Hezekeli
48 “Leti tindzawo taletive ngemagama ato, kusukela encenyeni lesekugcineni yenyakatfo: Indzawo yakaDani+ icala endleleni yaseHethiloni kuya eLebo-hamathi+ ize iyofika eHasari-enani, ihambe nangasemnceleni losenyakatfo yeDamaseko eceleni kwaseHamathi,+ futsi ichubekela emphumalanga yalomncele ize iyofika emnceleni wasenshonalanga. 2 Indzawo yaka-Asheri+ icala emnceleni wendzawo yakaDani, kusukela emnceleni longasemphumalanga kuya kulongasenshonalanga. 3 Indzawo yakaNaftali+ icala emnceleni wendzawo yaka-Asheri, kusukela emnceleni longasemphumalanga kuya kulongasenshonalanga. 4 Indzawo yakaManase+ icala emnceleni wendzawo yakaNaftali, kusukela emnceleni longasemphumalanga kuya kulongasenshonalanga. 5 Indzawo yaka-Efrayimu icala emnceleni wendzawo yakaManase,+ kusukela emnceleni longasemphumalanga kuya kulongasenshonalanga. 6 Indzawo yakaRubeni icala emnceleni wendzawo yaka-Efrayimu,+ kusukela emnceleni longasemphumalanga kuya kulongasenshonalanga. 7 Indzawo yakaJuda icala emnceleni wendzawo yakaRubeni,+ kusukela emnceleni longasemphumalanga kuya kulongasenshonalanga. 8 Kusuka emnceleni wakaJuda longasemphumalanga kuya kulongasenshonalanga, kufanele ubekele eceleni indzawo lengemakhilomitha langaba ngu-12 nesigamu* bubanti ibe ngumnikelo,+ futsi budze bayo kufanele bulingane nendzawo leyabelwa letinye tive taka-Israyeli kusukela emnceleni longasemphumalanga kuye kulongasenshonalanga. Lithempeli litawuba semkhatsini walendzawo.
9 “Indzawo lotayibekela eceleni kuze ibe ngumnikelo kuJehova kufanele ibe ngemakhilomitha langaba ngu-12 nesigamu budze nalangaba sihlanu* bubanti. 10 Lendzawo itawuba ngumnikelo longcwele webaphristi.+ Itawuba ngemakhilomitha langaba ngu-12 nesigamu eluhlangotsini lolusenyakatfo, langaba sihlanu ngasenshonalanga, langaba sihlanu ngasemphumalanga nalangaba ngu-12 nesigamu ngaseningizimu. Lithempeli laJehova litawuba semkhatsini wayo. 11 Itawuba yebaphristi labangcwelisiwe emadvodzaneni aSadoki,+ labo labangisebentela futsi labangazange bangishiye ngesikhatsi ema-Israyeli nemaLevi angishiya.+ 12 Batawuba nencenye yabo endzaweni lengumnikelo, lebekelwe eceleni kuze ibe yindzawo lengcwele emnceleni wemaLevi.
13 “EmaLevi atawuba nendzawo yawo lengemakhilomitha langaba ngu-12 nesigamu budze nalangaba sihlanu bubanti eceleni kwendzawo yebaphristi. (Budze bayo sebubonkhe butawuba ngemakhilomitha langaba ngu-12 nesigamu nalangaba sihlanu bubanti.) 14 Akukafaneli bayitsengise, nobe bayishintjise nobe bayinike lomunye lendzawo lekhetsekile yalelive ngobe ingcwele kuJehova.
15 “Indzawo lesele lengemakhilomitha langaba mabili nesigamu* bubanti leseceleni kwemncele longemakhilomitha langaba ngu-12 nesigamu itawuba yekwenta imisebenti levamile leyentiwa kulelidolobha,+ ibe yekwakha tindlu neyemadlelo. Lelidolobha litawuba semkhatsini wayo.+ 16 Nabu bukhulu balelidolobha: Umncele longasenyakatfo ungemamitha langaba ngu-2 250,* longaseningizimu ungemamitha langaba ngu-2 250, futsi longasenshonalanga ungemamitha langaba ngu-2 250. 17 Lidlelo lalelidolobha litawuba ngemamitha langaba ngu-125* kuya enyakatfo, langaba ngu-125 kuya eningizimu, langaba ngu-125 kuya emphumalanga nalangaba ngu-125 kuya enshonalanga.
18 “Budze bendzawo lesele butawulingana nendzawo lengumnikelo longcwele,+ lengemakhilomitha langaba sihlanu kuya emphumalanga nalangaba sihlanu kuya enshonalanga. Itawulingana nendzawo lengumnikelo longcwele futsi umkhicito wayo utawuba kudla kwalabo labasebenta edolobheni. 19 Bonkhe labasebenta kulelidolobha labasuka kuto tonkhe tive taka-Israyeli kufanele bayilime.+
20 “Yonkhe lendzawo lengumnikelo kufanele ibe ngemakhilomitha langaba ngu-12 nesigamu budze nebubanti. Kufanele uyibekele eceleni ibe ngumnikelo longcwele ihambisane nendzawo yelidolobha.
21 “Indzawo letawusala etinhlangotsini totimbili talendzawo lengumnikelo longcwele nasendzaweni yelidolobha itawuba yemholi.+ Itawuba seceleni kwemncele longemakhilomitha langaba ngu-12 nesigamu losemphumalanga nalosenshonalanga kwalendzawo lengumnikelo. Itawuhambisana naletindzawo letihlanganisiwe, futsi itawuba yemholi. Indzawo lengumnikelo longcwele kanye nelithempeli kutawuba semkhatsini walendzawo.
22 “Indzawo yemaLevi neyelidolobha itawuba semkhatsini wetintfo tesikhulu. Indzawo yesikhulu itawuba semkhatsini wemncele wakaJuda+ newakaBhenjamini.
23 “Etiveni letisele, indzawo yakaBhenjamini icala emnceleni longasemphumalanga iye kulongasenshonalanga.+ 24 Indzawo yakaSimeyoni icala emnceleni wendzawo yakaBhenjamini,+ kusukela emnceleni longasemphumalanga kuya kulongasenshonalanga. 25 Indzawo yaka-Isakhari+ icala emnceleni wendzawo yakaSimeyoni, kusukela emnceleni longasemphumalanga kuya kulongasenshonalanga. 26 Indzawo yakaZebuloni icala emnceleni wendzawo yaka-Isakhari,+ kusukela emnceleni longasemphumalanga kuya kulongasenshonalanga.+ 27 Indzawo yakaGadi icala emnceleni wendzawo yakaZebuloni,+ kusukela emnceleni longasemphumalanga kuya kulongasenshonalanga. 28 Umncele longasenshonalanga longasemnceleni wakaGadi utawuhamba usuke eThamari+ uye emantini aseMeribha-khadeshi,+ uchubekele eSihosheni*+ uze uyofika eLwandle Lolukhulu.*
29 INkhosi Lephakeme Jehova itsi: “Lena-ke ngiyo indzawo lokufanele niyabe ibe lifa letive taka-Israyeli,+ futsi leti kutawuba tincenye tayo.+
30 “Tindzawo tekuphuma talelidolobha nguleti: Luhlangotsi lolungasenyakatfo lutawuba ngemamitha langaba ngu-2 250.+
31 “Emagede alelidolobha atawetsiwa ngemabito etive taka-Israyeli. Emagedeni lamatsatfu lasenyakatfo, linye lakaRubeni, linye lakaJuda, lelinye lakaLevi.
32 “Luhlangotsi lolungasemphumalanga lutawuba ngemamitha langaba ngu-2 250 budze, nemagede lamatsatfu. Ligede linye lakaJosefa, linye lakaBhenjamini, lelinye lakaDani.
33 “Luhlangotsi lolungaseningizimu lutawuba ngemamitha langaba ngu-2 250, nemagede lamatsatfu. Ligede linye lakaSimeyoni, linye laka-Isakhari, lelinye lakaZebuloni.
34 “Luhlangotsi lolungasenshonalanga lutawuba ngemamitha langaba ngu-2 250 budze, nemagede lamatsatfu. Ligede linye lakaGadi, linye laka-Asheri, lelinye lakaNaftali.
35 “Seyiyonkhe lendzawo itawuba ngemakhilomitha langaba ngu-9.* Kusukela ngalelolanga, lelidolobha litawubitwa ngeligama lelitsi: Jehova uLapho.”+