Imisebenti Yebaphostoli
23 Pawula wawabukisisa lamalunga eNkantolo YemaJuda, wase utsi: “Banaketfu, mine bengisolo nginanembeza lomsulwa embikwaNkulunkulu+ kuze kube ngulamuhla.” 2 Ngesikhatsi Ananiyase umphristi lophakeme eva loku, watjela labo lebebeme ngakuPawula kutsi bamshaye emlonyeni. 3 Ngako Pawula watsi kuye: “Nkulunkulu utakushaya wena mtentisi.* Ufuna kungehlulela ngekuvumelana neMtsetfo, kodvwa ngesikhatsi lesifanako ube uwephula ngekutsi utjele labantfu kutsi bangishaye?” 4 Labo lebebeme edvute batsi: “Umetfukelani umphristi lophakeme waNkulunkulu?” 5 Pawula watsi: “Banaketfu, bengingati kutsi ungumphristi lophakeme. Ngobe kubhaliwe kutsi: ‘Ungakhulumi kabi ngemholi webantfu bakini.’”+
6 Ngesikhatsi Pawula abona kutsi bebehlukene kabili, labanye babaSadusi kantsi labanye babaFarisi, wakhuluma ngelivi leliphakeme embikwaleNkantolo watsi: “Banaketfu, mine ngingumFarisi,+ indvodzana yebaFarisi. Sizatfu lesenta kutsi ngehlulelwe kutsi ngikholelwa ekuvusweni kwalabafile.” 7 Watsi nakasho loku, kwaba nekuphikisana emkhatsini webaFarisi nebaSadusi, base behlukana ekhatsi. 8 Ngobe baSadusi bebatsi labafile ngeke bavuswe, batsi kute tingilosi, futsi kute netidalwa temoya, kodvwa baFarisi bebatikholelwa* tonkhe letintfo.+ 9 Ngako kwaba nemsindvo lomkhulu, futsi letinye tati temtsetfo telicembu lebaFarisi tasukuma taphikisa ngelulaka, tatsi: “Asitfoli lutfo lolubi kulomuntfu, ngobe kungenteka kutsi kunesidalwa semoya nobe ingilosi lekhulume naye+—.” 10 Njengobe lokuphikisana bekuba kukhulu, lendvuna yemphi yesaba kutsi labantfu batambulala Pawula, ngako yatjela emasotja kutsi ehle amsuse kubo, ammikise enkambu yemasotja.
11 Ngakusasa ebusuku, iNkhosi yeta kuye yatsi: “Bani nesibindzi!+ Ngobe njengobe ufakaze ngalokuphelele ngami eJerusalema, kufanele wente lokufanako naseRoma.”+
12 Nasekusile, emaJuda akha lisu, enta nesifungo sekutsi nakangadla nobe anatse lokutsite angakambulali Pawula, atawucalekiswa. 13 Emadvodza lenta lesifungo bekangetulu kwalangu-40. 14 Aya kubaphristi labakhulu nasemadvodzeni lamadzala, afike atsi: “Sente sifungo sekutsi kufanele sicalekiswe nasingadla singakambulali Pawula. 15 Ngako nine kanye nemalunga eNkantolo YemaJuda kufanele nitjele indvuna yemphi kutsi imletse lapha kini, kube shengatsi nisafuna kuphenyisisa licala lakhe. Utawutsi angakasondzeli nekusondzela, sitawube sesikulungele kumbulala.”
16 Kodvwa umshana waPawula weva ngalelisu lekulalela Pawula endleleni, wase uyahamba uya enkambu yemasotja wayombikela. 17 Pawula wabita lenye indvuna yemasotja watsi kuyo: “Tsatsa lelijaha uliyise endvuneni yemphi, ngobe kukhona lelifuna kuyitjela kona.” 18 Ngako lendvuna yemasotja yahamba nalo yaliyisa endvuneni yemphi, yafike yatsi: “Siboshwa lesinguPawula singibitile sangicela kutsi ngiletse lelijaha kuwe, ngobe kukhona lelifuna kukutjela kona.” 19 Lendvuna yemphi yalitsatsa lelijaha, futsi baba bodvwa, yase iyalibuta itsi: “Yini lena lofuna kungitjela yona?” 20 Lona latsi: “EmaJuda avumelene ngekutsi akucele uletse Pawula embikweNkantolo YemaJuda kusasa, kube shengatsi afuna kuva kabanti ngelicala lakhe.+ 21 Ungawalaleli, ngobe emadvodza langetulu kwalangu-40 kuwo ente lisu lekumlalela endleleni, enta nesifungo sekutsi kufanele acalekiswe nakangadla nobe anatse lokutsite angakambulali.+ Nyalo sekatilungiselele, alindzele nje kutsi usivume lesicelo sawo.” 22 Ngako lendvuna yemphi yalikhulula lelijaha ngemuva kwekutsi seyiliyale yatsi: “Ungatjeli muntfu kutsi ungibikele ngaloku.”
23 Yabita tindvuna temasotja letimbili yatsi kuto: “Nasekusondzela insimbi yemfica* ebusuku, nibolungisa emasotja langu-200 kutsi aye eKhesariya, nebagibeli bemahhashi labangu-70, kanye nalabahlome ngetikhali labangu-200. 24 Lungiselani Pawula emahhashi latawagibela kuze afike aphephile kuFeliksi umbusi.” 25 Yabhala nencwadzi lebeyitsi:
26 “Mine Klawudiyusi Lisiyasi ngikubhalela lencwadzi wena Mhlonishwa, Mbusi Feliksi: Ngiyakubingelela! 27 Lomuntfu ubanjwe ngemaJuda futsi besekafuna kumbulala, kodvwa ngekushesha, ngitsetse emasotja ngamlamulela,+ ngobe ngivile kutsi ungumRoma.+ 28 Njengobe bengifuna kwati sizatfu sekummangalela kwawo, ngimyise eNkantolo YemaJuda.+ 29 Ngitfole kutsi ammangalela ngetintfo letimayelana neMtsetfo wawo,+ kodvwa kute intfo layentile lementa afanelwe kufa nobe kuboshwa. 30 Ngako ngimtfumela kuwe ngekushesha, ngobe ngivile kutsi emaJuda ente lisu lekumbulala,+ futsi ngitjele labo labammangalelako kutsi bammangalele embikwakho.”
31 Ebusuku, lamasotja atsatsa Pawula+ amyisa e-Antiphatrisi njengobe bekatjeliwe. 32 Ngakusasa, ashiya lalabagibele emahhashi kuze bachubeke bahambe naye, kodvwa wona abuyela enkambu yemasotja. 33 Labagibeli bemahhashi befika eKhesariya banika umbusi lencwadzi, bashiya naPawula kuye. 34 Wayifundza, wase ubuta kutsi Pawula uphuma kusiphi sifundza. Weva kutsi bekaphuma eSilisiya.+ 35 Wase utsi: “Ngitakulalela kahle nasekufike labo labakumangalele.”+ Ngako watsi Pawula akagadvwe esigodlweni saHerodi.