Jobe
23 Jobe waphendvula watsi:
2 “Ngitativikela ngobe angivumelani naloku lokushoko;*+
Sengiphelelwe ngemandla ngenca yekububula kwami.
3 Kube mane bengati kutsi ngingamtfola kuphi Nkulunkulu!+
Bengingaya lapho ahlala khona.+
4 Bengitawubeka indzaba yami embikwakhe
Futsi umlomo wami bewutawusho emavi lamanyenti ekutivikela;
5 Bengitayilalela imphendvulo yakhe
Ngikunake naloko langitjela kona.
6 Abetawumelana yini nami ngemandla akhe lamakhulu?
Cha, ngiyaciniseka kutsi abetangilalela.+
7 Licala lalolungile belingalungiswa embikwaNkulunkulu,
Futsi uMehluleli wami abengangikhulula unomphela.
8 Kodvwa ngitsi nangiya emphumalanga, ngingamkhandzi;
Ngitsi nalapho ngibuya, ngingamtfoli.
9 Nakasebenta ngesencele, angikhoni kumbona;
Utsi nakagucukela ngesekudla, nalapho ngingamboni.
10 Kodvwa uyayati indlela lengihambe ngayo.+
Utawutsi nasekacedzile kungivivinya, ngiphume sengifana neligolide lelicwengisisiwe.+
11 Tinyawo tami titilandzele edvute tinyatselo takhe;
Bengisolo ngihamba ngendlela yakhe ngingaphambuki.+
12 Angikesuki emitsetfweni yakhe.
Emavi akhe ngiwatsetse njengalaligugu,+ ngisho nangetulu kwaloko lobekulindzeleke kimi.*
13 Nakatimisele ngalokutsite, ngubani longamvimba?+
Nakukhona lafuna kukwenta, uyakwenta.+
14 Ngobe utakwenta konkhe lahlose* kukwenta kimi,
Futsi tisetinyenti tintfo letinjalo lasatigcinile.
15 Kungako sengimesaba kangaka,
Nangicabanga ngaye, iyakhula indlela lengimesaba ngayo.
16 Nkulunkulu ungente ngaba ligwala,
Futsi Somandla ungente ngafikelwa kwesaba.
17 Buso bami bumbonywe bumnyama lobukhulu.
Nobe kunjalo, angeke ngize ngibindze.