2 Tikhronike
21 Jehoshafati wabese uyafa futsi wangcwatjwa lapho kwangcwatjwa khona bokhokho bakhe, wangcwatjwa eDolobheni laDavide; indvodzana yakhe Jehoramu yaba yinkhosi ngemuva kwakhe.+ 2 Bomnakabo, emadvodzana aJehoshafati, bekubo-Azariya, Jehiyeli, Zakhariya, Azariya, Mikhayeli naShefathiya; bonkhe laba bekungemadvodzana eNkhosi Jehoshafati yaka-Israyeli. 3 Babe wabo bekabaphe tipho letinyenti telisiliva neteligolide netintfo letiligugu kanye nemadolobha labiyelwe akaJuda;+ kodvwa umbuso wawunika Jehoramu+ ngobe bekalitibulo.
4 Ngesikhatsi Jehoramu sekatsetse umbuso wababe wakhe, wacinisa sikhundla sakhe ngekubulala bonkhe bomnakabo+ ngenkemba kanye naletinye tindvuna taka-Israyeli. 5 Jehoramu bekaneminyaka lengu-32 budzala nakaba yinkhosi futsi wabusa iminyaka lengu-8 eJerusalema.+ 6 Wahamba ngendlela yemakhosi aka-Israyeli,+ njengobe emakhosi endlu ya-Ahabi bekentile, ngobe indvodzakati ya-Ahabi yaba ngumfati wakhe;+ futsi wachubeka enta lokubi emehlweni aJehova. 7 Kodvwa Jehova akazange afune kubhubhisa indlu yaDavide ngenca yesivumelwane labekasentile naye,+ beketsembise kuniketa Davide nemadvodzana akhe sibane lebesitawuhlala njalo.+
8 Ngesikhatsi saJehoramu, sive saka-Edomu savukela sive sakaJuda+ saphindze satibekela inkhosi yaso.+ 9 Ngako Jehoramu kanye netindvuna temabutfo bawelela ngesheya bakanye nato tonkhe tincola takhe temphi futsi bavuka ebusuku bancoba sive saka-Edomu lebesibatungeletile kanye netindvuna tetincola temphi. 10 Kodvwa sive saka-Edomu besisolo sichubeka nekuvukela emaJuda kuze kube ngulamuhla. ILibna+ nayo yavukela Jehoramu ngobe abesamlahlile Jehova Nkulunkulu wabokhokho bakhe.+ 11 Bekakhe netindzawo letiphakeme+ etintsabeni takaJuda kuze abangele bantfu labahlala eJerusalema kutsi bangetsembeki kuNkulunkulu* futsi wadukisa sive sakaJuda.
12 Ekugcineni kwefika umlayeto lobhalelwe Jehoramu uvela ku-Elija+ umphrofethi utsi: “Naku lokushiwo nguJehova Nkulunkulu waDavide khokho wakho, ‘Awukahambi ngendlela yababe wakho Jehoshafati+ nome ngendlela yeNkhosi Asa+ yakaJuda. 13 Kodvwa uhamba ngendlela yemakhosi aka-Israyeli+ futsi ubangela emaJuda nebantfu labahlala eJerusalema kutsi bangetsembeki kuNkulunkulu,*+ balingise indlu ya-Ahabi.+ Ubulele ngisho nabomnakenu,+ labayindlu yababe wakho, lebebancono kunawe. 14 Ngako-ke Jehova utawubaletsela sishayo bantfu bakho, aletsele nemadvodzana akho kanye nebafati bakho futsi utawulahlekelwa ngiko konkhe lonako. 15 Wena utawuhlaselwa kugula lokwehlukahlukene lokufaka ekhatsi sifo sematfumbu kuze kube ngulapho ematfumbu akho aphumela ngephandle onkhe emalanga, ngenca yalesifo.’”
16 Jehova wabese wenta kutsi emaFilisti* nema-Arabu labekaseceleni kwemaTopiya avukele Jehoramu.+ 17 Ngako ahlasela lakaJuda afike atsatsa tonkhe tintfo lebetisendlini* yenkhosi+ kanye nemadvodzana ayo nebafati bayo; kwasala yinye kuphela indvodzana yenkhosi, ligama layo bekunguJehoyahazi,*+ ayindvodzana yayo lencane. 18 Kwatsi nasekwenteke konkhe loku, Jehova wamshaya ngesifo sematfumbu lesingelapheki.+ 19 Ngekuhamba kwesikhatsi, nasekwendlule iminyaka lemibili legcwele, ematfumbu akhe aphumela ngephandle ngenca yalesifo futsi wafa sekagula kakhulu aphetfwe ngulesifo; bantfu bakhe abazange bambasele umlilo wekumhlonipha emngcwabeni wakhe njengobe bebenta kubokhokho bakhe.+ 20 Bekaneminyaka lengu-32 budzala nakaba yinkhosi futsi wabusa iminyaka lengu-8 eJerusalema. Kute ngisho namunye umuntfu loweva buhlungu nakafa. Ngako bamngcwaba eDolobheni laDavide+ kodvwa abazange bamngcwabe endzaweni yekungcwaba emakhosi.+