Kulandzisa KwaMakho
11 Batsite nasebasondzela eJerusalema, edvute naseBhethifage naseBhethani,+ eNtsabeni Yemincumo, watfuma bafundzi bakhe lababili,+ 2 watsi kubo: “Hambani niye kulela dolobha, nitawutsi nanisandza kungena kulo nikhandze litfole lembongolo likhungiwe, lokute umuntfu loke waligibela; nibolikhumula nililetse kimi. 3 Nakukhona lotsi kini: ‘Nentani?’ nibotsi kuye: ‘INkhosi iyalidzinga, futsi italibuyisa ngekushesha.’” 4 Ngako bahamba, bakhandza lelitfole likhungwe ngasemnyango, eceleni kwemgwaco, base bayalikhumula.+ 5 Kodvwa labanye bantfu lebebeme lapho batsi kubo: “Nentani, nilikhumulelani lelitfole?” 6 Labafundzi babatjela loko Jesu lebekabatjele kona futsi labantfu babese bayabayekela.
7 Baliletsa lelitfole+ kuJesu, bagaca tingubo tabo tangetulu etikwalo, yena wase uyaligibela.+ 8 Bantfu labanyenti bendlala tingubo tabo tangetulu emgwacweni, kantsi labanye bakha emacembe esigangeni.+ 9 Labo lebebahamba embili nalabo lebebalandzela ngemuva bebachubeka bamemeta batsi: “Sicela umsindzise!+ Ubusisiwe loyo lota ngelibito laJehova!*+ 10 Ubusisiwe uMbuso lotako wababe wetfu Davide!+ Sicela umsindzise, wena losezulwini!” 11 Ngako Jesu wefika eJerusalema wangena ethempelini, futsi wacalata, wabuka tonkhe tintfo, kodvwa ngenca yekutsi besekuhlwile wahamba waya eBhethani kanye nalaba labangu-12.+
12 Ngakusasa nasebaphuma eBhethani wativa alambile.+ 13 Watsi asekhashanyana, wabona sihlahla semkhiwa lebesinemacembe, futsi waya kuso wayobuka kutsi kukhona yini lebekangakutfola. Kodvwa nakasondzela akazange atfole lutfo ngaphandle kwemacembe nje kuphela, ngobe bekungakabi sikhatsi semakhiwa. 14 Ngako watsi kuso: “Akungasabi nemuntfu lotfola sitselo kuwe kuze kube phakadze.”+ Bafundzi bakhe bebamlalele.
15 Befika eJerusalema. Wase ungena ethempelini wacosha labo lebebatsenga nalebebatsengisa, waketula nematafula alebebashintja timali kanye netitulo talabebatsengisa ematuba.+ 16 Akazange avumele muntfu kutsi adzabule emabaleni elithempeli aphetse lokutsite. 17 Wafundzisa watsi: “Akukabhalwa yini kwatsiwa: ‘Indlu yami kutawutsiwa yindlu yemthantazo yetive tonkhe’?+ Kodvwa nine niyenta indlu yetigebengu.”+ 18 Baphristi labakhulu netati temtsetfo bakuva loko futsi bafuna indlela yekumbulala,+ ngobe bebamesaba njengobe sicumbi sebantfu besimangaliswa nguloko lebekakufundzisa.+
19 Nasekunguntsambama, besuka kulelidolobha. 20 Kodvwa ekuseni nasebabuya, babona lesihlahla semkhiwa sesomile kusukela etimphandzeni taso.+ 21 Ngako Phetro wakhumbula, wase utsi kuye: “Mfundzisi, buka lesihlahla losicalekisile sesomile.”+ 22 Jesu watsi kubo: “Banini nekukholwa kuNkulunkulu. 23 Ngicinisile ngitsi kini: Nobe ngubani lotsi kulentsaba: ‘Suka lapha ujikeke elwandle,’ futsi loko akusho aciniseka enhlitiyweni yakhe, anekukholwa kutsi kutawenteka, utawukwenta nakanjani.+ 24 Kungako ngitsi kini: Tonkhe tintfo lenitithantazelako naleniticelako, kholwani kutsi senivele ninato, futsi nitawutitfola.+ 25 Ngako nanimile nithantaza, nibobatsetselela labo labanonile, khona naBabe wenu losezulwini atonitsetselela tono tenu.”+ 26* ——
27 Babese bayefika eJerusalema, futsi Jesu watsi nakangena ethempelini, baphristi labakhulu, tati temtsetfo kanye nemadvodza lamadzala beta kuye, 28 batsi: “Letintfo utenta ngaliphi ligunya, futsi ngubani lokunike leligunya?”+ 29 Jesu wabaphendvula watsi: “Nami ngitanibuta umbuto. Nangabe ningiphendvula, nami ngitanitjela kutsi ngilitsatsaphi ligunya lekwenta letintfo. 30 Johane+ abelitsetsephi ligunya lekubhabhatisa, ezulwini yini nobe kubantfu? Ngiphendvuleni.”+ 31 Babese bacala kukhuluma bodvwa batsi: “Nasitsi: ‘Ezulwini,’ utawutsi: ‘Animkholwanga ngani-ke?’ 32 Kodvwa ngeke sesicale sitsi: ‘Kubantfu.’” Ngobe bebesaba lesicumbi sebantfu ngenca yekutsi besitsatsa Johane njengemphrofethi.+ 33 Ngako bamphendvula batsi: “Asati.” Jesu watsi kubo: “Nami-ke ngeke nginitjele kutsi ngilitsatsaphi ligunya lekwenta letintfo.”