjela emavi aRabushake.